Sunetra Pawar : महाराष्ट्राच्या राजकारणात सध्या राष्ट्रवादी काँग्रेस पक्षांतर्गत सुरू असलेल्या सत्तासंघर्षाने आणि धोरणात्मक बदलांनी सर्वांचे लक्ष वेधून घेतले आहे. अजित पवार यांच्या निधनानंतर पक्षाची धुरा सुनेत्रा पवार आणि त्यांच्या दोन्ही पुत्रांनी सावरली असून, संघटनेच्या मुख्य प्रवाहात मोठे फेरबदल होताना दिसत आहेत. या प्रक्रियेत पक्षाचे ज्येष्ठ नेते प्रफुल पटेल आणि सुनील तटकरे या दोन दिग्गजांना दुय्यम स्थान किंवा ‘साईडलाईन’ करण्यात आल्याची चर्चा राजकीय वर्तुळात जोर धरत आहे.
आर्थिक नाड्या सुनेत्रा पवारांच्या हातात
पक्षाच्या नव्या पदाधिकाऱ्यांच्या निवडीनंतर समोर आलेल्या माहितीनुसार, प्रफुल पटेल यांना धोरणात्मक निर्णयांतून काहीसे दूर ठेवून पक्षाच्या सर्व आर्थिक व्यवहारांची आणि तिजोरीची सूत्रे सुनेत्रा पवार यांनी स्वतःच्या हातात घेतली आहेत. विशेष म्हणजे, महत्त्वाच्या समित्यांमधून प्रफुल पटेल यांना डच्चू देण्यात आल्याने सुनेत्रा पवार या पटेल आणि तटकरे यांच्या कार्यपद्धतीवर नाराज असल्याची कुजबुज सुरू होती. या घडामोडींमुळे पक्षात दोन गट पडले आहेत की काय, अशी शंका उपस्थित केली जात आहे.
प्रमोद हिंदुराव-प्रफुल पटेल भेट: मनोमिलनाचे प्रयत्न?
पक्षात सुरू असलेल्या या अंतर्गत धुसफुसीच्या पार्श्वभूमीवर शुक्रवारी एक महत्त्वाची घडामोड घडली. सुनेत्रा पवार यांचे अत्यंत निकटवर्तीय मानले जाणारे नेते प्रमोद हिंदुराव यांनी प्रफुल पटेल यांची भेट घेतली. वरिष्ठ पातळीवर सुरू असलेली नाराजी दूर करण्यासाठी आणि पक्षांतर्गत वाद मिटवण्यासाठी हिंदुराव यांनी ही मध्यस्थी केल्याचे बोलले जात आहे. या भेटीनंतर पक्षात पुन्हा एकदा सर्वकाही पूर्ववत होणार की अंतर्गत कलह अधिक वाढणार, याकडे राजकीय विश्लेषकांचे लक्ष लागले आहे.
शरद पवारांची ‘सिल्व्हर ओक’वरील भेट आणि मिश्किल टिप्पणी
दुसरीकडे, बुधवारी संध्याकाळी सुनील तटकरे यांनी अनपेक्षितपणे शरद पवार यांची त्यांच्या ‘सिल्व्हर ओक’ या निवासस्थानी भेट घेतल्याने चर्चेला उधाण आले. अजित पवारांच्या निधनानंतर दोन्ही राष्ट्रवादी काँग्रेसच्या विलीनीकरणाला पटेल आणि तटकरे यांचा विरोध असल्याची चर्चा होती. मात्र, शरद पवारांनी पत्रकार परिषदेत या दोन्ही नेत्यांचे कौतुक करत सद्यस्थितीवर भाष्य केले. पवार म्हणाले की, “तटकरे आणि पटेल हे अत्यंत क्षमता असणारे नेते आहेत. मी त्यांच्यासोबत काम केले आहे. मात्र, त्यांच्या सद्यस्थितीतील संघटनेत त्यांचा वापर कसा करून घ्यायचा, हा पूर्णपणे त्यांच्या पक्षप्रमुखांचा अधिकार आहे.”
पडद्यामागच्या हालचालींना वेग
शरद पवारांनी या नेत्यांच्या कर्तृत्वाचा गौरव करतानाच, सध्याच्या नेतृत्वाचे (सुनेत्रा पवार) या नेत्यांबद्दलचे आकलन कदाचित वेगळे असावे, असा टोलाही लगावला. प्रफुल पटेल हे २००३ पासून संसदेत आहेत आणि तटकरे यांनी राज्याचे अर्थमंत्री म्हणून काम पाहिले आहे, याची आठवणही पवारांनी करून दिली.
