Narhari Zirwal : राज्याचे अन्न व औषध प्रशासन मंत्री नरहरी झिरवाळ यांच्या मंत्रालयातील दालनात लाचलुचपत प्रतिबंधक विभागाने (ACB) मोठी कारवाई केली आहे. या कारवाईत कार्यालयातील दोन कर्मचाऱ्यांना ताब्यात घेण्यात आले असून, यामुळे राजकीय वर्तुळात मोठी खळबळ उडाली आहे. मंत्रालयातील लिपिक राजेंद्र ढेरंग याने एका कामासाठी ५० हजार रुपयांच्या लाचेची मागणी केली होती. त्यापैकी ३५ हजार रुपयांचा पहिला हप्ता स्वीकारताना ‘एसीबी’ने त्याला रंगेहात पकडले.
सध्या दिल्ली दौऱ्यावर असलेल्या नरहरी झिरवाळ यांनी या प्रकरणावर आपली भूमिका स्पष्ट केली आहे. माध्यमांशी बोलताना ते म्हणाले की, “मी गेल्या दोन दिवसांपासून अधिकृत कामासाठी दिल्लीत आहे. माझ्या कार्यालयात जो प्रकार घडला, तो अत्यंत दुर्दैवी आणि चुकीचा आहे. मुळात राजेंद्र ढेरंग हे अन्न व नागरी पुरवठा विभागाचे कर्मचारी असून, त्यांना केवळ उसनवारीवर (Deputation) या विभागात घेण्यात आले होते. सुनावणीशी संबंधित कागदपत्रे तयार करण्याची जबाबदारी त्यांच्याकडे होती. मात्र, त्यांनी केलेले हे कृत्य समर्थनीय नाही.”
झिरवाळ यांनी पुढे ठामपणे सांगितले की, भ्रष्टाचाराच्या अशा कोणत्याही प्रकरणाला ते पाठीशी घालणार नाहीत. संबंधित कर्मचाऱ्याच्या पूर्वेतिहासाबद्दल विचारले असता त्यांनी स्पष्ट केले की, “यापूर्वी या कर्मचाऱ्याविरोधात कोणतीही तक्रार माझ्यापर्यंत आली नव्हती. लाचेची रक्कम कितीही असो, शासकीय सेवेत असताना अशा प्रकारचे गैरकृत्य करणे हा गंभीर गुन्हा आहे. आता कायद्यानुसार कारवाई होईल आणि संबंधित व्यक्तीला आपल्या कृत्याची शिक्षा भोगावीच लागेल.” या कारवाईमुळे मंत्रालयातील भ्रष्टाचाराचा मुद्दा पुन्हा एकदा ऐरणीवर आला असून, पारदर्शक कारभाराच्या गप्पा मारणाऱ्या यंत्रणेवर प्रश्नचिन्ह उपस्थित केले जात आहेत.
गेल्या काही दिवसांपासून राजकीय वर्तुळात सुरू असलेल्या विविध प्रकरणांवरून विरोधकांनी सत्ताधाऱ्यांची कोंडी करण्याचा प्रयत्न सुरू केला आहे. या पार्श्वभूमीवर, राज्याचे विधानसभा उपाध्यक्ष आणि ज्येष्ठ नेते नरहरी झिरवाळ यांनी आपली भूमिका अत्यंत स्पष्ट आणि ठामपणे मांडली आहे. “माझ्यावर होणाऱ्या आरोपांमध्ये तथ्य असेल आणि भ्रष्टाचाराचे धागेदोरे माझ्यापर्यंत पोहोचत असल्याचे सिद्ध झाले, तर मी नैतिक जबाबदारी स्वीकारून तात्काळ राजीनामा देईन,” असे विधान त्यांनी प्रसारमाध्यमांशी बोलताना केले.
आरोपांचे खंडन आणि नैतिकतेची भूमिका
विरोधकांकडून सातत्याने होत असलेल्या आरोपांबाबत विचारले असता झिरवाळ म्हणाले की, सार्वजनिक जीवनात काम करताना पारदर्शकता महत्त्वाची असते. कोणत्याही गैरव्यवहाराशी किंवा भ्रष्टाचाराशी माझा दुरान्वयेही संबंध नाही. मात्र, जर कोणी हे आरोप पुराव्यानिशी सिद्ध करू शकले, तर मी पदाला चिटकून राहणार नाही. तपासात माझे नाव निष्पन्न झाल्यास त्याची संपूर्ण जबाबदारी स्वीकारण्याची माझी तयारी आहे, असेही त्यांनी यावेळी आवर्जून नमूद केले.
