RCB New Owners: आयपीएलच्या इतिहासातील सर्वात मोठी बातमी समोर आली आहे. रॉयल चॅलेंजर्स बेंगळुरू (RCB) या संघाची मालकी आता बदलणार असून एका मोठ्या कंपनी समूहाने हा संघ विकत घेण्याचा निर्णय घेतला आहे.
रिपोर्टनुसार, तब्बल 1.78 अब्ज डॉलर्स म्हणजेच साधारण 16,706 कोटी रुपयांना हा व्यवहार निश्चित झाला आहे. या नव्या मालकांच्या गटामध्ये आदित्य बिर्ला ग्रुप, टाइम्स ऑफ इंडिया ग्रुप, बोल्ट व्हेंचर्स आणि ब्लॅकस्टोन यांसारख्या बलाढ्य कंपन्यांचा समावेश आहे.
युनायटेड स्पिरिट्ससोबत झाला करार
या नव्या गटाने युनायटेड स्पिरिट्स लिमिटेड (USL) सोबत 100 टक्के भागभांडवल खरेदी करण्यासाठी अधिकृत करार केला आहे. यामध्ये केवळ पुरुषांच्या आयपीएल संघाचाच नाही, तर महिलांच्या डब्ल्यूपीएल (WPL) संघाचाही समावेश आहे. मात्र, या व्यवहाराला बीसीसीआय (BCCI) आणि भारतीय स्पर्धा आयोगाची अंतिम मंजुरी मिळणे अद्याप बाकी आहे.
कोण सांभाळणार आरसीबीची धुरा?
- आर्यमन विक्रम बिर्ला: आदित्य बिर्ला ग्रुपचे संचालक आर्यमन बिर्ला हे आरसीबीचे नवीन अध्यक्ष होण्याची शक्यता आहे. विशेष म्हणजे आर्यमन हे स्वतः क्रिकेटपटू राहिले आहेत. त्यांनी मध्य प्रदेशसाठी देशांतर्गत क्रिकेट आणि राजस्थान रॉयल्ससाठी आयपीएलमध्ये प्रतिनिधित्व केले आहे. वयाच्या 28 व्या वर्षी आता ते आपल्या कौटुंबिक व्यवसायासोबतच क्रिकेट टीमचे व्यवस्थापन पाहतील.
- सत्यान गजरानी: टाइम्स इंटरनेटचे सत्यान गजरानी हे या संघाचे उपाध्यक्ष म्हणून काम पाहतील.
- डेव्हिड ब्लिट्झर आणि विरल पटेल: अमेरिकन अब्जाधीश गुंतवणूकदार डेव्हिड ब्लिट्झर आणि ब्लॅकस्टोनचे सीईओ विरल पटेल हे देखील या मालकी गटाचा महत्त्वाचा भाग आहेत.
विराट कोहली आणि खेळाडूंवर काय परिणाम होईल?
मालक बदलले असले तरी मैदानातील खेळाडूंवर याचा कोणताही तातडीचा परिणाम होणार नाही. विराट कोहलीने नेहमीच स्पष्ट केले आहे की, तो आयपीएलमध्ये फक्त आरसीबीसाठीच खेळेल. 2025 मध्ये चॅम्पियन ठरलेल्या या संघातील बहुतेक खेळाडू आणि सपोर्ट स्टाफ तसेच राहण्याची शक्यता आहे. विराटची जगभरातील लोकप्रियता पाहता, नवीन मालक देखील कोहली-आरसीबी हे नाते पुढे नेण्यासाठी उत्सुक आहेत.
विशेष म्हणजे, नुकताच राजस्थान रॉयल्सचा व्यवहारही 16,290 कोटी रुपयांना झाला आहे. आयपीएलमधील या मोठ्या गुंतवणुकीमुळे क्रिकेटच्या बाजारपेठेत मोठी खळबळ उडाली आहे.
