Morning Midas Cargo Ship Sinks | मेक्सिकोला 3,000 नवीन गाड्या घेऊन जाणारे ‘मॉर्निंग मिडास’ नावाचे मोठे मालवाहू जहाज उत्तर पॅसिफिक महासागरात अलास्काजवळ बुडाल्याची घटना घडली आहे. काही आठवड्यांपूर्वी या जहाजाला लागलेल्या आगीमुळे ते वाचवणे शक्य झाले नाही. सुदैवाने, जहाजावरील 22 कर्मचाऱ्यांना सुरक्षितपणे वाचवण्यात यश आले व घटनेत कोणालाही दुखापत झाली नाही.
3 जून 2025 रोजी ‘मॉर्निंग मिडस’ अलास्कातील अ‍ॅडॅक बेटापासून प्रवास करत असताना त्याला भीषण आग लागली. आगीचे स्वरूप इतके तीव्र होते की, जहाजावरील 22 कर्मचाऱ्यांना लाईफबोटद्वारे जहाज सोडावे लागले. जवळपास असलेल्या एका व्यापारी जहाजाने या सर्व कर्मचाऱ्यांची सुटका केली. आग लागल्यानंतर जहाज समुद्रात निकामी अवस्थेत होते. अखेरीस, 23 जून रोजी ते अलास्काच्या अ‍ॅलेउशियन बेटांजवळ (Aleutian Islands) आंतरराष्ट्रीय समुद्रातबुडाले.
जहाज बुडालेल्या ठिकाणी पाण्याची खोली सुमारे 16,400 फूट आहे, त्यामुळे जहाज किंवा त्यावरील गाड्या परत मिळवणे जवळपास अशक्य आहे. रिपोर्टनुसार, जहाजावर 70 पूर्णपणे इलेक्ट्रिक गाड्या (electric cars) आणि 680 हायब्रीड गाड्या (hybrid vehicles) होत्या, ज्यांचे आगीमुळे मोठे नुकसान झाले असण्याची शक्यता आहे.
‘मॉर्निंग मिडस’ हे 600 फूट लांब जहाज 26 मे 2025 रोजी चीनच्या यांताई येथून मेक्सिकोच्या दिशेने निघाले होते. 2006 मध्ये बनवलेले हे जहाज लायबेरियन ध्वजाखाली प्रवास करत होते. जहाजावर 350 मेट्रिक टन सागरी वायू तेल आणि 1,530 मेट्रिक टन कमी सल्फर असलेले इंधन तेल होते, ज्यामुळे पर्यावरणीय प्रदूषणाचा धोका निर्माण झाला आहे.
अमेरिकेच्या तटरक्षक दलाने माहिती दिली की, सध्या तेल गळतीमुळे प्रदूषण दिसले नाही. तरीही, तेल सांडण्याच्या शक्यतेसाठी प्रदूषण नियंत्रक उपकरणांनीसुसज्ज असलेली दोन बचाव टगत्या ठिकाणी तैनात आहेत.
