Marathi Chitrapat Mahamandal : मराठी चित्रपटसृष्टीची शिखर संस्था असलेल्या अखिल भारतीय मराठी चित्रपट महामंडळाच्या अत्यंत चुरशीच्या ठरलेल्या पंचवार्षिक निवडणुकीचा निकाल अखेर जाहीर झाला आहे. या निवडणुकीत चित्रपट निर्माते मेघराज राजेभोसले यांच्या नेतृत्वाखालील ‘समर्थ पॅनेल’ने सर्वच्या सर्व जागांवर एकहाती आणि ऐतिहासिक विजय संपादन करत महामंडळावर आपली सत्ता पुन्हा एकदा प्रस्थापित केली आहे. महामंडळाच्या संचालक मंडळाच्या एकूण १७ जागांसाठी ही निवडणूक प्रक्रिया पार पडली. या १७ जागांपैकी ३ जागा पूर्वीच बिनविरोध झाल्यामुळे उर्वरित १४ जागांसाठी थेट आणि अटीतटीची निवडणूक झाली होती. मतमोजणीअंती या सर्व १४ जागांवर समर्थ पॅनेलच्या उमेदवारांनी विरोधकांचा धुव्वा उडवत दणदणीत विजय मिळवला आणि महामंडळावरील आपले निर्विवाद वर्चस्व सिद्ध केले.
या निवडणुकीत समर्थ पॅनेलच्या वतीने विजयी झालेल्या उमेदवारांमध्ये स्वतः मेघराज राजेभोसले यांच्यासह सुनील महाजन, दीपक कदम, अजित शिरोळे, राज काजी, सुशांत शेलार, धनाजी यमकर, सुभाष नकाशे, शरद चव्हाण, प्रवीण पाटील, चैत्राली डोंगरे, रवींद्र गावडे, गणेश गारगोटे आणि विकास तोरणे या चित्रपटसृष्टीतील नामांकित चेहऱ्यांचा समावेश आहे. दुसरीकडे, राजेभोसले यांच्या पॅनेलला तगडे आव्हान देणाऱ्या विरोधी ‘चित्रकर्मी पॅनेल’ला या निवडणुकीत दारुण पराभवाचा सामना करावा लागला असून, त्यांना आपले खातेही उघडता आले नाही. चित्रकर्मी पॅनेलचे प्रमुख आणि चित्रपटसृष्टीतील दिग्गज मानले जाणारे अभिनेते आनंद काळे, ज्येष्ठ लेखक पितांबर काळे, निर्माते गणेश तळेकर, विजय शिंदे, दिग्दर्शक सतीश रणदिवे, कला दिग्दर्शक सतीश बिडकर आणि रणजीत जाधव यांसारख्या आघाडीच्या उमेदवारांना पराभवाचा धक्का बसला. या निवडणुकीत १६ अपक्ष उमेदवारांनीही आपले नशीब आजमावले होते, तर काही अपक्षांनी एकत्र येऊन तिसरा आघाडीचा पर्याय उभा करण्याचा प्रयत्न केला होता; मात्र मतदारांनी समर्थ पॅनेलच्या पाठीशी आपली ताकद उभी केल्यामुळे अपक्षांचा हा प्रयत्न देखील सपशेल अपयशी ठरला.
चित्रपट महामंडळाच्या या पंचवार्षिक निवडणुकीचे आणखी एक वैशिष्ट्य म्हणजे, प्रत्यक्ष मतदानापूर्वीच ३ जागांवर बिनविरोध निवड झाली होती. यामध्ये चित्रपटसृष्टीतील ज्येष्ठ अभिनेत्री वर्षा उसगावकर यांची ‘अभिनेत्री’ गटातून, तर ज्येष्ठ संकलक विजय खोचीकर यांची ‘संकलक’ गटातून आणि सुप्रसिद्ध गायक आनंद शिंदे यांची ‘गायक’ गटातून महामंडळावर बिनविरोध निवड झाली. या बिनविरोध निवडून आलेल्या सदस्यांपैकी संकलक विजय खोचीकर आणि गायक आनंद शिंदे हे दोघेही अधिकृतपणे मेघराज राजेभोसले यांच्या ‘समर्थ पॅनेल’चेच समर्थक असल्यामुळे, मतदानापूर्वीच समर्थ पॅनेलने निवडणुकीत आघाडी घेतली होती आणि निकालाच्या दिवशी त्यावर विजयाची अंतिम मोहर उमटवली.
दरम्यान, या संपूर्ण निवडणूक प्रक्रियेला विविध वाद आणि गंभीर आरोपांचे ग्रहण लागले होते, ज्यामुळे ही निवडणूक संपूर्ण महाराष्ट्रात गाजली. ज्येष्ठ अभिनेते विजय पाटकर यांनी या निवडणुकीत बाहेरील राजकीय शक्तींचा मोठ्या प्रमाणावर हस्तक्षेप होत असल्याचा अत्यंत खळबळजनक आरोप केला होता. विरोधी गटातील काही उमेदवारांना जाणीवपूर्वक त्यांचे उमेदवारी अर्ज दाखल करू न देणे, तसेच मतदारांवर विशिष्ट पॅनेलला मतदान करण्यासाठी विविध प्रकारे दबाव टाकण्यात आल्याचे गंभीर आक्षेपही प्रशासनावर घेण्यात आले होते. याशिवाय, प्रसिद्ध अभिनेत्री नीलम शिर्के यांच्या उमेदवारीवरूनही कायदेशीर आणि तांत्रिक वाद निर्माण झाला होता; या वाढत्या वादानंतर त्यांनी स्वतःहून निवडणुकीच्या रिंगणातून माघार घेण्याचा निर्णय घेतला होता. या सर्व अंतर्गत राजकीय घडामोडी, वादविवाद आणि आरोप-प्रत्यारोपांच्या धुराळ्यानंतर पार पडलेल्या या निवडणुकीत अखेर मराठी चित्रपटसृष्टीतील मतदारांनी मेघराज राजेभोसले यांच्या कामावर पुन्हा एकदा विश्वास दाखवत महामंडळाच्या चाव्या त्यांच्याच स्वाधीन केल्या आहेत.
