Novo Nordisk Awiqli Launch: मधुमेहाशी लढा देणाऱ्या कोट्यवधी रुग्णांसाठी वैद्यकीय विश्वातून एक अत्यंत दिलासादायक आणि क्रांतिकारी बातमी समोर आली आहे. डॅनिश औषध निर्माता कंपनी नोव्हो नॉर्डिस्कने भारतात Awiqli (इन्सुलिन आयकोडेक) अधिकृतपणे लाँच केले आहे. हे प्रौढ रुग्णांमधील टाईप 1 आणि टाईप 2 मधुमेहाच्या उपचारासाठी जगातील पहिले ‘आठवड्यातून एकदाच’ घ्यायचे इन्सुलिन ठरले आहे.
या नवीन उपचार पद्धतीमुळे रुग्णांना आता वर्षातील 365 दिवस दररोज इन्सुलिन टोचून घेण्याची गरज उरणार नाही. त्याऐवजी वर्षातून फक्त 52 वेळा म्हणजेच आठवड्यातून केवळ एकदाच हे इन्सुलिन घ्यावे लागेल. यामुळे इन्सुलिन घेण्याच्या शारीरिक आणि मानसिक त्रासातून रुग्णांची मोठी सुटका होणार आहे.
दैनंदिन खर्चापेक्षा ३० ते ४० टक्के स्वस्त; किंमत ऐकून डॉक्टरही थक्क
भारतात अनेक रुग्ण रोज सुई टोचण्याच्या भीतीपोटी इन्सुलिन उपचार सुरू करण्यास सरासरी 7 ते 9 वर्षे उशीर करतात. हाच अडथळा दूर करण्यासाठी कंपनीने हे पाऊल उचलले असून याची किंमतही सर्वांना परवडणारी ठेवली आहे:
- पॅकची किंमत: या इन्सुलिनच्या 700 युनिट्सच्या एका पॅकची किंमत 2,611 रुपये असेल. म्हणजेच प्रति युनिटचा खर्च अवघा 3.73 रुपये येतो.
- खर्चाची बचत: सध्या बाजारात उपलब्ध असलेल्या दररोजच्या इन्सुलिनच्या तुलनेत ही नवीन साप्ताहिक पद्धत सुमारे 30 ते 40 टक्क्यांनी स्वस्त पडणार आहे.
- साप्ताहिक खर्च: मधुमेहाचे व्यवस्थापन करताना अनेक रुग्णांना दररोज 10 युनिट्सची आवश्यकता असते. अशा रुग्णांना आठवड्याला 70 युनिट्सची गरज पडेल, ज्याचा साप्ताहिक खर्च साधारण 261 रुपये येईल.
मुंबईतील तज्ज्ञ डॉक्टरांच्या मते, या अत्यंत प्रगत औषधाची किंमत रोजच्या इन्सुलिनच्या अगदी जवळ ठेवली गेल्यामुळे हा शोध केवळ श्रीमंतांपुरता मर्यादित न राहता सर्वसामान्य रुग्णांपर्यंत सहज पोहोचू शकेल.
पेन डिव्हाईसच्या मदतीने वापरणे सोपे; उपचाराचा ताण होणार कमी
नेहमीच्या पारंपारिक इन्सुलिनच्या विरुद्ध, हे नवीन इन्सुलिनआठवड्यातून एकदा ‘फ्लेक्सटच’ नावाच्या एका विशेष पेन डिव्हाईसच्या माध्यमातून दिले जाईल. यामुळे औषध घेण्याची पद्धत अत्यंत सोपी झाली असून, जे रुग्ण रोज औषध घेण्यास टाळाटाळ करतात त्यांच्या आरोग्यात वेळेवर सुधारणा करणे शक्य होईल.
क्लिनिकल चाचण्यांच्या डेटावरून असे दिसून आले आहे की, दररोज घेतल्या जाणाऱ्या इन्सुलिनच्या तुलनेत ‘अविग्ली’ रक्तातील साखरेचे प्रमाण (HbA1c) नियंत्रित ठेवण्यात अधिक प्रभावी ठरले आहे. तसेच रुग्णांची साखर अचानक खालावण्याचा धोका न वाढवता हे औषध सुरक्षितपणे काम करते.
भारतातील वाढता धोका आणि इन्सुलिनची गरज
भारतात सध्या मधुमेहाचा धोका अत्यंत वेगाने वाढत आहे. आकडेवारीनुसार, देशात सुमारे 10.1 कोटी लोक मधुमेहाने ग्रस्त आहेत, तर 13.6 कोटी लोक प्री-डायबिटीजच्या छायेत आहेत. याशिवाय, शरीरात इन्सुलिन तयार न होणाऱ्या ‘टाईप 1’ प्रकारच्या रुग्णांची संख्या 9 लाखांपेक्षा जास्त आहे, ज्यांचा संपूर्ण उपचार इन्सुलिनवरच अवलंबून असतो.
भारतात सध्या सुमारे 60 लाख लोक इन्सुलिन घेतात, परंतु प्रत्यक्षात यापेक्षा दुप्पट लोकांना याची गरज आहे. भारतात वापरल्या जाणाऱ्या अव्वल ५ इन्सुलिन ब्रँडपैकी ४ ब्रँड हे नोव्हो नॉर्डिस्क कंपनीचेच आहेत आणि या औषधांच्या वितरणासाठी कंपनीने अॅबॉटसोबत भागीदारी केली आहे. या नवीन आठवड्याच्या इन्सुलिनमुळे भारतातील मधुमेहाच्या उपचाराला एक नवीन दिशा मिळणार आहे.
