Raigad Flood: रायगड जिल्ह्यात कोसळत असलेल्या मुसळधार पावसामुळे पनवेल जवळील चावणे येथील एचपीसीएल (HPCL) पाताळगंगा एलपीजी बॉटलिंग प्लांटमध्ये एक मोठी आणि चिंताजनक दुर्घटना घडली आहे. अतिवृष्टीमुळे निर्माण झालेल्या पूरपरिस्थितीत प्लांटमध्ये साठवून ठेवलेले तब्बल 3,000 गॅस सिलेंडर पाताळगंगा नदीच्या वेगवान प्रवाहात वाहून गेले आहेत. यामध्ये काही भरलेले तर काही रिकामे सिलेंडर असल्याचे जिल्हा प्रशासनाने स्पष्ट केले आहे.
ही घटना समोर आल्यानंतर रायगडचे जिल्हाधिकारी किशन जावळे यांनी नदीकाठच्या सर्व गावांना तातडीने सतर्कतेचा इशारा दिला आहे. कोणत्याही नागरिकाने नदीत किंवा पाण्याच्या प्रवाहात वाहून येणाऱ्या सिलेंडरला स्पर्श करू नये, असे कडक आवाहन प्रशासनाकडून करण्यात आले आहे.
गॅस गळतीचा धोका; उत्सुकतेपोटी सिलेंडर घरी नेणे ठरेल जीवघेणे!
चावणे येथील अतिरिक्त एमआयडीसी (MIDC) परिसरातील प्लॉट क्रमांक ई-1/7 मधून हे सिलेंडर पाण्याच्या प्रचंड प्रवाहामुळे वाहून गेले आहेत. हे सिलेंडर नदीकाठच्या वेगवेगळ्या गावांमध्ये वाहून येण्याची दाट शक्यता आहे.
जिल्हाधिकाऱ्यांनी दिलेला महत्त्वाचा इशारा:
- सुरक्षिततेची हमी नाही: पाण्यात वाहून आलेल्या सिलेंडरमध्ये गॅस शिल्लक आहे की नाही, किंवा त्याचा व्हॉल्व्ह सुरक्षित स्थितीत आहे का, याची कोणतीही खात्री नसते.
- अचानक स्फोटाची भीती: केवळ उत्सुकतेपोटी किंवा मोफत मिळतात म्हणून हे सिलेंडर उचलणे, हलवणे, ते उघडण्याचा प्रयत्न करणे किंवा थेट घरी घेऊन जाणे अत्यंत धोकादायक ठरू शकते. यामुळे गॅस गळती होऊन मोठी दुर्घटना घडू शकते.
सिलेंडर सापडल्यास कुठे संपर्क करावा?
प्रशासनाने नागरिकांना आवाहन केले आहे की, जर कोणाला हे सिलेंडर सापडले तर त्यांनी ते स्वतःजवळ लपवून न ठेवता खालील ठिकाणी जमा करावेत किंवा माहिती द्यावी:
- एचपीसीएल (HPCL) कंपनी किंवा जवळचे एचपीसीएल गॅस वितरक.
- तहसीलदार कार्यालय (खालापूर किंवा पेण).
- उपविभागीय अधिकारी कार्यालय (पेण).
नागरिकांनी या संदर्भातील कोणतीही माहिती तातडीने स्थानिक महसूल विभाग, पोलीस किंवा जिल्हा आपत्ती व्यवस्थापन यंत्रणेला द्यावी आणि कोणत्याही अफवांवर विश्वास ठेवू नये.
प्रशासनाकडून शोधमोहीम सुरू; सोशल मीडियावर व्हिडिओ व्हायरल
नदीपात्रात सध्या मुसळधार पावसामुळे अनेक प्रकारच्या वस्तू वाहून येत आहेत. त्यामुळे कोणत्याही संशयास्पद वस्तूला हात न लावता नागरिकांनी स्वतःच्या जीवाला प्राधान्य द्यावे, असे प्रशासनाने म्हटले आहे. सध्या सरकारी यंत्रणांमार्फत हे सर्व सिलेंडर शोधून सुरक्षितपणे ताब्यात घेण्याचे काम वेगाने सुरू आहे.
दरम्यान, पाताळगंगा नदीत हजारो सिलेंडर वाहून जातानाचे थरारक फोटो आणि व्हिडिओ सोशल मीडियावर प्रचंड व्हायरल झाले आहेत. हे दृश्य पाहिल्यानंतर रायगड जिल्ह्यातील पुराची भीषणता किती भयानक आहे, याचा अंदाज येतो.
