IPL 2026: आयपीएल 2026 मध्ये जयपूरच्या सवाई मानसिंग स्टेडियमवर खेळल्या गेलेल्या सामन्यात राजस्थान रॉयल्सच्या जोफ्रा आर्चरसाठी दिवस अत्यंत खराब राहिला. गुजरात टायटन्सविरुद्ध गोलंदाजी करताना आर्चरने चक्क 11 चेंडूंची ओव्हर टाकली. आयपीएलच्या इतिहासातील ही संयुक्तपणे सर्वात लांब ओव्हर ठरली आहे.
आर्चरची ‘ती’ ओव्हर आणि नकोसा विक्रम
इंग्लंडच्या या वेगवान गोलंदाजाने आपल्या पहिल्याच ओव्हरमध्ये चक्क 4 वाईड आणि 1 नो-बॉल टाकला. या एका ओव्हरमध्ये त्याने 18 धावा दिल्या. आयपीएलमधील ही पहिलीच वेळ आहे की एखाद्या गोलंदाजाने डावाच्या पहिल्याच ओव्हरमध्ये 11 चेंडू फेकले आहेत. याआधी 2024 मध्ये शामर जोसेफने 10 चेंडूंची पहिली ओव्हर टाकली होती, ज्याचा विक्रम आता आर्चरने मोडला आहे.
आयपीएलच्या इतिहासात आतापर्यंत जोफ्रा आर्चरसह अर्शदीप सिंग, हार्दिक पांड्या, शार्दुल ठाकूर, संदीप शर्मा, तुषार देशपांडे आणि मोहम्मद सिराज या सात गोलंदाजांनी 11 चेंडूंची ओव्हर टाकण्याचा विक्रम केला आहे.
गुजरातचा सलग चौथा विजय
सामन्याबद्दल बोलायचे झाले तर, गुजरात टायटन्सने राजस्थान रॉयल्सचा 77 धावांनी मोठा पराभव केला. प्रथम फलंदाजी करताना गुजरातने 20 ओव्हरमध्ये 4 गडी गमावून 229 धावांचा डोंगर उभा केला. कर्णधार शुभमन गिलने अवघ्या 44 चेंडूत 84 धावांची तुफानी खेळी केली.
राजस्थानची फलंदाजी कोसळली
230 धावांच्या आव्हानाचा पाठलाग करताना राजस्थान रॉयल्सचा संघ 16.3 ओव्हरमध्ये केवळ 152 धावांवर गारद झाला. राजस्थानचा प्रभारी कर्णधार यशस्वी जैस्वाल या सामन्यात मोठी खेळी करू शकला नाही. 15 वर्षीय युवा खेळाडू वैभव सूर्यवंशीने अवघ्या 16 चेंडूत 36 धावा केल्या. विशेष म्हणजे, या खेळीदरम्यान वैभवने टी-20 इतिहासात सर्वात वेगाने 100 षटकार ठोकण्याचा विक्रम आपल्या नावे केला. मात्र तो बाद होताच राजस्थानची फलंदाजी पत्त्यासारखी कोसळली.
गुजरातच्या राशीद खानने 4 बळी घेतले, तर जेसन होल्डरने 3 आणि कागिसो रबाडाने 2 गडी बाद केले. या विजयासह गुजरात टायटन्स आता गुणतालिकेत दुसऱ्या स्थानावर पोहोचला आहे.
हे देखील वाचा – Mamata Banerjee: ममता बॅनर्जींनी अखेर स्वीकारला पराभव? ‘X’ वरील बायोमध्ये केला ‘हा’ मोठा बदल
