Salman Khan : बॉलिवूडचा सुपरस्टार सलमान खान हा सध्या त्याच्या व्यावसायिक आयुष्यापेक्षा वैयक्तिक आयुष्यातील घडामोडींमुळे आणि सोशल मीडियावरील त्याच्या विधानांमुळे प्रचंड चर्चेत आला आहे. सामान्यतः चित्रपट प्रदर्शनाशिवाय माध्यमांपासून दूर राहणे पसंत करणारा सलमान गेल्या काही दिवसांपासून आपल्या मनातील भावना आणि संताप चाहत्यांसोबत उघडपणे शेअर करताना दिसत आहे. नुकताच मुंबईतील हिंदुजा रुग्णालयाबाहेर पॅपाराझींच्या (छायाचित्रकार) वर्तणुकीमुळे सलमान खानचा संयम सुटला आणि त्याने केवळ प्रत्यक्ष घटनास्थळीच नव्हे, तर समाज माध्यमांवरूनही माध्यम प्रतिनिधींना कडक शब्दांत तंबी दिली आहे.
या संपूर्ण प्रकरणाची सुरुवात एका मध्यरात्री झाली, जेव्हा सलमान खान काही खासगी कारणास्तव हिंदुजा रुग्णालयात गेला होता. सलमान आपल्या घरून निघाल्यापासूनच पॅपाराझींच्या कॅमेऱ्यांनी त्याचा पाठलाग सुरू केला होता. तो रुग्णालयात पोहोचला तरीही छायाचित्रकारांचा आरडाओरडा आणि गर्दी कमी होत नव्हती. रुग्णालयाच्या शांततेचा विचार न करता केवळ एका फोटोसाठी चाललेला हा तमाशा पाहून सलमान खान कमालीचा संतापला. व्हायरल झालेल्या व्हिडिओमध्ये सलमान अत्यंत संतप्त मुद्रेने छायाचित्रकारांना गप्प राहण्याचे आणि शिस्त पाळण्याचे संकेत देताना स्पष्टपणे दिसत आहे.
या घटनेनंतर सलमान खानने पहाटे तीनच्या सुमारास इन्स्टाग्रामवर एकापाठोपाठ एक अशा चार पोस्ट शेअर करत आपला संताप व्यक्त केला. या पोस्टमध्ये त्याने स्वत:चे सेल्फी शेअर करत माध्यमांना आरसा दाखवण्याचा प्रयत्न केला आहे. सलमानने अत्यंत तिखट शब्दांत भाष्य करताना म्हटले की, आजवर त्याने नेहमीच माध्यमांना सन्मान दिला असून छायाचित्रकारांच्या उपजीविकेचा विचार केला आहे. मात्र, एखाद्या व्यक्तीच्या कठीण काळात किंवा कौटुंबिक संकटातही त्याचा अशा प्रकारे पाठलाग करून त्यातून पैसे कमावण्याचा प्रयत्न करणे हे अत्यंत निंदनीय असल्याचे त्याने नमूद केले.
आपल्या आगामी ‘मातृभूमी: मे वॉर रेस्ट इन पीस’ या चित्रपटाचा संदर्भ देत सलमानने एक गंभीर प्रश्न उपस्थित केला आहे की, एखाद्या छायाचित्रकारासाठी एखादा फोटो हा त्या व्यक्तीच्या आयुष्यापेक्षा किंवा तिच्या भावनांपेक्षा जास्त मौल्यवान असू शकतो का? ज्यांच्या पाठीशी मी नेहमी खंबीरपणे उभा राहिलो, तेच लोक जर माझ्या मानसिक स्थितीचा गैरफायदा घेऊन पैसे कमावणार असतील, तर त्यांनी शांत राहिलेलेच बरे, अशा कठोर शब्दांत त्याने आपली नाराजी व्यक्त केली आहे.
सलमान खान एवढ्यावरच थांबला नाही, तर त्याने आपल्या वयाचा आणि शारीरिक क्षमतेचा उल्लेख करत छायाचित्रकारांना थेट आव्हान दिले आहे. तो म्हणाला की, जरी तो वयाच्या साठीत पोहोचला असला, तरी आजही तो शंभर जणांचा सामना करण्यास समर्थ आहे आणि लढण्याची जिद्द तो विसरलेला नाही. “पुढच्या वेळी जेव्हा मी दुःखात किंवा संकटात असेन, तेव्हा माझ्या वाटेत येऊन बघाच,” असा थेट इशारा त्याने दिला आहे. तुमच्या कुटुंबातील कोणी रुग्णालयात असताना जर मी असाच वागलो तर तुम्हाला कसे वाटेल, असा मर्मभेदी प्रश्नही त्याने उपस्थित केला आहे.
