El Mencho Killed: जगातील सर्वात क्रूर आणि श्रीमंत ड्रग माफियांपैकी एक असलेल्या नेमेसिओ रुबेन ओसेगुएरा सर्व्हंटिस उर्फ ‘एल मेन्चो’ याचा मेक्सिकोमध्ये खात्मा करण्यात आला आहे. मेक्सिकन सैन्य आणि अमेरिकन गुप्तचर यंत्रणांच्या संयुक्त मोहिमेदरम्यान त्याला पकडण्यात आले होते, मात्र चकमकीत झालेल्या जखमांमुळे त्याचा मृत्यू झाला.
एल मेन्चो हा ‘जालिस्को न्यू जनरेशन कार्टेल’ (CJNG) या अत्यंत हिंसक संघटनेचा म्होरक्या होता. त्याच्यावर अमेरिकेने 15 दशलक्ष डॉलर्सचे बक्षीस जाहीर केले होते.
एका माजी पोलिसाचा गुन्हेगारी साम्राज्य उभा करण्यापर्यंतचा प्रवास
एल मेन्चोचा प्रवास अत्यंत धक्कादायक होता. 1966 मध्ये जन्मलेला ओसेगुएरा सुरुवातीला शेतमजूर म्हणून काम करायचा. त्यानंतर तो बेकायदेशीरपणे अमेरिकेत गेला, जिथे हेरॉईन तस्करीच्या आरोपाखाली त्याला तुरुंगवास झाला. मेक्सिकोला परतल्यानंतर त्याने काही काळ पोलीस दलातही काम केले. मात्र, पोलिसांच्या कार्यपद्धतीचा अनुभव गाठीशी घेऊन त्याने गुन्हेगारी विश्वात पाऊल ठेवले आणि स्वतःचे एक विशाल लष्करी साम्राज्य उभे केले.
क्रूरता आणि दहशतीचा चेहरा
एल मेन्चोच्या नेतृत्वाखाली CJNG हे जगातील सर्वात शक्तीशाली कार्टेल बनले. केवळ ड्रग्ज तस्करीच नाही, तर खंडणी, अपहरण आणि इंधन चोरीमध्येही या संघटनेचा हात होता.
- लष्करी हेलिकॉप्टर पाडले: 2015 मध्ये या संघटनेने रॉकेट लाँचरचा वापर करून मेक्सिकन लष्कराचे हेलिकॉप्टर पाडले होते.
- पोलिसांची हत्या: त्याच वर्षी अवघ्या सहा आठवड्यांत या संघटनेने 24 पोलीस अधिकाऱ्यांची हत्या केली होती.
- पॅरामिलिटरीचा वापर: हे कार्टेल सैन्याप्रमाणे गणवेश, चिलखती वाहने आणि आधुनिक शस्त्रास्त्रांचा वापर करण्यासाठी ओळखले जाते.
मेक्सिकोमध्ये हिंसाचार आणि भारतीयांना इशारा
एल मेन्चोच्या मृत्यूनंतर त्याचे समर्थक रस्त्यावर उतरले असून मेक्सिकोच्या अनेक राज्यांमध्ये हिंसाचार सुरू झाला आहे. आंदोलकांनी महामार्ग रोखून धरले असून गाड्या आणि दुकानांना आगी लावल्या आहेत. या परिस्थितीची गंभीर दखल घेत मेक्सिकोमधील भारतीय दूतावासाने तेथे राहणाऱ्या भारतीय नागरिकांसाठी महत्त्वाची सूचना जारी केली आहे.
भारतीय नागरिकांना अनावश्यक प्रवास टाळण्याचे, गर्दीच्या ठिकाणी न जाण्याचे आणि स्थानिक माध्यमांच्या संपर्कात राहण्याचे आवाहन करण्यात आले आहे. विशेषतः जालिस्को, मिचोआकान आणि ग्वेरेरो यांसारख्या प्रभावित राज्यांमध्ये राहणाऱ्या भारतीयांना अधिक काळजी घेण्यास सांगितले आहे. मदतीसाठी दूतावासाने +52-55-4847-7539 हा हेल्पलाईन क्रमांकही जारी केला आहे.