‘कट-कारस्थाना’च्या चर्चांना पूर्णविराम
उपमुख्यमंत्री सुनेत्रा पवार यांचे पद आणि पक्षांतर्गत विलीनीकरणाच्या मुद्द्यावर झिरवाळ यांनी घेतलेल्या भूमिकेमुळे त्यांच्याविरुद्ध कट रचला जात असल्याची चर्चा राजकीय वर्तुळात रंगली होती. या संशयाबाबत विचारले असता त्यांनी अत्यंत संयमी उत्तर दिले. “माझ्या विरोधात कोणी कट रचत आहे, असे मला मुळीच वाटत नाही. माझा स्वभाव कोणाशीही वैर धरण्याचा किंवा कोणाविरुद्ध कारस्थान करण्याचा नाही. त्यामुळे माझ्यावर अन्याय करण्यासाठी कोणीतरी जाणीवपूर्वक चक्रव्यूह रचत असल्याच्या चर्चांमध्ये कोणतेही तथ्य नाही,” असे सांगत त्यांनी या वादावर पडदा टाकला.
स्पष्टवक्तेपणावर भर
नरहरी झिरवाळ यांनी यावेळी आपल्या कार्यशैलीचा पुनरुच्चार केला. त्यांनी स्पष्ट केले की, लोकहिताच्या मुद्द्यांवर आपली भूमिका मांडणे हे लोकप्रतिनिधीचे कर्तव्य आहे आणि त्यामध्ये कोणत्याही राजकीय आकसाचा प्रश्न उद्भवत नाही. विरोधकांच्या टीकेला उत्तर देण्यापेक्षा कामातून सिद्ध करण्यावर आपला भर असल्याचे त्यांनी यावेळी सूचित केले.
नेमकं प्रकरण काय?
एका औषध विक्रेत्याचा निलंबित झालेला परवाना पुन्हा सुरू करून देण्यासाठी ५० हजार रुपयांची मागणी करणाऱ्या लिपिकाला लाचलुचपत प्रतिबंधक विभागाने (ACB) रंगेहाथ पकडले आहे. राजेंद्र ढेरंगे असे या अटक करण्यात आलेल्या लिपिकाचे नाव असून, या कारवाईमुळे संबंधित शासकीय कार्यालयात एकच खळबळ उडाली आहे.
लाचेची मागणी आणि सापळा-
मिळालेल्या माहितीनुसार, तक्रारदार औषध दुकानदाराचा व्यवसाय परवाना काही कारणास्तव प्रशासनाकडून निलंबित करण्यात आला होता. हा परवाना पुन्हा कार्यान्वित करून देण्यासाठी लिपिक राजेंद्र ढेरंगे यांनी ५० हजार रुपयांच्या लाचेची मागणी केली होती. या प्रकरणी तक्रारदाराने लाचलुचपत प्रतिबंधक विभागाकडे रीतसर तक्रार नोंदवली. प्राप्त तक्रारीची शहानिशा केल्यानंतर, विभागाने सापळा रचला आणि तडजोडीअंती ठरलेली ३५ हजार रुपयांची पहिली हप्ता स्वरूपातील रक्कम स्वीकारताना ढेरंगे यांना रंगेहाथ ताब्यात घेतले.
अटकेनंतर वरिष्ठ अधिकाऱ्याचे नाव आले समोर-
एसीबीने केलेल्या चौकशीदरम्यान ढेरंगे यांनी या प्रकरणात ‘गाडे’ नामक व्यक्तीचा सहभाग असल्याचे कबूल केले आहे. या माहितीमुळे तपासाची व्याप्ती वाढली असून, लाचेच्या या साखळीत आणखी कोणा मोठ्या अधिकाऱ्याचा हात आहे का, याचा शोध आता पोलीस घेत आहेत. ढेरंगे यांच्या कबुलीमुळे संबंधित विभागात खळबळ माजली असून, गाडे यांचीही चौकशी होण्याची दाट शक्यता वर्तवण्यात येत आहे.
पोलीस कोठडी आणि पुढील कायदेशीर प्रक्रिया-
राजेंद्र ढेरंगे यांना न्यायालयात हजर केले असता, न्यायालयाने प्रकरणाचे गांभीर्य लक्षात घेऊन त्यांना १६ फेब्रुवारीपर्यंत पोलीस कोठडी सुनावली आहे. या काळात पोलीस लाचेच्या रकमेचा विनियोग आणि या गुन्ह्यातील इतर सहकाऱ्यांच्या भूमिकेबाबत अधिक तपास करणार आहेत. भ्रष्टाचार प्रतिबंधक कायद्यांतर्गत हा गुन्हा दाखल करण्यात आला असून, विभागामार्फत त्यांच्या मालमत्तेचीही चौकशी केली जाण्याची शक्यता आहे.
