Sonia Gandhi BJP Candidate: निवडणुकीत विजय मिळवण्यासाठी राजकीय पक्ष कोणती खेळी खेळतील सांगता येत नाही. आता चक्क भाजपच्या तिकिटावर सोनिया गांधी निवडणुकीसाठी उभ्या राहिल्या आहेत. हो, तुम्ही वाचले ते खरे आहे. काँग्रेस (Congress) पक्षाच्या ज्येष्ठ नेत्या सोनिया गांधी यांच्या नावाशी साम्य असलेल्या एका उमेदवाराने केरळमधीलपंचायत निवडणूक लढवण्यासाठी कंबर कसली आहे.
सर्वात विशेष म्हणजे, या ‘सोनिया गांधीं’ना भारतीय जनता पक्षाने (BJP) तिकीट दिले आहे. या अजब योगायोगामुळे मुन्नारच्या (Munnar) राजकीय वर्तुळात मोठी उत्सुकता निर्माण झाली आहे.
रिपोर्टनुसार, भाजपने मुन्नारमधील स्थानिक पंचायत निवडणुकीत नल्लाथन्नी वॉर्ड (वॉर्ड 16) साठी 34 वर्षीय सोनिया गांधी यांना आपला उमेदवार म्हणून उभे केले आहे.
नाव काँग्रेसचे, राजकारण भाजपचे
भाजपच्या या सोनिया गांधी यांचा जीवनप्रवास आणि राजकारणाचा मार्ग काँग्रेस नेत्या सोनिया गांधी यांच्यापेक्षा पूर्णपणे वेगळा आहे.
सोनिया यांचे दिवंगत वडील दुरे राज हे स्थानिक कामगार आणि काँग्रेसचे नेते होते. काँग्रेस अध्यक्षांच्या नावाचे कौतुक म्हणून त्यांनी आपल्या नवजात मुलीचे नाव सोनिया ठेवले होते.
सोनिया यांच्या लग्नानंतर मात्र परिस्थितीत बदल झाला. त्यांचे पती सुभाष हे भाजपचे पंचायत सरचिटणीस आहेत आणि त्यांनी यापूर्वी ओल्ड मुन्नार मुळक्काडमधून पोटनिवडणूकही लढवली होती. हळूहळू सोनिया प्रभू यांनीही भाजपच्या विचारधारेला स्वीकारले. आता त्या पहिल्या मोठ्या निवडणुकीच्या रिंगणात उतरल्यामुळे, लोकांची उत्सुकता वाढली आहे.
या वॉर्डात त्यांचे प्रतिस्पर्धी काँग्रेसच्या मंजुला रमेश आणि CPI(M) च्या वलारमती या आहेत. म्हणजे, मुन्नारमध्ये भाजपच्या उमेदवार, ज्यांचे नाव काँग्रेसच्या सर्वात ज्येष्ठ नेत्याच्या नावावर आहे, त्या थेट काँग्रेसच्या उमेदवाराला आव्हान देत आहेत.
केरळमधील स्थानिक स्वराज्य संस्था निवडणुका
केरळमध्ये पंचायत आणि स्थानिक स्वराज्य संस्थांच्या निवडणुका 9 आणि 11 डिसेंबर अशा दोन टप्प्यांमध्ये होणार आहेत.
निवडणूक संरचना: या निवडणुका राज्याच्या 941 ग्रामपंचायती, 152 ब्लॉक (Block) पंचायती, 14 जिल्हा पंचायती, 87 नगरपालिका आणि 6 कॉर्पोरेशन्समध्ये होणार आहेत.
मतमोजणी: राज्य निवडणूक आयोगाच्या देखरेखीखाली या निवडणुका पार पडतील आणि मतमोजणी 13 डिसेंबर रोजी होणार आहे.
भाजपच्या सोनिया गांधी या लेफ्ट डेमोक्रॅटिक फ्रंट (LDF), युनायटेड डेमोक्रॅटिक फ्रंट (UDF) आणि नॅशनल डेमोक्रॅटिक अलायन्स (NDA) सह प्रमुख राजकीय आघाड्यांचे प्रतिनिधित्व करणाऱ्या 21,000 हून अधिक वॉर्डांसाठी निवडणूक लढवणाऱ्या 75,000 हून अधिक उमेदवारांपैकी एक आहेत.
सोनिया गांधींचे नाव भाजपला मदत करेल की मतदारांमध्ये गोंधळ निर्माण करेल, हे पाहणे महत्त्वाचे ठरेल. परंतु, या पंचायत निवडणुकीमुळे मुन्नारला एक अविस्मरणीय गोष्ट नक्कीच मिळाली आहे.
हे देखील वाचा – Sanchar Saathi App : ‘संचार साथी’ ॲप काय आहे? जे सरकार स्मार्टफोनमध्ये प्री-इंस्टॉल करण्यास सांगत आहे; जाणून घ्या
