Pune-Mumbai Expressway: पुणे आणि मुंबई या दोन शहरांमधील प्रवास अधिक वेगवान आणि विनाअडथळा करण्यासाठी महाराष्ट्र राज्य रस्ते विकास महामंडळाने (MSRDC) कंबर कसली आहे. वाढत्या वाहतूक कोंडीवर उपाय म्हणून एक्सप्रेसवेवर ६ नवीन बोगदे आणि ४ अतिरिक्त मार्गिका बांधण्याचा प्रस्ताव तयार करण्यात आला आहे. याचा सविस्तर प्रकल्प अहवाल प्रशासकीय मंजुरीसाठी राज्य सरकारकडे सादर करण्यात आला आहे.
६ नवीन बोगद्यांचे नियोजन
घाट विभागातील वाहतूक सुरळीत करण्यासाठी एक्सप्रेसवेवरील महत्त्वाच्या ठिकाणी ६ नवीन बोगदे बांधले जाणार आहेत. यामुळे अवघड वळणांवरील वाहतुकीचा वेग वाढण्यास मदत होईल.
बोगद्यांची नियोजित ठिकाणे:
- खंडाळा – १
- कामशेत – २
- भातन – १
- अडोशी – १
- माडप – १
आता सहा नाही तर १० पदरी रस्ता
सध्या पुणे-मुंबई एक्सप्रेसवे ६ पदरी आहे. नवीन प्रस्तावानुसार यात ४ नवीन मार्गिकांची भर पडणार असून, हा महामार्ग एकूण १० पदरी होणार आहे. या महाप्रकल्पासाठी अंदाजे १४,५०० कोटी रुपये खर्च अपेक्षित असून तो बीओटी (बांधा-वापरा-हस्तांतरित करा) तत्त्वावर राबवला जाईल. या विस्तारासाठी सुमारे १०४ हेक्टर जमिनीची आवश्यकता भासणार असून, सरकारी मंजुरी मिळताच भूसंपादनाची प्रक्रिया सुरू होईल.
वाहतूक क्षमतेत होणार मोठी वाढ
पुणे आणि मुंबई परिसरात सुरू असलेल्या विविध विकासप्रकल्पांमुळे एक्सप्रेसवेवरील वाहनांची संख्या झपाट्याने वाढत आहे. नवी मुंबई आंतरराष्ट्रीय विमानतळ, पुरंदर विमानतळ, पुणे रिंग रोड आणि वांद्रे-विरार-अलिबाग कॉरिडॉर यांसारख्या प्रकल्पांमुळे भविष्यात वाहतुकीचा ताण अधिक वाढणार आहे.
- सध्याची रहदारी: दररोज ७०,००० ते ८०,००० वाहने.
- भविष्यातील क्षमता: विस्तारीकरणानंतर हा महामार्ग दिवसाला १.५ लाख वाहने हाताळू शकेल.
प्रकल्पाचा कालावधी
हा प्रस्ताव सध्या मंजुरीच्या अंतिम टप्प्यात आहे. एकदा काम सुरू झाले की, पुढील ३ वर्षांत हा विस्तार पूर्ण करण्याचे उद्दिष्ट ठेवण्यात आले आहे. या प्रकल्पामुळे पुणे-मुंबई प्रवासाचा वेळ वाचणार असून इंधनाचीही मोठी बचत होईल.
