Raja Shivaji Movie Trailer : मराठी चित्रपटसृष्टीसह बॉलिवूड आणि दाक्षिणात्य सिनेसृष्टीतही ज्याची आतुरतेने वाट पाहिली जात होती, त्या ‘राजा शिवाजी’ या महाप्रचंड चित्रपटाचा ट्रेलर अखेर एका दिमाखदार सोहळ्यात प्रदर्शित करण्यात आला आहे. जेव्हापासून या चित्रपटाचा टीझर समोर आला होता, तेव्हापासूनच प्रेक्षकांमध्ये या भव्यदिव्य चित्रपटाबाबत मोठी उत्सुकता निर्माण झाली होती. आता ट्रेलर प्रदर्शित झाल्यामुळे सोशल मीडियावर कौतुकाचा वर्षाव होत असून चित्रपटगृहात महाराजांचा इतिहास पाहण्यासाठी शिवप्रेमी सज्ज झाले आहेत.
बाळ शिवाजी ते राजा शिवाजी: एक प्रेरणादायी प्रवास-
अभिनेता रितेश विलासराव देशमुख याने या चित्रपटाच्या माध्यमातून दिग्दर्शन, लेखन, अभिनय आणि निर्मिती अशा अष्टपैलू जबाबदाऱ्या लिलया पेलल्या आहेत. महाराष्ट्राचे आराध्य दैवत छत्रपती शिवाजी महाराज यांच्या दैदिप्यमान जीवनावर आधारित हा चित्रपट असून, यात बाळ शिवाजी ते राजा शिवाजी असा ‘हिंदवी स्वराज्याचा’ प्रेरणादायी प्रवास मांडण्यात आला आहे. चित्रपटात केवळ युद्धच नव्हे, तर महाराजांच्या व्यक्तित्वाचे दुर्लक्षित परंतु अत्यंत महत्त्वाचे पैलू नव्या दृष्टिकोनातून पडद्यावर साकारण्यात आले आहेत.
देशमुख कुटुंबीयांचे सिनेसृष्टीतील अनोखे पाऊल-
‘राजा शिवाजी’ चित्रपट देशमुख कुटुंबीयांसाठी वैयक्तिकरित्या देखील अत्यंत महत्त्वाचा ठरला आहे. यामध्ये रितेश देशमुख स्वतः छत्रपती शिवाजी महाराजांच्या मुख्य भूमिकेत दिसणार असून, जिनेलिया देशमुख महाराणी सईबाईंची व्यक्तिरेखा साकारणार आहे. या चित्रपटाचे सर्वात मोठे आकर्षण म्हणजे रितेश आणि जिनेलिया यांचा धाकटा मुलगा राहिल देशमुख हा या चित्रपटातून सिनेसृष्टीत आपले पदार्पण करत आहे. एकाच चित्रपटात संपूर्ण कुटुंब ऐतिहासिक भूमिकांमध्ये दिसणार असल्याने चाहत्यांमध्ये आनंदाचे वातावरण आहे.
दहा वर्षांच्या संघर्षाचे फळ: रितेश देशमुख यांच्या भावना-
ट्रेलरच्या प्रकाशन सोहळ्यात बोलताना रितेश देशमुख भावूक झाले. ते म्हणाले, “छत्रपती शिवाजी महाराजांची महानता शब्दांत मांडणे अशक्य आहे. गेल्या दहा वर्षांपासून या चित्रपटाचे स्वप्न मी उराशी बाळगून होतो. अखेर २०२३ मध्ये या प्रवासाला प्रत्यक्ष सुरुवात झाली. मला असे वाटते की, हे स्वप्न पूर्ण करण्याची प्रेरणा खुद्द महाराजांनीच दिली आहे. केवळ इच्छा असून चालत नाही, तर त्याला जिओ स्टुडिओज आणि ज्योती देशपांडे यांच्यासारख्या खंबीर साथीदारांची गरज असते. आम्ही हा चित्रपट केवळ एक व्यवसाय म्हणून नव्हे, तर महाराजांच्या चरणी एक विनम्र अर्पण म्हणून समर्पित करत आहोत.”
नव्या दृष्टिकोनातून इतिहासाचे सादरीकरण-
चित्रपटाचा ट्रेलर पाहता, तांत्रिकदृष्ट्या हा चित्रपट अत्यंत प्रगत असल्याचे जाणवते. भव्य सेट, प्रभावी संवाद आणि मंत्रमुग्ध करणारे पार्श्वसंगीत यामुळे हा चित्रपट प्रेक्षकांना थेट शिवकाळात घेऊन जातो. ऐतिहासिक अचूकता जपतानाच सिनेमॅटिक अनुभव समृद्ध करण्यावर दिग्दर्शकाने भर दिला आहे.
