Rishabh Pant : आयपीएलचा चालू हंगाम संपून महिनाही झाला नाही, तोच आगामी हंगामासाठी पडद्यामागे मोठ्या घडामोडी सुरू झाल्याचे संकेत मिळत आहेत. क्रिकेट वर्तुळातून मिळालेल्या ताज्या माहितीनुसार, लखनौ सुपर जायंट्स आणि दिल्ली कॅपिटल्स यांच्यात एक मोठा खेळाडू बदल (ट्रेड) होण्याची शक्यता आहे. या संभाव्य करारानुसार, भारताचा स्टार यष्टीरक्षक फलंदाज रिषभ पंत पुन्हा एकदा दिल्ली कॅपिटल्सच्या ताफ्यात दिसू शकतो.
दुसऱ्या बाजूला, दिल्ली कॅपिटल्सचा मुख्य फिरकीपटू कुलदीप यादव लखनौ सुपर जायंट्सच्या संघात सामील होऊ शकतो. हा व्यवहार झाल्यास दोन्ही खेळाडूंना आपापल्या घरच्या राज्यातून खेळण्याची संधी मिळू शकते, कारण पंत घरगुती क्रिकेट दिल्लीकडून तर कुलदीप उत्तर प्रदेशकडून खेळतो.
दोन्ही फ्रँचायझींनी या संभाव्य कराराची कागदपत्रे मंजुरीसाठी भारतीय क्रिकेट नियामक मंडळाकडे पाठवली असल्याचे समजते.
पंत मानधनात मोठी कपात करण्यास तयार; २५ कोटींवरून थेट १५ कोटींवर येणार?
या संभाव्य व्यवहारातील सर्वात महत्त्वाची गोष्ट म्हणजे रिषभ पंतच्या मानधनात होणारी मोठी कपात मानली जात आहे:
- बजेटचा मोठा अडथळा: लखनौ संघात पंतचे मानधन तब्बल 27 कोटी रुपये होते. इतकी मोठी रक्कम कोणत्याही संघाला आपल्या बजेटमध्ये सामावून घेणे कठीण असल्याने हा व्यवहार रखडला होता.
- १२ कोटी सोडून देण्यास संमती?: हा व्यवहार यशस्वी व्हावा म्हणून पंतने स्वतःहून आपला पगार कमी करण्याची तयारी दर्शवल्याचे सूत्रांचे म्हणणे आहे. नवीन रचनेनुसार, तो सुमारे 15 कोटी रुपयांच्या मानधनावर दिल्लीकडून खेळू शकतो.
- कुलदीपचे मानधन राहू शकते कायम: लखनौ संघात जाण्याची शक्यता असलेल्या कुलदीप यादवच्या मानधनात कोणताही बदल होणार नसल्याचे बोलले जात आहे. त्याला पूर्वीप्रमाणेच 13.25 कोटी रुपये दिले जाण्याची शक्यता आहे.
लखनौचा नवा विचार आणि जेएसडब्ल्यू ग्रुपचा पुढाकार
रिषभ पंतच्या नेतृत्वाखाली लखनौ सुपर जायंट्सची कामगिरी गेल्या दोन हंगामात अपेक्षेप्रमाणे झाली नव्हती, त्यामुळे संघ व्यवस्थापन नव्या नेतृत्वाचा विचार करत असल्याचे समजते. दुसरीकडे, दिल्ली कॅपिटल्सची धुरा आता पुढील दोन वर्षांसाठी जेएसडब्ल्यू ग्रुप आणि पार्थ जिंदाल यांच्याकडे आली आहे. जिंदाल हे नेहमीच पंतचे मोठे प्रशंसक राहिले असून त्यांनीच पंतला पुन्हा संघात आणण्यासाठी पुढाकार घेतल्याचे वृत्त आहे.
सौरव गांगुलीचे पुनरागमन आणि सपोर्ट स्टाफमध्ये युवराज सिंगची एन्ट्री?
दिल्ली कॅपिटल्समध्ये केवळ खेळाडूंमध्येच नाही, तर प्रशिक्षक फळीतही मोठे फेरबदल होण्याची शक्यता वर्तवली जात आहे:
युवी-दादा जोडी पुन्हा एकत्र येण्याचे संकेत: सौरव गांगुली पुन्हा एकदा क्रिकेट संचालक म्हणून दिल्लीच्या संघात परतण्याची शक्यता आहे. गांगुलीने या प्रवासात भारताचा दिग्गज अष्टपैलू खेळाडू युवराज सिंग याला सपोर्ट स्टाफमध्ये सामील करून घेण्यासाठी हालचाली सुरू केल्याचे समजते.
हेमंत बदानी यांच्या जागेवर नवीन चेहरा?: गेल्या दोन हंगामात हेमंत बदानी मुख्य प्रशिक्षक होते, मात्र त्यांच्या मार्गदर्शनाखाली संघ केवळ सहाव्या स्थानावर राहू शकल्याने नवीन व्यवस्थापन नवीन पर्याय शोधत आहे.
