World Record: बंगळुरूमध्ये राहणाऱ्या डॅनिश अब्दी आणि वृषाली प्रसादे या सॉफ्टवेअर इंजिनिअर जोडप्याने समुद्राच्या लाटांवर स्वार होत एक नवा जागतिक विक्रम प्रस्थापित केला आहे. ऐतिहासिक ‘राम सेतू’ मार्गावरून श्रीलंकेतून भारतापर्यंतचे समुद्रातील अंतर पोहून पार करणारे ते जगातील पहिले जोडपे ठरले आहेत. ७ मे २०२६ रोजी त्यांनी हा चित्तथरारक प्रवास यशस्वीरीत्या पूर्ण केला.
१० तास ४५ मिनिटांचा संघर्ष
या जोडप्याने पहाटे ४:३० वाजता श्रीलंकेतील तलाईमन्नार येथून पोहण्यास सुरुवात केली. समुद्रातील वेगवान प्रवाह, दिशा बदलणारे वारे आणि उंच लाटांचा सामना करत त्यांनी दुपारी ३:१५ वाजता तामिळनाडूतील धनुषकोडी किनारा गाठला. सुमारे ३२ किलोमीटरचे हे अंतर पार करण्यासाठी त्यांना १० तास आणि ४५ मिनिटांचा वेळ लागला.
अडथळ्यांची शर्यत
सोशल मीडियावर शेअर केलेल्या व्हिडिओमध्ये हे जोडपे समुद्राच्या रौद्र रूपाशी झुंज देताना दिसत आहे. अनेकदा समुद्राच्या प्रवाहाने त्यांना त्यांच्या मूळ मार्गापासून दूर ढकलले, मात्र जिद्द न हारता त्यांनी हा प्रवास सुरू ठेवला. भारतीय तटरक्षक दल, वैद्यकीय पथक आणि सुरक्षा बोटींच्या देखरेखीखाली हा संपूर्ण उपक्रम राबवण्यात आला होता.
केवळ ४ वर्षांच्या सरावात यश
विशेष म्हणजे, डॅनिश आणि वृषाली हे दोघेही आयटी क्षेत्रात कार्यरत आहेत. त्यांनी केवळ ४ वर्षांपूर्वीच व्यावसायिक पोहण्याचे प्रशिक्षण घेण्यास सुरुवात केली होती. नोकरी सांभाळून केलेल्या कडक शिस्त आणि सरावाच्या जोरावर त्यांनी हा पल्ला गाठला आहे.
या ऐतिहासिक कामगिरीमुळे भारतीय ‘ओपन वॉटर स्विमिंग’मध्ये एक नवा मापदंड प्रस्थापित झाला आहे. सोशल मीडियावर या जोडप्याच्या जिद्दीचे आणि टीमवर्कचे सर्व स्तरांतून कौतुक होत आहे. साहसी क्रीडा प्रकारात रस असणाऱ्या तरुणांसाठी हा पराक्रम नक्कीच प्रेरणादायी ठरेल.
हे देखील वाचा – Fuel Supply India: भारताकडे किती दिवसांचा इंधन साठा उपलब्ध? केंद्र सरकारने दिली माहिती
