Government Savings Schemes: जर तुम्हाला तुमचे पैसे पूर्णपणे सुरक्षित ठेवून त्यावर बँकेच्या मुदत ठेवींपेक्षा (FD) जास्त परतावा मिळवायचा असेल, तर केंद्र सरकारच्या बचत योजना तुमच्यासाठी उत्तम पर्याय आहेत. भारतात सध्या अशा अनेक योजना आहेत, ज्या वार्षिक 7.5 टक्क्यांपासून 8.2 टक्क्यांपर्यंत व्याज देत आहेत. कमी जोखीम आणि कर सवलतीचा फायदा शोधणाऱ्या गुंतवणूकदारांसाठी या योजना फायदेशीर ठरतात.
1. ज्येष्ठ नागरिक बचत योजना (SCSS)
ज्येष्ठ नागरिकांसाठी ही सर्वात सुरक्षित आणि फायदेशीर योजना आहे.
- व्याजदर: सध्या या योजनेत वार्षिक 8.2 टक्के दराने व्याज मिळत आहे.
- गुंतवणूक: किमान 1,000 रुपये आणि कमाल 30 लाख रुपयांपर्यंत गुंतवणूक करता येते.
- कालावधी: ही योजना 5 वर्षांसाठी असते, जी पुढे 3 वर्षांसाठी वाढवता येते. 60 वर्षे किंवा त्याहून अधिक वयाचे नागरिक यात गुंतवणूक करू शकतात.
2. सुकन्या समृद्धी योजना (SSY)
मुलींच्या भविष्यासाठी आणि शिक्षणासाठी ही योजना विशेष लोकप्रिय आहे.
- व्याजदर: या योजनेत वार्षिक 8.2 टक्के दराने व्याज दिले जाते.
- गुंतवणूक: वर्षाला किमान 250 रुपये आणि कमाल 1.5 लाख रुपये गुंतवता येतात.
- फायदा: 21 वर्षे पूर्ण झाल्यावर ही योजना मॅच्युअर होते. यात जमा केलेली रक्कम आणि मिळणारे व्याज पूर्णपणे करमुक्त असते.
3. नॅशनल सेविंग्स सर्टिफिकेट (NSC)
निश्चित कालावधीत सुरक्षित परतावा हवा असणाऱ्यांसाठी हा एक चांगला पर्याय आहे.
- व्याजदर: यामध्ये वार्षिक 7.7 टक्के व्याज मिळते.
- गुंतवणूक: किमान 1,000 रुपयांपासून सुरुवात करता येते आणि गुंतवणुकीची कोणतीही कमाल मर्यादा नाही.
- कालावधी: याचा लॉक-इन कालावधी 5 वर्षांचा असून व्याज मॅच्युरिटीवर दिले जाते.
4. किसान विकास पत्र (KVP)
तुमचे पैसे दुप्पट करण्यासाठी ही योजना ओळखली जाते.
- व्याजदर: यामध्ये वार्षिक 7.5 टक्के व्याज मिळते.
- दुप्पट रक्कम: तुमची गुंतवणूक साधारणपणे 115 महिन्यांत (9 वर्षे 5 महिने) दुप्पट होते.
- नियम: किमान गुंतवणूक 1,000 रुपये असून मोठी रक्कम गुंतवण्यासाठी पॅन कार्ड आणि उत्पन्नाचे दाखले देणे आवश्यक असते.
5. RBI फ्लोटिंग रेट बॉन्ड्स
रिझर्व्ह बँक ऑफ इंडियाद्वारे जारी केलेले हे बॉन्ड्स सध्या वार्षिक 8.05 टक्के दराने व्याज देत आहेत. याचा कालावधी 7 वर्षांचा असून गुंतवणुकीची कोणतीही कमाल मर्यादा नाही. ज्यांना बँकेपेक्षा जास्त व्याज हवे आहे, त्यांच्यासाठी हा सुरक्षित पर्याय आहे.
हे देखील वाचा – Mamata Banerjee: ममता बॅनर्जींनी अखेर स्वीकारला पराभव? ‘X’ वरील बायोमध्ये केला ‘हा’ मोठा बदल
