Maharashtra Municipal Election : महाराष्ट्रातील प्रमुख शहरांमध्ये महानगरपालिका निवडणुकीची रणधुमाळी सुरू आहे. येत्या 15 जानेवारी रोजी होणाऱ्या मतदानासाठी आणि 16 जानेवारीला होणाऱ्या मतमोजणीसाठी प्रशासनाने जय्यत तयारी केली आहे.
मतदानाचा टक्का वाढवण्यासाठी आणि कायदा व सुव्यवस्था राखण्यासाठी शाळा, बँका, शेअर बाजार आणि मद्यविक्रीबाबत सरकारने महत्त्वपूर्ण निर्णय घेतले आहेत.
शाळांना किती दिवस सुट्टी असणार?
मतदानाची प्रक्रिया सुरळीत पार पाडण्यासाठी राज्यातील बहुतांश सरकारी आणि खाजगी शाळा 15 जानेवारी रोजी बंद राहतील. अनेक शाळांच्या इमारतींचा वापर मतदान केंद्र म्हणून केला जाणार आहे, त्यामुळे 14 जानेवारीपासूनच या इमारती निवडणूक आयोगाच्या ताब्यात दिल्या जातील.
तसेच, शिक्षक आणि शिक्षकेतर कर्मचाऱ्यांची नियुक्ती निवडणूक कर्तव्यावर करण्यात आल्यामुळे या काळात नियमित शैक्षणिक कामकाज होणार नाही.
शेअर बाजारात व्यवहारांना ब्रेक
मुंबई ही देशाची आर्थिक राजधानी असल्याने मतदानाच्या दिवशी शेअर बाजारही बंद ठेवण्याचा निर्णय घेण्यात आला आहे. भारतीय शेअर बाजार म्हणजेच नॅशनल स्टॉक एक्सचेंज (NSE) आणि बॉम्बे स्टॉक एक्सचेंज (BSE) मध्ये 15 जानेवारी रोजी कोणतेही व्यवहार होणार नाहीत.
शहरात 4 दिवस ‘ड्राय डे’चे सावट
निवडणुकीच्या काळात शांतता राखण्यासाठी राज्य उत्पादन शुल्क विभागाने कडक पावले उचलली आहेत. त्यानुसार शहरात सलग 4 दिवस ‘ड्राय डे’ पाळला जाणार आहे. 13 जानेवारी ते 16 जानेवारी (मतमोजणी संपेपर्यंत) सर्व मद्यविक्रीची दुकाने, परमिट रूम आणि बिअर बार बंद राहतील. या नियमाचे उल्लंघन करणाऱ्यांवर कडक कायदेशीर कारवाई करण्याचा इशारा प्रशासनाने दिला आहे.
जबाबदार नागरिक म्हणून मतदानाचे आवाहन
महानगरपालिका निवडणुका म्हणजे नागरी लोकशाहीचा कणा आहे. शाळा, बाजार आणि इतर आस्थापना बंद ठेवण्यामागचा मुख्य उद्देश हाच आहे की, प्रत्येक पात्र मतदाराला आपल्या मतदानाचा हक्क बजावता यावा. 15 जानेवारी रोजी सकाळी 7 वाजल्यापासून मतदानाला सुरुवात होईल. लोकशाही अधिक बळकट करण्यासाठी सर्व नागरिकांनी मोठ्या संख्येने बाहेर पडून मतदान करावे, असे आवाहन प्रशासनाकडून करण्यात आले आहे.
हे देखील वाचा – Raj Thackeray: “अण्णामलाई म्हणतात मुंबई महाराष्ट्राची नाही, तरी फडणवीस खोटं बोलतायेत!”; ठाण्यात राज ठाकरेंनी पुन्हा लावला ‘तो’ व्हिडीओ
