Sharad Pawar NCP : महाराष्ट्राच्या राजकीय वर्तुळातून एक अत्यंत खळबळजनक आणि अनपेक्षित माहिती समोर येत आहे. राष्ट्रवादी काँग्रेस पक्षाचे (NCP) ज्येष्ठ नेते अजित पवार यांच्या दुःखद निधनानंतर, दोन्ही राष्ट्रवादी काँग्रेस पक्षांच्या विलीनीकरणाची चर्चा राजकीय वर्तुळात मोठ्या प्रमाणावर सुरू झाली होती. खासदार सुप्रिया सुळे यांनी हा विलीनीकरणाचा विषय आमच्यासाठी पूर्णपणे संपला असल्याचे जाहीर केले असले, तरी आता एक नवीनच राजकीय समीकरण आकारास येत असल्याची चिन्हे आहेत. ज्येष्ठ नेते शरद पवार यांच्या नेतृत्वाखालील राष्ट्रवादी काँग्रेस पक्ष थेट सत्ताधारी ‘महायुती’ आणि केंद्र सरकारमधील ‘एनडीए’ (NDA) आघाडीत सहभागी होणार असल्याच्या चर्चांनी आता चांगलाच जोर धरला आहे.
या चर्चांना पाठबळ मिळण्याचे मुख्य कारण म्हणजे, गेल्या काही दिवसांत शरद पवार यांच्या पक्षाचे ज्येष्ठ नेते जयंत पाटील यांनी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची घेतलेली गुप्त भेट होय. मुख्यमंत्री फडणवीस यांनी यापूर्वी “कोणीही नवीन पक्ष महायुतीत येणार नाही,” असे स्पष्ट केले असले, तरी दिल्लीतील भाजप श्रेष्ठींनी शरद पवारांच्या राष्ट्रवादीला एनडीएमध्ये यायचे असल्यास एक अत्यंत महत्त्वाची अट घातल्याचे सूत्रांकडून समजते.
भाजपची मोठी अट: स्वतंत्र प्रवेशाऐवजी ‘एकत्रित राष्ट्रवादी’ला प्राधान्य
सूत्रांनी दिलेल्या माहितीनुसार, भारतीय जनता पक्षाच्या केंद्रीय नेतृत्वाने शरदचंद्र पवार पक्षाला स्वतंत्रपणे एनडीएमध्ये सामावून घेण्यास स्पष्ट नकार दिला आहे. त्याऐवजी, दिवंगत नेते अजित पवार यांच्या विचारसरणीची राष्ट्रवादी आणि शरद पवारांची राष्ट्रवादी या दोन्ही गटांनी एकत्र यावे आणि एकाच ‘राष्ट्रवादी काँग्रेस पक्षाच्या’ माध्यमातून महायुतीत सामील व्हावे, अशी अट दिल्लीतून घालण्यात आली आहे.
दोन्ही राष्ट्रवादी एकत्र येऊन भाजपसोबत आल्यास, भाजप श्रेष्ठी दोन्ही गटांना केंद्र सरकारमध्ये प्रत्येकी एक मंत्रिपद देण्यास सकारात्मक आहेत. सद्यस्थितीत, शिवसेना (उद्धव बाळासाहेब ठाकरे) पक्षातील ६ खासदारांनी एकनाथ शिंदे यांच्या शिवसेनेत प्रवेश करत आपला स्वतंत्र गट स्थापन केला आहे. त्यामुळे केंद्रीय मंत्रिमंडळ विस्तारात या फुटीर खासदारांपैकी दोघांना मंत्रिपदाची संधी मिळण्याची शक्यता वर्तवली जात आहे. याच विस्तारात एकत्रित राष्ट्रवादीलाही सामावून घेण्याची भाजपची योजना आहे.
जयंत पाटील यांच्याकडे गृहराज्यातील अर्थ खात्याची सूत्रे?
राज्यातील सत्ता समीकरणांबाबतही अनेक तर्कवितर्क लढवले जात आहेत. सध्या राज्याचा अर्थसंकल्प आणि अर्थ खात्याची महत्त्वाची धुरा मुख्यमंत्री देवेंद्र फडणवीस स्वतः सांभाळत आहेत. राजकीय वर्तुळातील चर्चेनुसार, हे अर्थ खाते जयंत पाटील यांना देण्यासाठीच मुख्यमंत्र्यांनी ते सध्या स्वतःकडे ठेवले आहे. जर दोन्ही राष्ट्रवादी एकत्र आल्या, तर जयंत पाटील यांच्याकडे राज्याचे अर्थमंत्रीपद सोपवले जाऊ शकते.
मात्र, या संपूर्ण प्रक्रियेत एक मोठी अडचण निर्माण झाली आहे. राष्ट्रवादी काँग्रेस पक्षाच्या प्रमुख सुनेत्रा पवार यांनी शरद पवारांच्या राष्ट्रवादीला पुन्हा सोबत घेण्यास तीव्र विरोध दर्शवला असल्याची माहिती मिळाली आहे. सुनेत्रा पवार यांच्या या नकारघंट्यामुळे शरद पवारांच्या राष्ट्रवादीचा महायुती आणि एनडीए सरकारमधील प्रवेश सध्या अधांतरी लटकला असल्याचे दिसून येत आहे.
“१५ दिवसांत दोन्ही राष्ट्रवादी एकत्र येतील, सुप्रिया सुळे केंद्रात मंत्री बनतील!” – आमदार रवी राणा
या सर्व राजकीय घडामोडींवर महायुतीचे सहयोगी अपक्ष आमदार रवी राणा यांनी एक अत्यंत खळबळजनक आणि मोठा दावा केला आहे. प्रसारमाध्यमांशी बोलताना रवी राणा म्हणाले, “आजच्या आधुनिक राजकारणामध्ये काहीही अशक्य राहिलेले नाही, ज्या गोष्टी अशक्य वाटतात त्या इथे सहज शक्य होतात. येत्या अवघ्या १५ दिवसांत दोन्ही राष्ट्रवादी काँग्रेस पक्ष पुन्हा एकदा एकत्रित आलेले आपल्याला पाहायला मिळतील. सुनेत्रा पवार आणि शरद पवार यांचे पक्ष एकत्र येतील.”
राणा यांनी पुढे अधिक सविस्तर दावा करताना म्हटले की, “या नवीन समीकरणानुसार, नवी दिल्लीत केंद्र सरकारमध्ये खासदार सुप्रिया सुळे या कॅबिनेट मंत्री बनतील, तर महाराष्ट्र राज्याची संपूर्ण राजकीय सूत्रे सुनेत्रा पवार यांच्या हाती सोपवली जातील.
