Agni-3 Missile Test: भारतीय संरक्षण दलाने ओडिसाच्या चांदीपूर येथील तळावरून ‘अग्नी-3’ या मध्यम पल्ल्याच्या बॅलिस्टिक क्षेपणास्त्राची यशस्वी चाचणी घेतली. स्ट्रॅटेजिक फोर्सेस कमांडच्या देखरेखीखाली करण्यात आलेल्या या चाचणीने क्षेपणास्त्राची विश्वासार्हता आणि तांत्रिक क्षमता पुन्हा एकदा सिद्ध केली आहे.
संरक्षण मंत्रालयाची माहिती
संरक्षण मंत्रालयाने दिलेल्या माहितीनुसार, या चाचणीदरम्यान क्षेपणास्त्राच्या सर्व कार्यान्वित आणि तांत्रिक निकषांची पडताळणी करण्यात आली. ही चाचणी भारतीय लष्कराच्या धोरणात्मक तयारीचा एक भाग होती. अग्नी-3 च्या यशामुळे भारताच्या अण्वस्त्र वाहून नेण्याच्या क्षमतेत मोठी वाढ झाली आहे.
अग्नी मालिकेची ताकद
भारताकडे सध्या अग्नी मालिकेतील विविध पल्ल्याची क्षेपणास्त्रे उपलब्ध आहेत:
- अग्नी-1: 700 किमी पर्यंत मारक क्षमता.
- अग्नी-2: 2,000 किमी पर्यंत मारक क्षमता.
- अग्नी-3: 3,000 किमी पर्यंत मारक क्षमता.
- अग्नी-4: 4,000 किमी पर्यंत मारक क्षमता.
- अग्नी-5: 5,000 किमी पेक्षा जास्त पल्ल्यासह सर्वात लांब पल्ल्याचे क्षेपणास्त्र.
ब्रह्मोस आणि अग्नीची जुळवाजुळव
भारतीय संरक्षण प्रणालीमध्ये ३० किमी पासून ५,००० किमी पर्यंतचे कोणतेही लक्ष्य उद्ध्वस्त करण्याची क्षमता निर्माण झाली आहे. ३० ते ३०० किमी अंतरासाठी ‘ब्रह्मोस’ हे क्रूझ क्षेपणास्त्र प्रभावी ठरते, तर ३०० किमीच्या पुढील लांब पल्ल्याच्या लक्ष्यांसाठी ‘अग्नी’ मालिका तैनात आहे.
विशेष म्हणजे, अग्नी-1 क्षेपणास्त्र कमीत कमी २२० किमी अंतरावरील लक्ष्यावरही मारा करू शकते, जे पृथ्वी मालिकेतील क्षेपणास्त्रांच्या रेंजला पर्याय ठरू शकते. जरी लष्कराने अग्नी-1 च्या काही आवृत्त्यांना नकार दिला असला, तरी अनेक मित्र देशांनी हे तंत्रज्ञान भारताकडून आयात करण्यात रस दाखवला आहे. या यशामुळे जागतिक संरक्षण बाजारपेठेत भारताची प्रतिमा अधिक उंचावली आहे.
