Onion Chutney Recipe: दक्षिण भारतीय खाद्यपदार्थ केवळ भारतातच नाही, तर संपूर्ण जगभरात अत्यंत लोकप्रिय आहेत. गरमागरम इडली, कुरकुरीत डोसा, नीर डोसा किंवा उत्तप्पा खायला लहानांपासून मोठ्यांपर्यंत सर्वांनाच आवडते. सामान्यतः या पदार्थांसोबत पांढऱ्या रंगाची खोबऱ्याची चटणी बनवली जाते. विशेषतः तामिळनाडूमध्ये प्रत्येक घरात आणि हॉटेलमध्ये ही पारंपरिक चटणी आवर्जून वाढली जाते.
परंतु, नेहमी नेहमी तीच खोबऱ्याची चटणी खाऊन अनेकदा कंटाळा येतो. शिवाय, काही लोकांना खोबऱ्याच्या अतिवापरामुळे अॅसिडिटी किंवा पित्ताचा त्रास होण्याची शक्यता असते. जर तुम्हालाही चवीत काहीतरी नवीन आणि चटकदार हवे असेल, तर तुम्ही दक्षिण भारतीय पद्धतीची चमचमीत कांद्याची चटणी बनवू शकता. ही चटणी चवीला जितकी उत्तम लागते, तितकीच ती बनवायलाही सोपी आहे.
कांद्याची चटणी बनवण्यासाठी लागणारे आवश्यक साहित्य
घरच्या घरी हॉटेलसारखी चवदार चटणी तयार करण्यासाठी खालील साहित्य गोळा करून ठेवा:
- कांदा (उभा चिरलेला)
- टोमॅटो
- हिरव्या मिरच्या आणि सुक्या लाल मिरच्या
- भाजलेले शेंगदाणे
- लसणाच्या पाकळ्या
- कढीपत्ता आणि फ्रेश कोथिंबीर
- जिरे
- हळद आणि लाल तिखट
- मीठ (चवीनुसार)
- तेल (फोडणीसाठी)
चमचमीत चटणी बनवण्याची सर्वात सोपी कृती
कांद्याची ही पारंपरिक चटणी बनवण्यासाठी खालील स्टेप्स फॉलो करा:
- १. पेस्ट तयार करा: सर्वात आधी मिक्सरच्या भांड्यात उभा चिरलेला कांदा, हिरवी मिरची, भाजलेले शेंगदाणे, लसूण, कढीपत्ता, कोथिंबीर, हळद, लाल तिखट आणि चवीनुसार मीठ एकत्र करून घ्या. पाण्याचा थेंबही न टाकता हे मिश्रण मिक्सरला जाडसर बारीक वाटून घ्या. पाणी घातल्यास चटणी जास्त पातळ होईल आणि चव बिघडेल.
- २. फोडणीची तयारी: आता गॅसवर एक कढई गरम करायला ठेवा. कढईमध्ये थोडे तेल गरम करून त्यात जिरे आणि सुक्या लाल मिरच्या घालून चांगला तडतडा तडतडू द्या.
- ३. मिश्रण परतून घ्या: या खमंग फोडणीमध्ये मिक्सरमधून काढलेली कांद्याची पेस्ट टाका. मंद आचेवर हे मिश्रण तेल सुटेपर्यंत चांगले परतून घ्या. कांद्याचा कच्चा वास जाईपर्यंत ते व्यवस्थित शिजवणे गरजेचे आहे.
- ४. कोथिंबीर घालून सर्व्ह करा: चटणीला तेल सुटल्यानंतर गॅस बंद करा आणि वरून बारीक चिरलेली फ्रेश कोथिंबीर घालून व्यवस्थित मिक्स करा.
तुमची तामिळ पद्धतीची खमंग आणि पारंपारिक कांद्याची चटणी तयार आहे. ही चटणी तुम्ही केवळ इडली किंवा डोशासोबतच नाही, तर गरमागरम भाकरी, चपाती किंवा भातासोबतही तोंडी लावण्यासाठी खाऊ शकता.
