Swami Avimukteshwaranand: ज्योतिष्पीठाचे शंकराचार्य स्वामी अविमुक्तेश्वरानंद सरस्वती यांनी त्यांच्यावर लावण्यात आलेले लैंगिक शोषणाचे (पोक्सो) सर्व आरोप फेटाळून लावले आहेत. हे सर्व आरोप पूर्णपणे बनावट आणि कपोलकल्पित असल्याचे सांगत, त्यांच्या कायदेशीर पथकाने न्यायालयात आपली बाजू मांडल्याचे त्यांनी स्पष्ट केले. प्रयागराजमधील एका न्यायालयाने या प्रकरणी एफआयआर नोंदवण्याचे आदेश दिल्यानंतर स्वामीजींनी आपली प्रतिक्रिया दिली आहे.
तक्रारदारावरच ओढले ताशेरे
माध्यमांशी बोलताना स्वामी अविमुक्तेश्वरानंद यांनी तक्रारदार आशुतोष ब्रह्मचारी यांच्यावर गंभीर आरोप केले. ते म्हणाले की, “तक्रार करणारी व्यक्ती ही उत्तर प्रदेशातील शामली जिल्ह्यातील कांधला पोलिस स्टेशनमधील रेकॉर्डवरील गुन्हेगार (हिस्ट्रीशीटर) आहे. या व्यक्तीचा इतिहासच खोटे गुन्हे दाखल करण्याचा असून, अनेक जण त्याचे बळी ठरले आहेत.”
“सनातन धर्माला आतूनच धोका”
या प्रकरणावर भाष्य करताना शंकराचार्यांनी धर्मातील अंतर्गत शत्रूंवर निशाणा साधला. “स्वतःला जगद्गुरू म्हणवून घेणाऱ्या व्यक्तीच्या शिष्याने हे आरोप केले आहेत. याचा अर्थ असा की, सनातन धर्माला बाहेरच्यांपेक्षा अशा लोकांपासूनच जास्त धोका आहे, ज्यांना हिंदू धर्म आणि शंकराचार्य ही संस्था नष्ट करायची आहे,” असे स्वामीजींनी नमूद केले.
काय आहे नेमके प्रकरण?
शाकुंभरी पीठाधीश्वर आशुतोष ब्रह्मचारी यांनी २८ जानेवारी रोजी न्यायालयात धाव घेतली होती. स्वामी अविमुक्तेश्वरानंद यांच्या आश्रमात अल्पवयीन मुलांचे शोषण होत असल्याचा आरोप त्यांनी केला असून, पुराव्यासाठी एक सीडी देखील न्यायालयात सादर केल्याचा दावा केला आहे. झूंसी पोलिसांनी तक्रार नोंदवून न घेतल्याने त्यांनी न्यायालयात धाव घेतली होती, ज्यावर आता न्यायालयाने एफआयआर नोंदवण्याचे आदेश दिले आहेत.
न्यायालयाची प्रक्रिया सुरू असून आम्ही आमची बाजू खंबीरपणे मांडू, असा विश्वास स्वामी अविमुक्तेश्वरानंद यांनी व्यक्त केला आहे.
