Sting Energy Drink Ban: बाजारात ग्राहकांची दिशाभूल करणाऱ्या पेयांविरोधात अन्न व औषध प्रशासनाने (FDA) आतापर्यंतची सर्वात मोठी मोहीम उघडली आहे. स्वतःला ‘एनर्जी ड्रिंक’ म्हणून विकणाऱ्या शीतपेय कंपन्यांवर प्रशासनाने थेट कायदेशीर बडगा उगारला आहे.
अन्न सुरक्षा आणि मानके प्राधिकरणाच्या (FSSAI) नियमांचे उल्लंघन होत असल्याचे समोर आल्यानंतर, नामांकित ब्रँड्सना त्यांच्या वेष्टनावरून (लेबल) ‘एनर्जी ड्रिंक’ हा शब्द तातडीने हटवण्याचे आदेश देण्यात आले आहेत. प्रशासनाच्या या आक्रमक भूमिकेमुळे ग्राहकांची फसवणूक करणाऱ्या पेयांची मनमानी विक्री आता पूर्णपणे रोखली जाणार आहे.
पेप्सिको आणि रेड बूलसह १२ बड्या ब्रँड्सना कायदेशीर नोटीस
अन्न व औषध प्रशासन विभागाचे सचिव तुकाराम मुंढे यांनी ‘सेव्ह ड्रग, सेव्ह फूड’ या मोहिमेची घोषणा करत कॉर्पोरेट कंपन्यांना कडक इशारा दिला आहे. या कारवाईचे प्रमुख मुद्दे खालीलप्रमाणे आहेत:
- कंपन्यांना नोटीस: पेप्सिको, रेड बूल आणि स्टिंग यांसारख्या बाजारावर पकड असलेल्या साधारण 10 ते 12 कंपन्यांना 30 जून रोजीच अधिकृत नोटिसा पाठवण्यात आल्या आहेत.
- शब्दाच्या वापरावर बंदी: एफएसएसएआयच्या नियमांनुसार या पेयांना ‘एनर्जी ड्रिंक’ हा शब्द वापरण्याचा कोणताही कायदेशीर अधिकार नाही. त्यामुळे उत्पादनावरील हा शब्द आता बंद करावाच लागेल, असे प्रशासनाने स्पष्ट केले आहे.
केवळ लेबल बदलण्यावरच न थांबता, शालेय विद्यार्थ्यांच्या आरोग्याचे रक्षण करण्यासाठी प्रशासनाने थेट मैदानावर उतरण्याचा निर्णय घेतला आहे. विधिमंडळात आमदार विक्रम पाचपुते यांनी उपस्थित केलेल्या प्रश्नावर मंत्री नरहरी झिरवाळ यांनी दिलेल्या निर्देशांची आता कडक अंमलबजावणी केली जात आहे:
नवे आदेश जारी होणार: शाळा परिसरातील सुरक्षेचा आणि एफडीएच्या कारवाईचा अचूक आराखडा स्पष्ट करणारा एक सविस्तर अधिकृत आदेश लवकरच जारी केला जाणार आहे.
५०० मीटरची लक्ष्मणरेषा: कोणत्याही शाळेच्या मुख्य परिसरापासून 500 मीटरच्या आत स्टिंग किंवा या श्रेणीतील इतर कोणत्याही शीतपेयाची विक्री करण्यास पूर्णपणे मनाई असेल.
मुख्याध्यापकांना अधिकार: जर एखाद्या शाळेच्या अवतीभवती या नियमांचे उल्लंघन होत असेल, तर संबंधित मुख्याध्यापकांनी थेट एफडीएकडे तक्रार नोंदवावी.
