Pune Crime : पुण्यातील प्रसिद्ध पर्यटन स्थळ आणि ट्रेकर्सचे आवडते ठिकाण असलेल्या लोहगड किल्ल्यावरून एक धक्कादायक आणि मन सुन्न करणारी घटना समोर आली आहे. फोटोसाठी पोज देत असताना पाय घसरून दरीत पडल्यामुळे २४ वर्षीय तरुण केतन अग्रवाल याचा मृत्यू झाल्याची प्राथमिक माहिती समोर आली होती. मात्र, लोणावळा ग्रामीण पोलिसांनी केलेल्या सखोल आणि तांत्रिक तपासानंतर या प्रकरणाला अत्यंत धक्कादायक वळण मिळाले आहे. हा कोणताही अपघात नसून, केतनची पूर्वनियोजित कट रचून हत्या करण्यात आल्याचे तपासात उघड झाले आहे. याप्रकरणी पोलिसांनी केतनची होणारी पत्नी आणि तिच्या प्रियकराला चौकशीसाठी ताब्यात घेतले आहे.
वाढदिवसाचे निमित्त आणि हत्येचा कट
मृत केतन विशाल अग्रवाल (वय २४) आणि संशयित आरोपी तरुणी सिया गोयल यांचा विवाह निश्चित झाला होता. येत्या नोव्हेंबर महिन्यात हा विवाहसोहळा अत्यंत थाटामाटात पार पडणार होता. लग्न ठरल्यामुळे दोन्ही कुटुंबे आनंदात होती. १८ जून (गुरुवार) रोजी सियाचा वाढदिवस होता. हा दिवस विशेष पद्धतीने साजरा करण्यासाठी केतन आणि सिया यांनी सकाळीच लोहगड किल्ल्यावर ट्रेकिंगला जाण्याचा बेत आखला. दोघेही सकाळी लवकर किल्ल्यावर पोहोचले आणि तेथे निसर्गरम्य वातावरणात फिरू लागले.
परंतु, या आनंदाच्या वातावरणामागे एक भयानक कारस्थान शिजत होते. पोलिसांच्या माहितीनुसार, सियाला केतनसोबत लग्न करण्याची अजिबात इच्छा नव्हती. या सक्तीच्या विवाहातून स्वतःची सुटका करून घेण्यासाठी आणि केतनला आपल्या आयुष्यातून कायमचे दूर करण्यासाठी तिने आपल्या प्रियकराच्या मदतीने एक क्रूर कट रचला होता.
अपघाताचा बनाव आणि पोलिसांचा संशय
किल्ल्यावर फिरत असताना, दरीच्या कठड्यावर उभे राहून केतन मोबाईल कॅमेऱ्यासमोर फोटोसाठी पोज देत होता. नेमकी याच संधीची वाट पाहत असलेल्या सिया आणि तिच्या प्रियकराने केतनला अचानक मागून खोल दरीत ढकलून दिले. केतन दरीत कोसळल्यानंतर, स्वतःवर संशय येऊ नये म्हणून सियाने गडावर मदतीसाठी आरडाओरडा करण्यास सुरुवात केली. तिने इतर पर्यटकांना हा केवळ एक दुर्दैवी अपघात असल्याचा भास निर्माण केला.
गडावरील पर्यटकांनी तातडीने लोणावळा ग्रामीण पोलिसांशी संपर्क साधला. घटनेचे गांभीर्य लक्षात घेऊन पोलिसांनी ‘शिवदुर्ग रेस्क्यू टीम’ आणि ‘मावळ वन्यजीव पथका’च्या जवानांना पाचारण केले. बचाव पथकाने अत्यंत दुर्गम दरीत उतरून शर्थीचे प्रयत्न करत केतनला बाहेर काढले. दरीत कोसळल्याने त्याच्या शरीराला गंभीर दुखापती झाल्या होत्या. त्याला तातडीने जवळच्या रुग्णालयात दाखल करण्यात आले, परंतु उपचारापूर्वीच डॉक्टरांनी त्याला मृत घोषित केले.
१७ कोटींचे पॅलेस अन् विमानांचे बुकिंग; क्षणार्धात स्वप्नांचा चक्काचूर
केतन हा एका उच्चभ्रू कुटुंबातील तरुण होता. नोव्हेंबर महिन्यात होणाऱ्या या भव्य विवाहसोहळ्यासाठी अग्रवाल कुटुंबाने जयपूर येथे तब्बल १७ कोटी रुपये खर्च करून एक आलिशान पॅलेस बुक केला होता. इतकेच नव्हे तर, विवाहसोहळ्याला उपस्थित राहणाऱ्या पाहुण्यांना सन्मानाने जयपूर येथे नेण्यासाठी दोन विशेष विमानांची (चार्टर्ड प्लेन) व्यवस्था देखील करण्यात आली होती. ज्या मुलीसोबत नवीन आयुष्याची स्वप्ने केतन पाहत होता, त्याच मुलीने त्याच्या वाढदिवसाच्या दिवशीच त्याचा घात केला. या घटनेमुळे दोन्ही कुटुंबांवर दुःखाचा डोंगर कोसळला असून परिसरात तीव्र हळहळ व्यक्त होत आहे.
तांत्रिक विश्लेषणातून सत्य आले समोर
सुरुवातीला लोणावळा ग्रामीण पोलिसांनी या घटनेची नोंद ट्रेकिंग दरम्यान झालेला अपघात म्हणून केली होती. मात्र, पोलिसांना सियाच्या वर्तनावर आणि घटनाक्रमावर संशय आला. पोलिसांनी तांत्रिक विश्लेषण, मोबाईल लोकेशन आणि सखोल चौकशीचे सत्र सुरू केले. तपासादरम्यान सिया आणि तिच्या प्रियकराचे बिंग फुटले.
पोलिसांनी दिलेल्या माहितीनुसार, सियाने केतनला वाटेतून हटवण्यासाठी तिच्या प्रियकराला लोहगड किल्ल्यावर बोलावून घेतले होते. योग्य वेळ साधून त्यांनी केतनला थेट खोल दरीत लोटून दिले. या गुन्ह्यात सियाच्या प्रियकराला अन्य कोणी मदत केली आहे का? तसेच या संपूर्ण कटात आणखी कोणाचा सहभाग आहे का? या दिशेने लोणावळा ग्रामीण पोलिसांचा तपास अत्यंत वेगाने सुरू आहे. पोलिसांनी सध्या मुख्य संशयित आरोपी सिया गोयल आणि तिच्या प्रियकराला ताब्यात घेतले असून, पुढील कायदेशीर कारवाई केली जात आहे.
