Dharavi Redevelopment Notice: आशियातील सर्वात मोठी झोपडपट्टी असलेल्या धारावीच्या पुनर्विकास प्रकल्पाने आता खऱ्या अर्थाने गती घेतली आहे. मुंबई महानगरपालिकेने (BMC) धारावीतील शाहूनगर भागात राहणाऱ्या नागरिकांना पुनर्विकासाच्या कामासाठी आपली घरे रिकामी करण्याच्या नोटीस बजावण्यास सुरुवात केली आहे. या अधिकृत कारवाईमुळे अनेक वर्षांपासून केवळ कागदावर असलेला हा प्रकल्प आता प्रत्यक्ष अंमलबजावणीच्या टप्प्यात पोहोचला आहे.
यापूर्वी गेल्या महिन्यात सेक्टर 6 मधील नागरिकांनाही अशाच प्रकारच्या नोटीस देण्यात आल्या होत्या. धारावीतील जमीन लवकरात लवकर खुली करून तिथे प्रत्यक्ष बांधकाम सुरू करणे, जेणेकरून मूळ रहिवाशांना हक्काची पक्की घरे वेळेत मिळतील, हा या मोहिमेमागील सरकारचा मुख्य उद्देश आहे. मुख्यमंत्री देवेंद्र फडणवीस यांनी नुकतेच 2028 पर्यंत धारावीकरांना 10,000 घरे उपलब्ध करून देण्याचे उद्दिष्ट ठेवले होते, त्यादृष्टीने हे मोठे पाऊल मानले जात आहे.
Dharavi Redevelopment Notice: ९०० भाडेकरूंना स्थलांतरित व्हावे लागणार; म्हाडाच्या इमारतीत सोय
या नवीन मोहिमेचा फायदा शाहूनगरमधील सुमारे 900 बीएमसी भाडेकरूंना होणार आहे. त्यांना तात्पुरत्या स्वरूपात इतरत्र हलवले जाईल. रहिवाशांसाठी सरकारने खालील दोन पर्याय दिले आहेत:
- म्हाडाचे ट्रान्झिट कॅम्प: जे नागरिक तात्पुरत्या निवासाचा पर्याय निवडतील, त्यांना धारावीच्याच सेक्टर 5 मधील म्हाडाच्या इमारतींमध्ये घरे दिली जातील. यासाठी 500 सदनिका आधीच तयार ठेवण्यात आल्या आहेत.
- भाड्याचे घर: ट्रान्झिट कॅम्पमध्ये न जाणाऱ्या नागरिकांना स्वतःचे भाड्याचे घर शोधण्याची मुभा असेल, ज्याचा खर्च सरकार उचलणार आहे.
घरे रिकामी करण्यापूर्वी प्रत्येक रहिवाशासोबत कायदेशीर करार केला जाईल. यामध्ये तात्पुरत्या स्थलांतराचे नियम आणि त्यांना मिळणाऱ्या कायमस्वरूपी घराची लेखी हमी असेल. काम सुरू झाल्याचे प्रमाणपत्र मिळाल्यापासून पुढील 5 वर्षांच्या आत शाहूनगरच्या नागरिकांना याच परिसरात नवीन पक्की घरे दिली जातील.
Dharavi Redevelopment Notice: दरमहा ३०,००० रुपयांपर्यंत मिळणार भाडे
स्थलांतरित होणाऱ्या कुटुंबांना कोणताही आर्थिक त्रास होऊ नये म्हणून सरकारने आकर्षक आर्थिक पॅकेज जाहीर केले आहे:
- २७५ चौ.फूट पर्यंतचे घर: या कुटुंबांना दरमहा 22,000 रुपये भाडे भत्ता दिला जाईल.
- ३७५ चौ.फूट पर्यंतचे घर: या कुटुंबांना दरमहा 30,000 रुपये महिना भाडे मिळेल.
- दरवर्षी वाढ: या घराच्या भाड्यात दरवर्षी 5 टक्के वाढ केली जाईल.
- सामान हलवण्याचा खर्च: तुम्ही ट्रान्झिट कॅम्पमध्ये जा किंवा स्वतःचे भाड्याचे घर शोधा, प्रत्येक कुटुंबाला सामान हलवण्यासाठी एकवेळचा 15,000 रुपये भत्ता दिला जाईल.
Dharavi Redevelopment Notice: मिळणार ५०० चौ.फुटांचे हक्काचे मोठे घर
पुनर्विकास पूर्ण झाल्यानंतर शाहूनगरच्या रहिवाशांना सध्याच्या घरापेक्षा खूप मोठे आणि दर्जेदार घर मिळणार आहे. या प्रकल्पांतर्गत रहिवाशांना किमान 500 चौरस फूट चटई क्षेत्र (कारपेट एरिया) असलेले घर दिले जाईल. जर कोणाचे सध्याचे घर मोठे असेल, तर त्यांना जुन्या घराच्या 1.35 पट मोठे घर दिले जाईल, जेणेकरून कोणाचेही नुकसान होणार नाही. हे संपूर्ण स्थलांतर नागरिकांना त्रास होणार नाही अशा पद्धतीने टप्प्याटप्प्याने पार पाडले जाईल, असे प्रशासनाने स्पष्ट केले आहे.
हे देखील वाचा – ODI World Cup 2027: क्रिकेट चाहत्यांची प्रतीक्षा संपली! वन-डे विश्वचषक 2027 च्या तारखा जाहीर; 14 संघांमध्ये रंगणार महामुकाबला
