Gen MM Naravane Book: भारतीय लष्कराचे माजी प्रमुख जनरल मनोज मुकुंद नरवणे यांच्या ‘Four Stars of Destiny’ या आत्मचरित्रावरून सध्या देशात मोठे राजकीय वादळ उठले आहे. या सर्व वादावर अखेर जनरल नरवणे यांनी आपली अधिकृत भूमिका स्पष्ट केली आहे.
त्यांनी सोशल मीडिया प्लॅटफॉर्मवर प्रकाशक पेंग्विन रँडम हाऊस इंडियाचे निवेदन शेअर करत, “सध्याची स्थिती ही आहे,” असे लिहीत मौन सोडले आहे.
प्रकाशकाचा मोठा खुलासा
पेंग्विन रँडम हाऊसने या प्रकरणावर दोनदा स्पष्टीकरण दिले आहे. त्यांच्या मते, या पुस्तकाच्या प्रकाशनाचे सर्व हक्क केवळ त्यांच्याकडेच आहेत. अद्याप हे पुस्तक छापले गेलेले नाही किंवा त्याची कोणतीही डिजिटल प्रत (PDF) अधिकृतपणे वितरित करण्यात आलेली नाही.
प्रकाशकांनी इशारा दिला आहे की, सोशल मीडियावर किंवा इतर प्लॅटफॉर्मवर या पुस्तकाचा जो काही मजकूर फिरत आहे, तो पूर्णपणे अनधिकृत असून ते कॉपीराइट नियमांचे उल्लंघन आहे. अशा प्रकरणांत कायदेशीर मार्ग स्वीकारला जाईल, असेही त्यांनी ठणकावून सांगितले आहे. यावरच नरवणे यांनी प्रतिक्रिया देत पुस्तक अद्याप प्रकाशित झाले नसल्याचे म्हटले आहे.
दिल्ली पोलिस ॲक्शन मोडमध्ये
दुसरीकडे, दिल्ली पोलिसांनी या प्रकरणी एफआयआर (FIR) दाखल केला आहे. सोशल मीडियावर अनधिकृतपणे पीडीएफ फिरू लागल्याने आणि संरक्षण मंत्रालयाची परवानगी मिळण्यापूर्वीच मजकूर लीक झाल्याने हे पाऊल उचलण्यात आले आहे. दिल्ली पोलिसांच्या स्पेशल सेलकडून या लीकचा स्त्रोत शोधण्याचे काम सुरू आहे. काही ऑनलाईन मार्केटिंग प्लॅटफॉर्मवर हे पुस्तक विक्रीसाठी उपलब्ध असल्याचे दाखवण्यात आले होते, जे दिशाभूल करणारे असल्याचे तपासात समोर आले आहे.
संसदेत राजकीय ठिणगी
या वादाला राजकीय वळण तेव्हा लागले जेव्हा काँग्रेस नेते राहुल गांधी यांनी संसदेच्या परिसरात या पुस्तकाची एक प्रत दाखवली. यावरून लोकसभा अधिवेशनात मोठा गदारोळ झाला आणि गोंधळ घातल्याप्रकरणी 8 खासदारांना निलंबित करण्यात आले. राहुल गांधी यांनी असा दावा केला आहे की, हे पुस्तक अस्तित्वात आहे आणि सरकार याला घाबरत आहे. यावर संरक्षण मंत्री राजनाथ सिंह यांनी संसदेत स्पष्ट केले की, या पुस्तकासाठी आवश्यक असलेली परवानगी अद्याप दिलेली नाही.
प्रकाशन प्रक्रियेतील फरक
गोंधळ दूर करण्यासाठी प्रकाशकांनी स्पष्ट केले की, पुस्तकाची घोषणा होणे, प्री-ऑर्डरसाठी उपलब्ध असणे आणि प्रत्यक्षात प्रकाशित होणे या तीन वेगवेगळ्या गोष्टी आहेत. ‘Four Stars of Destiny’ अद्याप प्रकाशन आणि विक्रीच्या टप्प्यावर पोहोचलेले नाही. लष्करी अधिकाऱ्यांच्या पुस्तकांना संरक्षण मंत्रालयाची मंजुरी अनिवार्य असते, जी प्रक्रिया सध्या सुरू आहे.
