Virat Kohli Meet Sachin Tendulkar : आयपीएल २०२६ च्या हंगामात वानखेडे स्टेडियमवर पार पडलेल्या हाय-व्होल्टेज सामन्यात रॉयल चॅलेंजर्स बंगळुरूने (RCB) यजमान मुंबई इंडियन्सवर १८ धावांनी मात केली. या सामन्यात केवळ धावांचा पाऊस पडला नाही, तर क्रिकेटमधील दोन पिढ्यांचे महानायक म्हणजेच सचिन तेंडुलकर आणि विराट कोहली यांच्यातील हृदयस्पर्शी भेटीने क्रीडाप्रेमींची मने जिंकली.
विराटची अर्धशतकी खेळी आणि रोहितची दुखापत-
प्रथम फलंदाजी करताना रॉयल चॅलेंजर्स बंगळुरूने आक्रमक पवित्रा घेतला. आधुनिक क्रिकेटचा सम्राट विराट कोहली याने संयम आणि आक्रमकता यांचा सुरेख मेळ घालत ३८ चेंडूंमध्ये ५० धावांची मौल्यवान खेळी साकारली. प्रत्युत्तरात मुंबई इंडियन्सकडून मोठी अपेक्षा असलेल्या रोहित शर्माने १३ चेंडूंत १९ धावांची वेगवान सुरुवात केली. मात्र, सहाव्या षटकात स्नायू दुखावल्याने रोहितला ‘रिटायर्ड हर्ट’ होऊन नाईलाजाने मैदान सोडावे लागले. रोहितच्या या अनपेक्षित दुखापतीमुळे मुंबईच्या डावाला सुरुवातीलाच खीळ बसली.
मुंबईची झुंज आणि फलंदाजीचे कोसळलेले बुरुज-
आरसीबीने दिलेल्या २४१ धावांच्या अजस्त्र लक्ष्याचा पाठलाग करताना मुंबईची सुरुवात आश्वासक होती. रयान रिकेल्टन (२७ धावा) आणि रोहितने डावाला गती दिली. मात्र, फिरकीपटू सुयश शर्माने आठव्या षटकात सामन्याचे पारडे फिरवले. त्याने प्रथम रिकेल्टनला आणि त्यानंतर तिलक वर्माला स्वस्तात बाद करून मुंबईला दुहेरी धक्के दिले. मधल्या फळीत सूर्यकुमार यादवने २२ चेंडूंत ३३ धावा करून डाव सावरण्याचा प्रयत्न केला, पण कृणाल पांड्याने त्याला बाद करून मुंबईची स्थिती बिकट केली. कर्णधार हार्दिक पांड्याने २२ चेंडूंत ४० धावांची झुंजार खेळी केली, परंतु मुंबईचा डाव २२२ धावांवर स्थिरावला.
सचिन-विराटची भेट: सोशल मीडियावर कौतुकाचा वर्षाव-
सामना संपल्यानंतर मैदानावर एक भावूक क्षण पाहायला मिळाला. विजयाचा आनंद साजरा करत असतानाच विराट कोहलीने ‘क्रिकेटचा दैवत’ मानल्या जाणाऱ्या सचिन तेंडुलकर यांची भेट घेतली. विराटने सचिनला आलिंगन दिले, तर सचिननेही मोठ्या कौतुकाने विराटची पाठ थोपटून त्याच्या खेळीची प्रशंसा केली. या गुरु-शिष्यांच्या भेटीचे फोटो आणि चित्रफिती सध्या सामाजिक माध्यमांवर प्रचंड वेगाने प्रसारित होत असून, चाहत्यांकडून याला ‘परफेक्ट मोमेंट’ म्हणून संबोधले जात आहे.
