MPSC Group C Recruitment 2026: हाराष्ट्र लोकसेवा आयोगाच्या (MPSC) माध्यमातून सरकारी नोकरीचे स्वप्न पाहणाऱ्या उमेदवारांसाठी अत्यंत महत्त्वाची बातमी आहे. आयोगाने ‘महाराष्ट्र गट क सेवा संयुक्त पूर्व परीक्षा २०२६’ ची अधिकृत जाहिरात प्रसिद्ध केली आहे. या भव्य भरती प्रक्रियेअंतर्गत विविध विभागांमधील एकूण 2,619 रिक्त पदांची भरती केली जाणार आहे. या परीक्षेचे सर्वात मोठे वैशिष्ट्य म्हणजे यंदा ही परीक्षा पारंपारिक पद्धतीऐवजी संगणक आधारित ऑनलाइन पद्धतीने घेतली जाणार आहे.
या परीक्षेसाठी पात्र आणि इच्छुक उमेदवारांना आयोगाच्या अधिकृत संकेतस्थळावर जाऊन ऑनलाइन पद्धतीने अर्ज सादर करता येईल. अर्ज करण्याची सविस्तर मुदत आणि प्रक्रियेचे वेळापत्रक खालीलप्रमाणे जाहीर करण्यात आले आहे.
लिपिक-टंकलेखक आणि कर सहाय्यकांसह विविध पदांचा तपशील:
या जाहिरातीमध्ये विविध शासकीय विभागांमधील खालील संवर्गातील पदांचा समावेश करण्यात आला आहे:
- लिपिक-टंकलेखक (Clerk-Typist): सर्वाधिक म्हणजे 1,864 जागा.
- सहायक मोटार वाहन निरीक्षक (AMVI – गट क): 461 जागा.
- कर सहायक (Tax Assistant): 282 जागा.
- उद्योग निरीक्षक (Industry Inspector): 9 जागा.
- तांत्रिक सहाय्यक (Technical Assistant): 3 जागा.
अर्ज प्रक्रिया, फी भरण्याची मुदत आणि महत्त्वाच्या तारखा:
उमेदवारांनी अर्ज करताना आणि शुल्क भरताना खालील अंतिम मुदतींची नोंद घेणे आवश्यक आहे:
- ऑनलाइन अर्ज भरण्याची सुरुवात: 27 जून २०२६ पासून अर्ज लिंक उपलब्ध होईल.
- अर्ज करण्याची अंतिम तारीख: 13 जुलै २०२६ पर्यंत उमेदवारांना नोंदणी करता येईल.
- ऑनलाइन शुल्क भरण्याची मुदत: 17 जुलै २०२६ पर्यंत ऑनलाइन पद्धतीने फी भरता येईल.
- चलनाद्वारे शुल्क भरण्याची मुदत: बँकेत चलनाद्वारे फी भरायची असल्यास 20 जुलै २०२६ ही अंतिम तारीख असेल.
मुख्य परीक्षेच्या तारखांविषयी माहिती देताना आयोगाने स्पष्ट केले आहे की, पूर्व परीक्षेच्या गुणांच्या आधारे जे उमेदवार पात्र ठरतील, त्यांच्यासाठी मुख्य परीक्षेचा दिनांक नंतर स्वतंत्रपणे जाहीर केला जाईल.
पदसंख्येत वाढ होण्याची शक्यता; उमेदवारांसाठी महत्त्वाची सूचना
आयोगाने जाहिरातीत स्पष्ट नमूद केले आहे की, सध्या जाहीर झालेली पदसंख्या ही अंतिम नसून, शासनाच्या संबंधित विभागांच्या सूचनेनुसार पदसंख्या आणि आरक्षणामध्ये बदल किंवा वाढ होण्याची दाट शक्यता आहे. पूर्व परीक्षेचा निकाल अंतिम होईपर्यंतच्या कालावधीत जर कोणत्याही विभागाकडून अतिरिक्त मागणीपत्र प्राप्त झाले, तर त्या जागांचा समावेश याच भरती प्रक्रियेत केला जाईल. या बदलांचे शुद्धिपत्रक पूर्व परीक्षेच्या निकालापूर्वी प्रसिद्ध केले जाईल.
त्यामुळे, एखाद्या विशिष्ट पदासाठी सध्या जागा कमी आहेत किंवा आरक्षण नाही, म्हणून अर्ज न करण्याची चूक उमेदवारांनी करू नये. नंतरच्या टप्प्यात जागा वाढल्यास अर्ज न केलेल्या उमेदवारांच्या तक्रारी किंवा निवडीची संधी हुकल्याची कोणतीही दाद घेतली जाणार नाही, असे आयोगाने स्पष्टपणे बजावले आहे.
