Donald Trump: अमेरिकेचे राष्ट्राध्यक्ष डोनाल्ड ट्रम्प यांचे फ्लोरिडातील निवासस्थान असलेल्या ‘मार-ए-लागो’ रिसॉर्टवर एका सशस्त्र तरुणाने घुसखोरी करण्याचा प्रयत्न केला. मात्र, सुरक्षेसाठी तैनात असलेल्या सीक्रेट सर्व्हिसच्या एजंट्सनी आणि पाम बीच काउंटीच्या उप-शेरिफने त्याला वेळीच रोखून गोळ्या घालून ठार केले.
नेमकी घटना काय?
सीक्रेट सर्व्हिसचे प्रवक्ते अँथनी गुग्लिएल्मी यांनी दिलेल्या माहितीनुसार, ऑस्टिन टकर मार्टिन (वय 21) हा तरुण उत्तर कॅरोलिना येथून फ्लोरिडाला आला होता. तो मार-ए-लागोच्या उत्तर गेटजवळ एका वाहनामागोमाग आपली गाडी घालून सुरक्षा कडे तोडून आत शिरला. त्याच्याकडे एक शॉटगन आणि इंधनाचा डबा होता. सुरक्षा रक्षकांनी त्याला शस्त्र खाली टाकण्यास सांगितले असता, त्याने डबा खाली ठेवून बंदूक रोखली. या धोकादायक हालचालीमुळे एजंट्सनी त्याच्यावर गोळीबार केला, ज्यात तो जागीच ठार झाला.
हल्लेखोराची पार्श्वभूमी
ऑस्टिन मार्टिन हा गेल्या काही दिवसांपासून उत्तर कॅरोलिना येथील त्याच्या राहत्या घरातून बेपत्ता होता. त्याच्या कुटुंबीयांनी तो हरवल्याची तक्रारही नोंदवली होती. तो दक्षिण दिशेला प्रवास करत असताना त्याने वाटेतच शॉटगन विकत घेतल्याचा संशय तपास यंत्रणांनी व्यक्त केला आहे. त्याच्या गाडीत बंदुकीचा बॉक्सही सापडला आहे.
काही वृत्तांनुसार, मार्टिन हा राजकीयदृष्ट्या सक्रिय होता आणि त्याने यापूर्वी ट्रम्प यांचे समर्थनही केले होते, परंतु या हल्ल्यामागील त्याचा निश्चित हेतू अद्याप स्पष्ट झालेला नाही.
ट्रम्प यांची सुरक्षा आणि तपास
ज्यावेळी ही घटना घडली, तेव्हा राष्ट्राध्यक्ष डोनाल्ड ट्रम्प हे वॉशिंग्टन डीसीमध्ये होते. मार-ए-लागोमध्ये त्यावेळी सीक्रेट सर्व्हिसच्या संरक्षणाखाली असलेली कोणतीही व्यक्ती उपस्थित नव्हती. या प्रकरणाचा तपास आता एफबीआय (FBI), सीक्रेट सर्व्हिस आणि स्थानिक पोलीस एकत्रितपणे करत आहेत. एफबीआयचे संचालक काश पटेल यांनी या तपासासाठी सर्व आवश्यक संसाधने तैनात केल्याचे सांगितले आहे.
गेल्या काही वर्षांत डोनाल्ड ट्रम्प यांच्यावर अनेकदा हल्ल्याचे प्रयत्न झाले आहेत. गेल्या वर्षीच्या पेनसिल्व्हेनिया रॅलीतील गोळीबार आणि सप्टेंबरमध्ये गोल्फ कोर्सवर झालेला हत्येचा प्रयत्न या पार्श्वभूमीवर या ताज्या घटनेने अमेरिकेतील राजकीय सुरक्षेचा प्रश्न पुन्हा ऐरणीवर आला आहे.
