Ashok Kharat : अध्यात्माचा बुरखा पांघरून भोळ्याभाबड्या जनतेची फसवणूक करणाऱ्या स्वयंघोषित ‘कॅप्टन’ अशोक खरात याच्या कृष्णकृत्यांचा पाढा आता पोलीस तपासात वाचला जात आहे. नाशिकच्या सिन्नर तालुक्यातील मिरगाव येथे ‘ईशानेश्वर’ मंदिराच्या नावाखाली खरातने भीती, श्रद्धा आणि अंधविश्वासाचे एक भयानक साम्राज्य उभे केले होते. या प्रकरणाचा तपास जसजसा पुढे सरकत आहे, तसतसे आर्थिक लूट आणि लैंगिक शोषणाचे एकामागून एक धक्कादायक खुलासे समोर येत असून संपूर्ण महाराष्ट्र सुन्न झाला आहे.
चिंचुके आणि बनावट रत्नांचा ‘दैवी’ बनाव-
अशोक खरातच्या फसवणुकीची सुरुवात अतिशय साध्या वाटणाऱ्या वस्तूंपासून होत असे. बाजारात कवडीमोलाने मिळणारे चिंचुके आणि काचेचे बनावट खडे खरात आपल्या दरबारात ‘दैवी शक्तीने भारलेले’ असल्याचे सांगत असे. हे चिंचुके जवळ ठेवल्याने सर्व संकटे दूर होतात, असा आभास निर्माण करून तो एका चिंचोक्यासाठी भाविकांकडून एक लाख रुपयांपर्यंतची रक्कम उकळत असे. भाग्योदय आणि संकट निवारण्याच्या आमिषाने अनेक मध्यमवर्गीय कुटुंबे त्याच्या या जाळ्यात अडकली आणि आपली कष्टाची कमाई या भोंदूच्या झोळीत अर्पण केली.
यंत्रचलित सापाने निर्माण केलेली ‘भयशाळा’-
भाविकांच्या मनात स्वतःबद्दल आदरयुक्त भीती निर्माण करण्यासाठी खरातने तंत्रज्ञानाचा अतिशय कुटील वापर केला होता. दरबारात मंत्रोच्चार सुरू असताना अचानक २० फुटांचा नाग प्रकट झाल्याचा भास निर्माण केला जात असे. तपासात असे समोर आले आहे की, हा नाग प्रत्यक्षात रबरी किंवा यंत्रचलित (रिमोट कंट्रोल) होता. अंधाऱ्या खोलीत अचानक हालचाल करणाऱ्या या सापाला पाहून भक्त भयभीत होत असत आणि खरातकडे अफाट सिद्धी असल्याचे मानू लागत. या भीतीचा फायदा घेऊन तो लोकांशी मानसिक खेळ खेळत असे आणि त्यांना विधींच्या नावाखाली लुटत असे.
‘एल्विश हनी’: उच्चभ्रूंना नऊ लाखांचा गंडा-
केवळ सामान्य जनताच नव्हे, तर समाजातील बडे उद्योजक आणि राजकीय नेतेही खरातच्या प्रलोभनांना बळी पडले. तुर्कस्तानमधील समुद्राच्या खोल गुहांमधून मिळणारा अत्यंत दुर्मिळ ‘एल्विश हनी’ (तुर्की मध) आपल्याकडे असल्याचे तो सांगत असे. हा मध शक्तिवर्धक आणि लैंगिक समस्यांवर रामबाण उपाय असल्याचा खोटा दावा करून त्याने नऊ लाख रुपये प्रति किलो या दराने त्याची विक्री केली. उच्चभ्रूंना आपल्या जाळ्यात ओढण्यासाठी त्याने या महागड्या मधाचा आणि परदेशी नावाचा वापर करून कोट्यवधींची उकळपट्टी केली.
ट्रस्टचा आडोसा आणि मनी लॉन्ड्रिंगचा संशय-
या सर्व अवैध मार्गांनी मिळवलेला पैसा पांढरा करण्यासाठी खरातने आपल्या वैयक्तिक ट्रस्टचा वापर केल्याचा दाट संशय तपास यंत्रणांनी व्यक्त केला आहे. भाविकांकडून घेतलेली रोख रक्कम देणगी स्वरूपात ट्रस्टच्या खात्यात जमा केली जात असे. या माध्यमातून ‘मनी लॉन्ड्रिंग’ (काळा पैसा पांढरा करणे) झाल्याची शक्यता असल्याने आता पोलिसांच्या आर्थिक गुन्हे शाखेसह इतर यंत्रणाही या व्यवहारांची सखोल चौकशी करत आहेत.
अंधश्रद्धेच्या आड लैंगिक शोषणाचे पातक-
खरातच्या या साम्राज्याचा सर्वात काळा अध्याय म्हणजे महिलांचे शोषण. अपत्यप्राप्ती, कौटुंबिक कलह किंवा नोकरीतील अडचणी सोडवण्याच्या बहाण्याने तो महिलांना एकांतात बोलावून घेत असे. भक्ती आणि भीतीचा प्रभाव वापरून त्याने अनेक महिलांवर अत्याचार केल्याचे आरोप आता समोर येत आहेत. त्याच्या दरबारात राजकीय नेते, सनदी अधिकारी आणि सेलिब्रिटींची सतत होणारी वर्दळ पाहून पीडित महिला तक्रार करण्यास धजावत नव्हत्या. मात्र, आता पोलिसांकडे तक्रारींचा ओघ वाढला असून, खरातच्या या ‘पाप साम्राज्याचा’ अंत होण्याची चिन्हे दिसत आहेत.
