कोल्हापूर- जनभावनांचा आदर करत वनतारा संस्था महादेवी उर्फ माधुरी हत्तीणीला कोल्हापुरात परत पाठवण्यासाठी सकारात्मक आहे, अशी माहिती पालकमंत्री प्रकाश आबिटकर यांनी आज दिली. महादेवीच्या मुद्द्यावर आबिटकर यांच्यासोबत वनतारा संस्थेच्या सीईओंची महत्वपूर्ण बैठक पार पडली. या बैठकीनंतर आबिटकरांनी माध्यमांशी संवाद साधला. जोपर्यंत संपूर्ण कायदेशीर प्रक्रिया पूर्ण होत नाही, तोपर्यंत महादेवीचे परतणे शक्य होणार नाही, असेही आबिटकर यांनी यावेळी स्पष्ट केले.
वनतारा संस्थेच्या सीईओंनी करवीर मठाच्या महास्वामींना स्पष्टपणे सांगितले आहे की, महादेवीला कोल्हापुरातून नेण्याच्या संपूर्ण प्रकरणात वनताराचा कोणताही थेट संबंध नाही. मात्र, कोल्हापूरकरांच्या भावना तीव्र आहेत आणि याचा आदर करून आम्ही महादेवीला परत देण्यास तयार आहोत. मात्र, या हस्तांतरणासाठी आवश्यक असलेल्या सर्व कायदेशीर बाबींची पूर्तता करणे बंधनकारक आहे. यामध्ये सर्वोच्च न्यायालयाचे निर्देश आणि वनविभागाच्या परवानग्यांचा समावेश आहे. ही प्रक्रिया पूर्ण झाल्याशिवाय महादेवीला कोल्हापुरात आणता येणार नाही. त्यामुळे प्रशासकीय पातळीवर या प्रक्रियेला गती देण्याचे प्रयत्न सध्या सुरू आहेत. या चर्चेदरम्यान एका सकारात्मक मुद्द्यावरही चर्चा झाली. वनताराने कोल्हापूर जिल्ह्यातील नांदणी परिसरात आपले एक युनिट सुरू करण्यासंदर्भात सकारात्मकता दर्शवली. हे युनिट सुरू झाले, तर भविष्यात प्राण्यांच्या संगोपनासाठी आणि उपचारांसाठी मोठी सोय उपलब्ध होईल. तसेच महादेवी हत्तीण हा विषय राजकारणाचा नाही, तर भावनांचा आहे. त्यामुळे सर्वांनी एकत्र येऊन सामंजस्याने हा प्रश्न सोडवण्यासाठी प्रयत्न करणे आवश्यक आहे, असेही आबिटकर यांनी नमूद केले.
