Charlie Kirk Death: अमेरिकेतील उजवे कार्यकर्ते आणि माध्यमकर्मी चार्ली कर्क (Charlie Kirk) यांची १० सप्टेंबर रोजी हत्या झाली. युटाह व्हॅली युनिव्हर्सिटीत ते मोठ्या संख्येनं उपस्थित अनुयायांशी संवाद साधत असताना गोळीबाराच्या घटनांवर प्रश्न आला. त्यांनी प्रश्न उडवून लावत उत्तर टाळलं, पण ते गोळी टाळू शकले नाहीत. शूटरनं एकच गोळी झाडली, ती कर्क यांच्या मानेवर लागली. ते जागीच गेले.
अमेरिकेत अत्याधुनिक बंदुका, पिस्तुल, रिव्हॉल्व्हर सहज सुलभ उपलब्ध. त्यामुळे कधीही कुठेही गोळीबार होत असतो. गनकल्चरविरोधात संताप व्यक्त होतो, पण गनलॉबी शस्त्राला लावलेल्या सायलेन्सरसारखं सर्व विरोध विरवून टाकते. अमेरिकेत गोळीबारातील मृत्यू नवे नाहीत, तरीही चार्ली कर्क यांच्या हत्येनंतर मात्र अमेरिकेचे त्या देशातील आणि जगभरातील वास्तूंवरचे, जहाजांवरचे झेंडे अर्ध्यावरच फडकत आहेत. चार्ली सरकारी पदावर नसतानाही तसं का? त्याचं कारण त्यांची डोनाल्ड ट्रम्प यांच्याशी असलेली निकटता. कडवट उजव्या विचारांच्या चार्ली कर्क यांच्यावर कृष्णवर्णीयांचा द्वेष करण्याचीही टीका झाली.
टर्निंग पॉईंट यूएस या संघटनेच्या माध्यमातून ते ट्रम्प यांच्यासाठी एकप्रकारे राजकीय वातावरण निर्मिती करत असत. त्यामुळेच ट्रम्प यांनी अध्यक्षीय अधिकारांचा वापर करत कर्क यांच्या मृत्यूचा दुखवटा जाहीर करत अमेरिकन ध्वज अर्ध्यावर फडकवण्याचा आदेश जारी केला. हे होते चार्ली कर्क यांचं अमेरिकेतील महत्व! गोळीबार करणाऱ्या मारेकऱ्याने लक्ष्य कर्क यांना केलं असलं, तरी धक्का ट्रम्प यांनाच दिला आहे, असं म्हटलं तर वावगं ठरू नये!
चार्ली कर्क यांच्या हत्येमुळे अमेरिकेत खळबळ उडणे स्वाभाविकच होते. त्यांची हत्या अमेरिकेचे राष्ट्राध्यक्ष डोनाल्ड ट्रम्प यांच्यासाठी मोठा धक्का मानला जातो. चार्ली कर्क ट्रम्प यांचे खूप जवळचे सहकारी होते. त्यांनी तरुण मतदारांना प्रभावित करण्यात महत्त्वाची भूमिका बजावली. इतकेच नाही तर ट्रम्प यांच्या दुसऱ्या विजयात त्यांनी मोठी भूमिका बजावली. सध्या एफबीआयने संशयिताला ताब्यात घेतले आहे.
चार्ली कर्क यांचे विचार वादग्रस्त असल्याने तपासात राजकीय वैमनस्य असल्याचा संशय आहे. डोनाल्ड ट्रम्प यांनी चार्ली कर्क यांची हत्या ही अमेरिकेसाठी काळी वेळ असल्याचं म्हटले आहे. डाव्या कडवट विचारसरणीला त्यांनी हत्येसाठी दोष दिला आहे.
ट्रम्प यांचे आवडते, लोकप्रिय पण वादग्रस्तही चार्ली कर्क!
- टर्निंग पॉइंटचे अध्यक्ष चार्ली कर्क हे अमेरिकेतील लोकप्रिय पण वादग्रस्त व्यक्तिमत्व
- चार्ली कर्कच्या एक्स अकाउंटवर ५३ लाख फॉलोअर्स आहेत.
- दरमहा ५ लाखांहून अधिक श्रोते त्यांच्या ‘द चार्ली कर्क शो’ या रेडिओ कार्यक्रमाच्या पॉडकास्टला नियमित ऐकत.
- त्यांनी ‘टाइम फॉर अ टर्निंग पॉइंट’ आणि ‘द कॉलेज स्कॅम’ यासह अनेक पुस्तके लिहिली किंवा त्यात योगदान दिले.
- कर्क यांच्या पश्चात त्यांची पत्नी एरिका आहे, जी माजी मिस अ‍ॅरिझोना यूएसए सौंदर्य स्पर्धा विजेती आहे.
चार्ली कर्क डोनाल्ड ट्रम्प यांचे आवडते का?
- ३१ वर्षीय चार्ली कर्क हे एक प्रमुख उजव्या विचारसरणीचे कार्यकर्ते होते.
- कर्क हे डोनाल्ड ट्रम्प यांचे कट्टर समर्थक होते.
- २०२४ च्या निवडणुकीत ते त्यांच्या कोअर टीमचा भाग होते.
- ते डोनाल्ड ट्रम्प यांच्या इतके जवळचे होते की ते कर्कना तरुणांचे हृदय समजून घेणारी व्यक्ती संबोधत असत.
- चार्ली कर्क यांची तरुणाईवर असलेली चांगली पकड हे त्याचं कारण.
- कर्क हे इस्रायलचेही कडवट समर्थक होते.
- इस्रायलचे पंतप्रधान बेंजामिन नेतान्याहू यांनी कर्कचे वर्णन ‘इस्रायलचे सिंह-हृदयी मित्र’ असे केले होते.
ट्रम्पसाठी हा कसा मोठा धक्का आहे?
- चार्ली कर्क हे डोनाल्ड ट्रम्प यांच्या राजकीय प्रचार मोहिमांचा एक महत्त्वाचा भाग होते.
- डोनाल्ड ट्रम्प यांनी शोक व्यक्त करताना जे म्हटलं, ते महत्वाचं, “देशातील तरुणांचे हृदय चार्लीपेक्षा चांगले कोणीही समजू शकत नाही. कर्क हे सर्वांचे आवडते होते, विशेषतः माझे.”
- कर्क यांनी ट्रम्प यांना तरुण मतदारांशी जोडण्यास मदत केली होती.
- त्यांच्या निधनाने रिपब्लिकन पक्षात एक पोकळी निर्माण झाली आहे.
- टर्निंग पॉइंट यूएसए आता त्याच्या संस्थापकांशिवाय कसं कार्यरत राहणार, हा मोठा प्रश्न आहे.
- कर्क नसण्याचा ट्रम्प यांच्या २०२८ च्या निवडणूक रणनीतीवर परिणाम होऊ शकतो.
हे देखील वाचा –
