Mumbai Pune Expressway: मुंबई-पुणे द्रुतगती मार्गावर प्रवास करणाऱ्यांसाठी एक मोठी आणि दिलासादायक बातमी समोर आली आहे. काही दिवसांपूर्वी झालेल्या भीषण वाहतूक कोंडीत अडकलेल्या प्रवाशांकडून जो टोल वसूल करण्यात आला होता, तो आता परत केला जाणार आहे.
महाराष्ट्र नवनिर्माण सेनेच्या (मनसे) पदाधिकाऱ्यांनी आक्रमक पवित्रा घेतल्यानंतर आयआरबी (IRB) कंपनीने टोलचे पैसे परत करण्याचे लेखी आश्वासन दिले आहे.
नेमकी घटना काय होती?
३ फेब्रुवारी रोजी आडोशी बोगद्याजवळ प्रोपलीन हा ज्वलनशील वायू वाहून नेणारा टँकर उलटला होता. या अपघातामुळे मुंबईकडे जाणारी वाहतूक तब्बल ३२ तास ठप्प झाली होती. वाहनांच्या लांबच लांब रांगा लागल्या असताना आणि प्रवासी तासनतास अडकलेले असतानाही टोल नाक्यावर वसुली सुरूच होती. प्रवाशांचे हाल होत असताना केवळ खिसे भरण्याचे काम सुरू असल्याचा आरोप करत मनसेने याविरोधात आवाज उठवला होता.
मनसे आणि प्रशासनाची बैठक
या प्रश्नावर तोडगा काढण्यासाठी खालापूर टोल नाका येथे एक महत्त्वाची बैठक पार पडली. या बैठकीला मनसे पदाधिकारी, रस्ते विकास महामंडळ (MSRDC), आयआरबी कंपनीचे प्रतिनिधी आणि वाहतूक पोलीस अधिकारी उपस्थित होते. मनसेने कोंडीदरम्यान घेतलेला टोल प्रवाशांना त्वरित परत करण्याची ठाम मागणी केली. केवळ टोल वसुली न करता प्रवाशांना सुविधा का दिल्या जात नाहीत, असा जाबही यावेळी विचारण्यात आला.
८ दिवसांत टोल परतावा
मनसेच्या या मागणीला सकारात्मक प्रतिसाद देत आयआरबी कंपनीने येत्या ८ दिवसांत प्रवाशांना टोलचे पैसे परत करण्याचे मान्य केले आहे. महाराष्ट्र नवनिर्माण वाहतूक सेनेचे सरचिटणीस प्रदीप वाघमारे यांनी या निर्णयाची माहिती दिली. ज्या प्रवाशांकडून त्या विशिष्ट कोंडीच्या काळात टोल घेतला गेला, त्यांना ही रक्कम परत मिळणार आहे.
सुविधांबाबतही प्रशासनाला इशारा
केवळ टोल परतावाच नाही, तर द्रुतगती मार्गावरील इतर मूलभूत सुविधांबाबतही मनसेने प्रशासनाचे लक्ष वेधले आहे. यामध्ये प्रामुख्याने:
- महामार्गावर महिलांसाठी आणि विशेषतः स्तनपान करणाऱ्या मातांसाठी स्वतंत्र कक्षाची सोय करणे.
- स्वच्छ प्रसाधनगृहांची व्यवस्था करणे.
- अवैध टोइंगच्या नावाखाली होणारी प्रवाशांची लूट थांबवणे. या मागण्यांवरही सकारात्मक कारवाई करण्याचे आश्वासन संबंधित अधिकाऱ्यांनी दिले आहे.
