Sachin Ahir : महाराष्ट्राच्या राजकारणात गेल्या काही दिवसांपासून सुरू असलेल्या घडामोडींना विधान परिषदेच्या उपसभापतीपदाच्या निवडणुकीच्या निमित्ताने आणखी एक नवे वळण मिळाले आहे. ‘ऑपरेशन टायगर’च्या पार्श्वभूमीवर उद्धव ठाकरे यांच्या नेतृत्वाखालील शिवसेनेला बसलेल्या धक्क्यातून पक्ष सावरत असतानाच, मंगळवारी आणखी एक महत्त्वाची राजकीय घटना घडली. शिवसेना (उद्धव बाळासाहेब ठाकरे) पक्षाचे विधान परिषदेचे आमदार सचिन अहिर यांनी शिंदे गटाकडून विधान परिषदेच्या उपसभापतीपदासाठी उमेदवारी अर्ज दाखल केल्याचे समोर आले. या घडामोडीमुळे राज्याच्या राजकारणात मोठी खळबळ उडाली असून, ठाकरे गटासाठी हा आणखी एक मोठा राजकीय धक्का मानला जात आहे.
या संपूर्ण घडामोडीची विशेष बाब म्हणजे सचिन अहिर यांच्या पक्षांतराची माहिती अत्यंत गोपनीय ठेवण्यात आली होती. त्यांच्या संभाव्य प्रवेशाबाबत कोणतीही अधिकृत चर्चा किंवा संकेत बाहेर येऊ नयेत, याची पूर्ण खबरदारी घेतल्याचे दिसून आले. विधान परिषदेच्या उपसभापतीपदासाठी उमेदवारी अर्ज दाखल करण्याच्या प्रक्रियेदरम्यानच या सर्व घडामोडींचा उलगडा झाला.
मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार हे तिघेही विधान परिषदेच्या उपसभापतीपदाच्या निवडणुकीसाठी उमेदवारी अर्ज दाखल करण्याच्या प्रक्रियेदरम्यान उपस्थित होते. त्याचवेळी सचिन अहिर यांनी शिंदे गटाच्या उमेदवार म्हणून अर्ज दाखल केल्याचे स्पष्ट झाले. अर्ज दाखल करतानाची त्यांची छायाचित्रे समोर आल्यानंतर सुरुवातीला अनेकांना त्यावर विश्वास बसला नाही. मात्र काही वेळातच सचिन अहिर यांनी ठाकरे गट सोडून शिंदे गटात प्रवेश केल्याचे स्पष्ट होताच राजकीय वर्तुळात मोठी चर्चा सुरू झाली.
या संपूर्ण घडामोडीची आखणी अत्यंत नियोजनबद्ध पद्धतीने करण्यात आल्याची चर्चा आहे. उपसभापतीपदासाठी उमेदवार कोण असणार, याबाबत शेवटच्या क्षणापर्यंत संभ्रमाचे वातावरण कायम ठेवण्यात आले होते. यासाठी शिंदे गटाकडून जाणीवपूर्वक तीन नावांची चर्चा राजकीय वर्तुळात सुरू ठेवण्यात आली होती. माजी उपसभापती नीलम गोऱ्हे, चंद्रकांत रघुवंशी आणि कृपाल तुमाने या तिघांची नावे संभाव्य उमेदवार म्हणून पुढे आली होती. त्यामुळे माध्यमे आणि राजकीय विश्लेषकांचे लक्ष या तिघांवर केंद्रित झाले होते.
विशेषतः चंद्रकांत रघुवंशी यांच्या नावाला उत्तर महाराष्ट्रातील अनेक आमदारांचा पाठिंबा असल्याची माहिती समोर आली होती. उत्तर महाराष्ट्रातील नऊ आमदारांनी उपमुख्यमंत्री एकनाथ शिंदे यांना पत्र देऊन रघुवंशी यांना उपसभापतीपदाची संधी देण्याची मागणी केली होती. या पत्रावर अमोल पाटील, गोकुळ गिते, सत्यजीत तांबे, आमशा पाडवी, किशोर पाटील, चंद्रकांत सोनावणे, चंद्रकांत पाटील, मंजुळा गावीत आणि तुळशीराम गावीत यांच्या स्वाक्षऱ्या असल्याची माहिती समोर आली होती. त्यामुळे अंतिम उमेदवारी याच नावांपैकी कोणाला मिळणार, अशी सर्वसाधारण अपेक्षा निर्माण झाली होती.
मात्र या सर्व चर्चांना छेद देत एकनाथ शिंदे यांनी शेवटच्या क्षणी सचिन अहिर यांना थेट निवडणूक अधिकाऱ्यांकडे नेऊन त्यांचा उमेदवारी अर्ज दाखल केला. या अनपेक्षित घडामोडीमुळे उपस्थित नेते, कार्यकर्ते तसेच राजकीय निरीक्षकही काही काळ संभ्रमात पडले. त्यानंतरच ठाकरे गटातील महत्त्वाचे नेते असलेले सचिन अहिर यांनी शिंदे गटात प्रवेश केल्याचे स्पष्ट झाले.
अलीकडील काळात शिवसेना (उद्धव बाळासाहेब ठाकरे) पक्षातील सहा खासदारांनी पक्ष सोडून शिंदे गटात प्रवेश केल्याची राजकीय चर्चा आधीच सुरू होती. त्यानंतर आता विधान परिषदेतील महत्त्वाचे आमदार सचिन अहिर यांनीही शिंदे गटाची वाट धरल्याने ठाकरे गटासाठी हा आणखी एक मोठा धक्का मानला जात आहे. याशिवाय विधानसभेतील काही आमदारही शिंदे गटाच्या संपर्कात असल्याची चर्चा राजकीय वर्तुळात सुरू असल्याने आगामी काळात आणखी राजकीय घडामोडी घडण्याची शक्यता व्यक्त केली जात आहे.
सचिन अहिर हे मुंबईतील वरळी परिसरातील प्रभावी राजकीय नेतृत्व म्हणून ओळखले जातात. स्थानिक पातळीवर मजबूत संघटनात्मक जाळे उभारण्यात त्यांची महत्त्वाची भूमिका राहिली आहे. कामगार संघटनांमध्येही त्यांचा प्रभाव मानला जातो. विशेषतः वरळी विधानसभा मतदारसंघात त्यांनी अनेक वर्षे पक्ष संघटना बळकट करण्यासाठी सातत्याने काम केले आहे. त्यामुळे स्थानिक कार्यकर्त्यांमध्ये त्यांचा प्रभाव लक्षणीय असल्याचे मानले जाते.
राजकीय जाणकारांच्या मते, वरळी विधानसभा मतदारसंघात आदित्य ठाकरे यांच्या राजकीय बळकटीमध्ये सचिन अहिर यांच्या संघटनात्मक कामाचा महत्त्वाचा वाटा होता. त्यामुळे त्यांच्या पक्षांतराचा परिणाम केवळ विधान परिषद किंवा पक्षीय समीकरणांपुरता मर्यादित राहणार नसून, मुंबईतील विशेषतः वरळी आणि दक्षिण मुंबईतील राजकीय समीकरणांवरही त्याचे परिणाम दिसून येऊ शकतात. या भागात शिंदे गटाची संघटनात्मक ताकद वाढण्यास या घडामोडीचा हातभार लागू शकतो, अशीही चर्चा सुरू आहे.
