Japan Earthquake : जपानमधील उत्तर भागात असलेल्या मियागी प्रांताच्या किनारपट्टीला शुक्रवारी रात्री भूकंपाचा मोठा तडाखा बसला. रिश्टर स्केलवर या भूकंपाची तीव्रता ६.७ इतकी मोजण्यात आली आहे. या नैसर्गिक आपत्तीमुळे जपान सरकारने तात्काळ पाच प्रांतांमध्ये आणीबाणीचा इशारा (इमर्जन्सी वॉर्निंग) जारी केला असून प्रशासनाला सतर्क राहण्याचे आदेश दिले आहेत.
स्थानिक वेळेनुसार रात्री ८:२२ वाजता हा भूकंप झाला. भूगर्भातील याचे केंद्र मियागी प्रांताच्या समुद्रकिनाऱ्यालगत होते. अमेरिकन भूगर्भीय सर्वेक्षण विभागाने (USGS) दिलेल्या माहितीनुसार, या भूकंपाचा केंद्रबिंदू ओफुनातो शहरापासून सुमारे ५० किलोमीटर पूर्वेला आणि समुद्राच्या तळाशी साधारण ४३ किलोमीटर खोलीवर होता. सुरुवातीला या भूकंपाची तीव्रता ६.६ नोंदवण्यात आली होती, मात्र नंतर तांत्रिक विश्लेषणानंतर ती सुधारून ६.७ रिश्टर स्केल असल्याचे स्पष्ट करण्यात आले.
जपानी हवामान विभागाने आणि संबंधित प्राधिकरणाने या भूकंपाची तीव्रता जपानच्या ‘शिनदो’ या सात-बिंदूंच्या मापन श्रेणीनुसार ‘पाच’ अशी निश्चित केली आहे. भूकंपाचे धक्के तीव्र असले तरी, सुदैवाने प्रशासनाने त्सुनामीचा कोणताही धोका नसल्याचे स्पष्ट केले आहे. यामुळे किनारपट्टीवरील नागरिकांना मोठा दिलासा मिळाला असला, तरी खबरदारीचा उपाय म्हणून मियागीसह शेजारील पाच प्रांतांतील रहिवाशांना सुरक्षित स्थळी राहण्याच्या आणि भूकंपाच्या धक्क्यानंतर होणाऱ्या पडझडीपासून सावध राहण्याच्या सूचना देण्यात आल्या आहेत.
