Kurla Warehouse Fire: कुर्ल्यातील (Kurla) सीएसटी मार्गावर ऑटोमोबाईल्सच्या(Auto mobaile) सुट्या भागांचा साठा असलेल्या गाळ्याला आग लागल्याची दुर्देवी घटना रविवारी मध्यरात्री घडली. जवजवळ रात्रभर ही आग विझवण्याचे शर्थीचे प्रयत्न सुरू होते. मात्र पहाटे हि आग जास्तच भडकल्याने आजूबाजूचे २० गाळे देखील या आगीत(Fire) जळून खाक झाले. या आगीत कोणत्याही प्रकारची जीवितहानी झाली नाही. मात्र मोठ्या प्रमाणावर ह्या ठिकाणी वित्तहानी झाली आहे.
कुर्ला (पश्चिम), सीएसटी रोड कपाडिया नगर येथील गुरुद्वारा परिसरात वाहनांचे सुटे भाग, टायर, विद्युत वाहिन्या, विद्युत उपकरणे, भंगार सामान आणि इतर साहित्य इत्यादींचा मोठा साठा असलेले अंदाजे ३००० चौरस फूट क्षेत्रफळाचे बैठे, एकमजली गाळे आहेत. या गाळ्यांपैकीच एका गाळ्यात मध्यरात्री २.३० वाजता आग लागल्याची दुर्दैवी घटना घडली.अंदाजे १५ ते २० गाळ्यांमध्ये ही आग पसरल्याचे माहिती आहे. ही आग टायर, विद्युत वाहिन्यांचा साठा, विजेच्या उपकरणांचा साठा, भंगार सामान आणि इतर ज्वलनशील साहित्यांमुळे भडकली आणि पसरली असल्याचा प्राथमिक अंदाज आहे.
परिणामी हे गाळे संपूर्णरित्या जळून खाक झाले. या आगीत मोठ्या प्रमाणात वित्त हानी झाल्याची माहिती आहे. भीषण आगीची माहिती मिळताच स्थानिक पोलिस तसेच अग्निशमन दलाच्या जवानांनी तत्काळ घटनास्थळी धाव घेतली आहे. आणि त्यांनी युद्धपातळीवर आग विझविण्याचे काम हाती घेतले. तसेच, गाळ्यांना लागलेल्या आगीची माहिती मिळताच गाळेधारक, मालकांनी तत्काळ घटनास्थळ गाठलं. मात्र तोपर्यंत उशीर झाला होता, बघ्यांनी एकच गर्दी केली.
दरम्यान, आगीची भीषणता पाहता अग्निशमन दलाच्या जवानांनी मध्यरात्री २.४३ वाजता आग स्तर – १ आल्याचे सांगितले होते, त्यानंतर मध्यरात्री २.५७ वाजता आग स्तर – २ ची असल्याचे देखील जाहीर केले.
अग्निशमन दलाच्या जवानांनी अथक प्रयत्न करून आगीवर ४ फायर इंजिन, १० जंबो वॉटर टँकर या सहाय्याने या भीषण आगीवर तब्बल पाच तासांनी नियंत्रण मिळविले आणि सकाळी ७.२४ वाजता आग संपूर्णपणे वीजवण्यात त्यांना यश आले.
दरम्यान, ही आग का आणि कशी लागली, या आगीचे नेमके कारण काय याबाबत स्थानिक पोलीस, अग्निशमन दलाचे जवान हे अधिकचा तपास करत आहेत. मात्र कुर्ला परिसरात असलेल्या या गाळ्यांना वारंवार आग लागण्याच्या घटना घडतच आहेत.
हे देखील वाचा –
Blue-Flag Certification: ‘ब्लू फ्लॅग मानांकना’चा दर्जा राज्यातील ५ समुद्रकिनाऱ्यानां..
