चेन्नई : वैयक्तिक उपकरणावर (पर्सनल डिव्हाइस) बालकांचे अश्लिल चित्रपट वा अन्य साहित्य (चाइल्ड पोर्नोग्राफी )डाउनलोड करणे आणि पाहणे हा पॉक्सो कायदा आणि आयटी कायद्यानुसार गुन्हा नाही, असे निरीक्षण मद्रास उच्च न्यायालयाने नोंदवले. चाइल्ड पोर्नोग्राफी डाउनलोड करणे आणि पाहणे यासाठी पॉक्सो आणि आयटी कायद्यांतर्गत गुन्हा दाखल करण्यात आलेल्या २८ वर्षीय तरुणाविरुद्ध सुरु असलेला खटला न्यायालयाने रद्द केला.
न्यायालयाने म्हटले की, पॉक्सोच्या कलम १४ (१) अंतर्गत गुन्हा सिद्ध दाखल होण्यासाठी पोर्नोग्राफीत मुलांचा वापर झाला असणे आवश्यक आहे. आरोपीने मुलांचा वापर अश्लील साहित्य बनवण्याच्या उद्देशाने केला असा याचा अर्थ होतो. आरोपीने चाइल्ड पॉर्न कुठे प्रसिद्ध केले किंवा पाठवले तर ते आयटी कायद्याच्या कलम ६७ ब अतंर्गत गुन्ह्यास पात्र आहे. पण जर आरोपी बालकांचे अश्लील साहित्य पाहत असेल तर ते पॉक्सोअंतर्गत किंवा आयटी कायद्यांतर्गत गुन्हा म्हणून ग्राह्य धरता येणार नाही.
या खटलाच्या सुनावणीवेळी न्यायमूर्ती एन आनंद व्यंकटेश यांनी सांगितले की, वैयक्तिक उपकरणावर चाइल्ड पोर्नोग्राफी पाहणे गुन्हा नसून त्याचे प्रसारण करणे हा गुन्हा आहे, चाइल्ड पोर्नोग्राफी पाहणे हे सिगारेट आणि दारू पिण्याच्या व्यसनासारखे आहे. इंटरनेटवर मुबलक प्रमाणात चाइल्ड पोर्नोग्राफी असल्याने लोकांना याचे व्यसन जडत आहे. तरुण पिढी या गंभीर समस्येचा सामना करत आहे, त्यांना शिक्षा करण्याऐवजी समाजाने त्यांना योग्य सल्ला देऊन त्यांचे प्रबोधन करायला हवे.
