Narvekar Family Assets: अलिबाग तालुक्यातील जमीन मोजणीच्या एका वादाची चित्रफीत समोर आल्यानंतर, विधानसभा अध्यक्ष राहुल नार्वेकर आणि त्यांच्या कुटुंबीयांच्या मालमत्तेची जोरदार चर्चा राजकीय वर्तुळात रंगली आहे. निवडणूक प्रतिज्ञापत्रांमधील तपशिलानुसार, २०२२ पासून नार्वेकर कुटुंबाने अलिबाग परिसरातील ‘सेलिब्रिटी झोन’मध्ये जमिनी खरेदी करण्याचा सपाटा लावल्याचे दिसून येते.
६० एकर जमिनीचा व्यवहार
रिपोर्टनुसार, राहुल नार्वेकर यांच्या पत्नी सरोजिनी आणि बंधू मकरंद नार्वेकर यांनी अलिबाग तालुक्यात जवळपास 60 एकर जमीन खरेदी केल्याचे कागदपत्रांवरून स्पष्ट होते. यामध्ये प्रामुख्याने सोगाव, म्हात्रोळी, झिराड, किहीम आणि सासवणे यांसारख्या उच्चभ्रू परिसरांचा समावेश आहे.
- सरोजिनी नार्वेकर: यांच्या नावावर सुमारे 49 एकर जमिनीची नोंद असून, या व्यवहारांची किंमत 75 कोटी रुपयांहून अधिक असल्याचे सांगितले जाते.
- मकरंद नार्वेकर: माजी नगरसेवक मकरंद नार्वेकर यांनीही ऑक्टोबर 2022 ते नोव्हेंबर 2025 या काळात 14 एकर जमीन खरेदी केली असून त्याची किंमत 70 कोटींच्या घरात आहे.
उत्पन्नातील मोठी झेप
नार्वेकर कुटुंबाच्या प्राप्तिकर विवरणपत्रातील (IT Return) आकडेवारी धक्कादायक बदल दर्शवते.
- उत्पन्न वाढ: २०२० मध्ये सरोजिनी नार्वेकर यांचे वार्षिक उत्पन्न केवळ 13,990 रुपये दाखवण्यात आले होते. मात्र, २०२४-२५ या आर्थिक वर्षात हे उत्पन्न थेट 99 लाख 49 हजार रुपयांवर पोहोचले आहे.
- मालमत्तेत वाढ: मकरंद नार्वेकर यांची २०१७ मधील 6 कोटींची मालमत्ता २०२४ पर्यंत तब्बल 124 कोटी रुपयांवर पोहोचली आहे. अवघ्या ८ वर्षांत मालमत्तेत झालेली ही वाढ चर्चेचा विषय ठरली आहे.
नार्वेकर यांनी दिलेले स्पष्टीकरण
या सर्व आरोपांवर राहुल नार्वेकर यांनी आपली बाजू मांडली आहे. ते म्हणाले की, “आमचा परिवार तीन पिढ्यांपासून व्यवसायात आहे. आम्ही कोणतीही संपत्ती लपवलेली नाही किंवा बेनामी व्यवहार केलेले नाहीत. सर्व जमिनी आमच्या नावे असून रीतसर कर भरला जातो. जुन्या जागा विकून नवीन जागा घेतल्या गेल्या आहेत, त्यात कोणताही गैरप्रकार नाही.”
तसेच, प्रतिज्ञापत्रानुसार कुटुंबात आपापसात कर्जाची देवाणघेवाण झाल्याचेही दिसते. यामध्ये मकरंद नार्वेकर यांनी राहुल नार्वेकर यांना 7 कोटी 17 लाख, तर वहिनी सरोजिनी यांना 31 कोटी 66 लाखांचे कर्ज दिल्याची नोंद आहे.
