Ajit Pawar Plane Crash : महाराष्ट्र राज्याचे उपमुख्यमंत्री आणि जनसामान्यांचे नेते अजित पवार यांचे जिल्हा परिषद निवडणुकांच्या प्रचार दौऱ्यावर असताना विमान अपघातात अकाली निधन झाले. या हृदयद्रावक घटनेमुळे संपूर्ण राज्यासह देशाच्या राजकीय वर्तुळावर शोककळा पसरली आहे. आपल्या हक्काचा आणि धाडसी नेता गमावल्याची भावना सर्वसामान्य जनतेमध्ये असून, प्रशासकीय यंत्रणाही या धक्क्याने सुन्न झाली आहे. अजित पवारांचे पार्थिव उद्या बारामती येथील विद्या प्रतिष्ठानच्या मैदानावर अंत्यदर्शनासाठी ठेवले जाणार असून, सकाळी ११ वाजता त्यांच्यावर शासकीय इतमामात अंत्यसंस्कार करण्यात येतील.
पंतप्रधान मोदी आणि अमित शाह यांची उपस्थिती
अजित पवारांसारख्या कतृत्त्ववान नेत्याला अखेरचा निरोप देण्यासाठी देशाचे पंतप्रधान नरेंद्र मोदी आणि केंद्रीय गृहमंत्री अमित शाह उद्या बारामतीत उपस्थित राहणार आहेत. पंतप्रधानांनी या निधनाचे वृत्त समजताच ज्येष्ठ नेते शरद पवार यांना दूरध्वनीवरून संपर्क साधून त्यांचे सांत्वन केले. या संकटसमयी संपूर्ण देश पवार कुटुंबाच्या पाठीशी खंबीरपणे उभा असल्याचे त्यांनी आवर्जून नमूद केले.
पंतप्रधानांची भावपूर्ण श्रद्धांजली: “जनतेचा नेता हरपला”
पंतप्रधान नरेंद्र मोदी यांनी सोशल मीडियाद्वारे (X) अजित पवार यांना अत्यंत गौरवपूर्ण शब्दांत श्रद्धांजली वाहिली. ते म्हणाले की, “अजित पवार हे खऱ्या अर्थाने जनतेचे नेते होते. तळागाळातील लोकांशी असलेले त्यांचे घनिष्ठ संबंध आणि महाराष्ट्राच्या सर्वांगीण विकासासाठी असलेली त्यांची तळमळ अद्वितीय होती. प्रशासकीय विषयांवरील त्यांची पकड आणि दुर्बल घटकांना सक्षम करण्याची त्यांची जिद्द वाखाणण्याजोगी होती. त्यांचे असे अचानक जाणे हे केवळ महाराष्ट्राचेच नव्हे, तर देशाचे मोठे नुकसान आहे.”
शरद पवारांकडून घटनास्थळाची पाहणी
अजित पवारांच्या अपघाताची वार्ता समजताच दिल्लीत असलेले ज्येष्ठ नेते शरद पवार तातडीने बारामतीत दाखल झाले. हेलिकॉप्टरमधून उतरताच त्यांनी थेट अपघातस्थळाची आणि परिस्थितीची माहिती घेतली. वयाचा विचार न करता आपल्या पुतण्याच्या निधनाचे दुःख पचवून ते कुटुंबाला सावरताना दिसत आहेत. या दुःखद प्रसंगी राज्यातील सर्वपक्षीय नेत्यांनी आपले राजकीय मतभेद विसरून पवार कुटुंबाप्रति आपल्या संवेदना व्यक्त केल्या आहेत.
अंत्यविधीची तयारी आणि सुरक्षा व्यवस्था
बारामती येथील विद्या प्रतिष्ठानच्या मैदानावर अंत्यविधीची तयारी युद्धपातळीवर सुरू आहे. पंतप्रधान आणि गृहमंत्र्यांच्या दौऱ्याच्या पार्श्वभूमीवर शहरात कडेकोट सुरक्षा व्यवस्था तैनात करण्यात आली आहे. अजितदादांना अखेरचा निरोप देण्यासाठी राज्याच्या कानाकोपऱ्यातून लाखो कार्यकर्ते बारामतीकडे येत असून, संपूर्ण शहर आपल्या लाडक्या नेत्याच्या आठवणीने व्याकुळ झाले आहे. उद्या सकाळी ११ वाजता हा महाराष्ट्राचा लाडका लोकनेता अनंतात विलीन होईल.
