Nashik TCS Case : नाशिक येथील बहुचर्चित ‘टीपीएस’ (TCS) कंपनीतील महिला कर्मचाऱ्यावरील लैंगिक अत्याचार आणि सक्तीचे धर्मांतर या प्रकरणाला आता एक अत्यंत गंभीर व धक्कादायक वळण मिळाले आहे. या गुन्ह्यातील मुख्य संशयित आरोपी निदा खान हिच्या सखोल चौकशीदरम्यान नाशिक पोलिसांच्या हाती अत्यंत संवेदनशील आणि भक्कम पुरावे लागले आहेत. पोलिसांनी या प्रकरणी आतापर्यंत नोंदवण्यात आलेल्या सर्व ९ गुन्ह्यांचा तपास पूर्ण करून न्यायालयात अधिकृत दोषारोपपत्र (चार्जशीट) दाखल केले आहे. या दोषारोपपत्रातून सन २०२२ ते २०२६ या चार वर्षांच्या प्रदीर्घ कालावधीत पीडित हिंदू तरुणीवर झालेल्या अनन्वित छळाचा आणि क्रूर कटकारस्थानाचा संपूर्ण घटनाक्रम उघडकीस आला आहे.
अधिकच्या माहितीनुसार, आरोपींनी केवळ पीडितेचे शारीरिक व मानसिक शोषण केले नाही, तर तिची मूळ धार्मिक ओळख पुसून टाकण्याचा पद्धतशीर प्रयत्न केला. तपास यंत्रणांना मिळालेल्या पुराव्यांनुसार, पीडित हिंदू तरुणीचे नाव बदलून तिला एक मुस्लिम नाव देण्यात आले होते. मुख्य संशयित आरोपी निदा खान हिने पोलिसांसमोर कबुली दिली आहे की, तिने पीडितेला स्वतःच्या निवासस्थानी नेऊन नमाज पठणाचे सक्तीचे प्रशिक्षण दिले होते. याशिवाय, पोलिसांनी जेव्हा पीडितेच्या मोबाईलची तांत्रिक तपासणी केली, तेव्हा त्यात इस्लाम धर्माचा प्रचार करणाऱ्या तब्बल ३७ ऑडिओ क्लिप आणि ४ विशेष इस्लामिक ॲप्लिकेशन्स आढळून आले, जे तिच्याकडून सक्तीने डाऊनलोड करून घेण्यात आले होते.
न्यायालयात सादर करण्यात आलेल्या दोषारोपपत्रात प्रक्षोभक व कट्टरवादी विचारसरणीचा प्रचार करणारा झाकीर नाईक याच्या नावाचा थेट उल्लेख करण्यात आला आहे. पीडित तरुणीचे मतपरिवर्तन (ब्रेनवॉश) करण्यासाठी आरोपींकडून तिला सातत्याने सामाजिक माध्यमांवरील (सोशल मीडिया) झाकीर नाईकचे वादग्रस्त व्हिडिओ पाहण्यास भाग पाडले जात होते. सनातन हिंदू धर्म आणि हिंदू देवदेवतांबद्दल अत्यंत आक्षेपार्ह व अपमानास्पद विधाने करून पीडितेच्या धार्मिक भावना दुखावल्या जात होत्या, जेणेकरून तिचा स्वतःच्या धर्मावरील विश्वास उडावा.
या गुन्ह्याचा कट रचण्यात दानिश शेख, तौफिक अत्तार आणि निदा खान या तिघांची मुख्य भूमिका होती. या आरोपींनी संगनमत करून पीडित तरुणीच्या असहायतेचा गैरफायदा घेतला. सन २०२२ मध्ये त्यांनी पीडितेला ‘टीसीएस’ कंपनीत नोकरी मिळवून दिली आणि त्यानंतर तिचे शोषण करण्यास सुरुवात केली. मुख्य आरोपी दानिश शेख याने पीडित तरुणीला विवाहाचे खोटे आमिष दाखवून तिच्यावर वारंवार बलात्कार केला. एवढेच नव्हे तर, तिच्या जातीचा उल्लेख करून तिला हीन दर्जाची वागणूक दिली आणि तिचा मानसिक छळ केला. या गुन्ह्यातील अन्य एक आरोपी मतीन पटेल याने मुख्य आरोपी निदा खानला पोलिसांच्या अटकेपासून वाचवण्यासाठी आश्रय दिल्याचा ठपका पोलिसांनी ठेवला आहे.
पीडितेचे मानसिक खच्चीकरण करण्यासाठी आरोपींनी भीतीचे तंत्र वापरले होते. “जर तू नमाज पठण केले नाहीस, तर तुझे कुटुंबीय नरकात जातील,” अशी भीती दाखवून तिला मानसिकदृष्ट्या हतबल केले गेले. तिला तिच्या इच्छेविरुद्ध बुरखा आणि हिजाब परिधान करण्याची सक्ती करण्यात आली, तसेच रोजा (उपवास) ठेवण्यासाठी दबाव आणला गेला. या शारीरिक व धार्मिक शोषणासोबतच दानिश शेख याने पीडितेकडून मौल्यवान वस्तू आणि मोठी रक्कम बळजबरीने उकळली. तर दुसरीकडे, दुसरा आरोपी तौफिक अत्तार याने थेट कार्यालयाच्या (ऑफिस) पॅन्ट्रीमध्ये पीडित तरुणीचा विनयभंग करून अश्लील चाळे केल्याचे दोषारोपपत्रात नमूद करण्यात आले आहे. नाशिक पोलिसांनी न्यायालयात सादर केलेल्या या भक्कम पुराव्यांमुळे आरोपींच्या अडचणीत मोठी वाढ झाली असून, या संवेदनशील खटल्याच्या पुढील सुनावणीकडे आता संपूर्ण राज्याचे लक्ष लागले आहे.
