Ayushman Bharat Card Process: भारत सरकारची ‘आयुष्मान भारत योजना’ गरीब आणि मध्यमवर्गीय कुटुंबांसाठी एक मोठे वरदान ठरत आहे. या योजनेअंतर्गत पात्र कुटुंबांना दरवर्षी 5 लाख रुपयांपर्यंत मोफत उपचारांची सुविधा मिळते. मात्र, बऱ्याचदा कुटुंबात लग्न होऊन आलेल्या नवीन सुनेचे किंवा नवजात बाळाचे नाव या यादीत समाविष्ट नसते. परिणामी, ते या मोफत आरोग्य विम्याच्या लाभापासून वंचित राहतात.
जर तुमच्याही कुटुंबात अशा प्रकारे एखाद्या सदस्याचे नाव जोडायचे राहिले असेल, तर आता काळजी करण्याची गरज नाही. कोणत्याही शासकीय कार्यालयात न जाता तुम्ही स्वतःच्या स्मार्टफोन किंवा लॅपटॉपच्या मदतीने घरबसल्या ऑनलाईन पद्धतीने नवीन सदस्याचे नाव जोडू शकता.
नाव नोंदणीसाठी लागणारी आवश्यक कागदपत्रे
ऑनलाईन अर्ज सुरू करण्यापूर्वी तुमच्याकडे पुढील कागदपत्रे असणे आवश्यक आहे:
- ओळखपत्र: ज्या सदस्याचे नाव जोडायचे आहे त्याचे आधार कार्ड. (लक्षात ठेवा की आधार कार्डशी मोबाईल नंबर लिंक असणे गरजेचे आहे, कारण त्यावर ओटीपी येईल).
- रेशन कार्ड: कुटुंबाचे रेशन कार्ड किंवा फॅमिली आयडी, ज्यामध्ये त्या नवीन सदस्याच्या नावाची नोंद असणे आवश्यक आहे.
- फोटो: संबंधित सदस्याचा पासपोर्ट आकाराचा फोटो किंवा लाईव्ह फोटो काढण्याची सुविधा.
- इतर पुरावे: गरजेनुसार जन्माचा दाखला किंवा विवाह प्रमाणपत्र जोडणे आवश्यक ठरू शकते.
नाव जोडण्याची स्टेप-बाय-स्टेप ऑनलाईन प्रक्रिया
शासनाने हे पोर्टल अत्यंत सोपे आणि युझर-फ्रेंडली बनवले आहे. तुम्ही खालील स्टेप्स फॉलो करून नाव जोडू शकता:
- पोर्टलला भेट द्या: सर्वप्रथम भारत सरकारच्या अधिकृत बेनेफिशिअरी पोर्टल beneficiary.nha.gov.in वर जा.
- लॉगिन करा: होमपेजवर ‘Beneficiary’ हा पर्याय निवडा. त्यानंतर तुमचा चालू मोबाईल नंबर टाकून त्यावर आलेला ओटीपी प्रविष्ट करा आणि लॉगिन पूर्ण करा.
- माहिती भरा: लॉगिन झाल्यानंतर स्क्रीनवर तुमचे राज्य, योजनेचे नाव (PMJAY) आणि तुमचा जिल्हा निवडा.
- कुटुंब शोधा: सर्च बारमध्ये तुमच्या रेशन कार्डचा नंबर किंवा आधीच नाव असलेल्या कोणत्याही सदस्याचा आधार नंबर टाकून तुमच्या कुटुंबाची माहिती शोधा.
- सदस्य जोडा: माहिती समोर येताच कुटुंबातील सर्व सदस्यांची यादी दिसेल. त्याच यादीच्या बाजूला तुम्हाला ‘Add Member’ असा पर्याय मिळेल, त्यावर क्लिक करा.
- वेरिफिकेशन: आता नवीन सदस्याचा आधार नंबर टाका आणि आधार ओटीपीच्या माध्यमातून त्याचे व्हेरिफिकेशन करा.
- फोटो आणि डॉक्युमेंट अपलोड: व्हेरिफिकेशन पूर्ण झाल्यावर सदस्याचा लाईव्ह फोटो घ्या आणि रेशन कार्ड किंवा इतर आवश्यक प्रमाणपत्र पीडीएफ अथवा इमेज फॉरमॅटमध्ये अपलोड करा.
- अर्ज सबमिट करा: शेवटी सर्व माहिती पुन्हा एकदा तपासून घ्या आणि फॉर्म सबमिट करा.
अर्ज केल्यानंतर पुढे काय होते?
तुम्ही अर्ज सबमिट केल्यानंतर, नॅशनल हेल्थ ऑथॉरिटीच्या (NHA) अधिकाऱ्यांकडून तुमच्या कागदपत्रांची तपासणी केली जाईल. तुम्ही दिलेली माहिती आणि रेशन कार्डवरील तपशील योग्य आढळल्यास, काही दिवसांतच नवीन सदस्याचे नाव या योजनेत मंजूर केले जाईल. नाव मंजूर झाल्यावर तुम्ही याच पोर्टलवरून त्यांचे नवीन आयुष्मान कार्ड सहज डाऊनलोड करू शकता.
विशेष म्हणजे, या सरकारी योजनेत कुटुंबातील सदस्यांच्या संख्येवर कोणतीही मर्यादा घालण्यात आलेली नाही. रेशन कार्डमध्ये नोंद असलेले सर्व सदस्य या योजनेचा लाभ घेण्यास पात्र आहेत.
तांत्रिक अडचण आल्यास येथे साधा संपर्क
जर तुम्हाला ऑनलाईन अर्ज करताना कोणतीही तांत्रिक अडचण येत असेल, तर तुम्ही तुमच्या जवळच्या सीएससी (Common Service Center) म्हणजेच ग्राहक सेवा केंद्रावर जाऊन देखील हे नाव जोडून घेऊ शकता. याशिवाय कोणत्याही प्रकारच्या तक्रारीसाठी किंवा मदतीसाठी तुम्ही राष्ट्रीय टोल-फ्री हेल्पलाईन नंबर 14555 वर कॉल करू शकता.
