Sanjay Raut : महाराष्ट्राच्या राजकीय पटलावर गेल्या काही दिवसांपासून अत्यंत अनपेक्षित आणि वेगवान घडामोडी घडत आहेत. अर्थखात्यावरून महायुतीमधील घटक पक्षांमध्ये सुरू असलेली अस्वस्थता आणि धुसफूस अद्याप शमलेली नसतानाच, विरोधी बाकांवरील नेत्यांच्या गाठीभेटींमुळे राजकीय चर्चांना उधाण आले आहे. राष्ट्रवादी काँग्रेस शरदचंद्र पवार पक्षाचे ज्येष्ठ नेते आमदार जयंत पाटील यांनी काही दिवसांपूर्वीच मुख्यमंत्री देवेंद्र फडणवीस यांची रात्रीच्या वेळी घेतलेली गुप्त भेट आणि त्यानंतर काल थेट पक्षाचे दुसरे ज्येष्ठ नेते जितेंद्र आव्हाड यांच्यासह उपमुख्यमंत्री एकनाथ शिंदे यांची त्यांच्या ‘नंदनवन’ या निवासस्थानी घेतलेली भेट, यामुळे राजकीय वर्तुळात तर्कवितर्कांना उधाण आले आहे. शरद पवारांचा पक्ष राष्ट्रीय लोकशाही आघाडीत (NDA) प्रवेश करणार का, इथपर्यंतच्या चर्चा रंगू लागल्या आहेत. विरोधकांच्या या वाढत्या गाठीभेटींमुळे महाविकास आघाडीत (MVA) सर्व काही आलबेल आहे ना, असा गंभीर प्रश्न उपस्थित केला जात आहे.याच संवेदनशील मुद्द्यावरून माध्यम प्रतिनिधींनी महाविकास आघाडीचे प्रमुख समन्वयक आणि शिवसेना (उद्धव बाळासाहेब ठाकरे) पक्षाचे खासदार संजय राऊत यांना बोलते केले असता, त्यांनी आपल्या नेहमीच्या आक्रमक आणि उपरोधिक शैलीत उत्तर देत सर्व चर्चा फेटाळून लावल्या.
“जयंत पाटील आणि जितेंद्र आव्हाड ‘फ्री बर्ड्स’ आहेत!” – संजय राऊत
जयंत पाटील आणि जितेंद्र आव्हाड यांनी सत्ताधाऱ्यांची घेतलेली भेट हा काही पक्षात प्रवेश करण्याचा किंवा युती करण्याचा मार्ग नाही, असे स्पष्ट करत संजय राऊत यांनी खोचक सवाल उपस्थित केला. ते म्हणाले, “ज्या लोकांची नावे तुम्ही आता घेत आहात, ते उद्या समजा केंद्रीय राज्यमंत्री रामदास आठवले यांना भेटायला गेले, तर ते आठवले यांच्या रिपब्लिकन पक्षात प्रवेश करत आहेत असा त्याचा अर्थ काढणार का? या देशामध्ये आणि प्रामुख्याने महाराष्ट्रात अनेक राजकीय पक्ष अस्तित्वात आहेत. लोकप्रतिनिधी म्हणून किंवा वैयक्तिक संबंधांतून कोणी ना कोणी, कोणाची तरी भेट घेतच असते. प्रत्येक भेटीचा अर्थ ‘हा त्या पक्षात गेला’ किंवा ‘तो या पक्षात आला’ असा लावणे अत्यंत बालिशपणाचे आहे.”
पुढे बोलताना राऊत म्हणाले, “जयंत पाटील असोत की जितेंद्र आव्हाड, हे दोन्ही नेते महाराष्ट्राच्या राजकारणातील ज्येष्ठ चेहरे आहेत. ते सर्वच पक्षांतील नेत्यांना भेटू शकतात, ते पूर्णपणे स्वतंत्र म्हणजेच ‘फ्री बर्ड्स’ (Free Birds) आहेत. त्यांना कोणालाही भेटण्याचा अधिकार आहे. त्यामुळे त्यांच्या या भेटींमुळे महाविकास आघाडीत कोणतीही अस्वस्थता नाही आणि यावर प्रश्नचिन्ह उपस्थित करण्याचे काहीच कारण नाही,” असा सूचक इशारा त्यांनी दिला.
“आता मार्ग वेगळे असले तरी २५ वर्षे भाजपसोबत काम केले”; रामरक्षा आंदोलनाच्या निमंत्रणावर प्रतिक्रिया
दुसरीकडे, नागपूर येथे ठाकरे गटाच्या वतीने आयोजित करण्यात आलेल्या ‘रामरक्षा आंदोलना’चे निमंत्रण मुख्यमंत्री देवेंद्र फडणवीस यांनाही पाठवण्यात आले आहे. या निमंत्रणावर भाजपचे आमदार नितेश राणे आणि इतर नेत्यांनी कडाडून टीका करत, ‘ठाकरे गटाने मुख्यमंत्र्यांना निमंत्रण देणे हा निव्वळ राजकीय विनोद आहे’ अशी उपहासात्मक टिप्पणी केली होती.
या टीकेचा खरपूस समाचार घेताना संजय राऊत यांनी भाजप नेत्यांना खडे बोल सुनावले. ते म्हणाले, “हा राजकीय विनोद कसा असू शकतो? राज्याचे मुख्यमंत्री हे केवळ एखाद्या विशिष्ट पक्षाचे किंवा विचारसरणीचे नसतात, तर ते संपूर्ण महाराष्ट्राचे प्रतिनिधित्व करतात. आज जे भाजप नेते आमच्यावर टीका करत आहेत, त्यांच्यापेक्षा खूप अधिक काळ आम्ही देवेंद्र फडणवीस यांच्यासोबत राजकीय क्षेत्रात काम केले आहे. आज राजकीय परिस्थितीमुळे आमचे मार्ग भलेही वेगळे झाले असतील, तरी तब्बल २५ वर्षे आम्ही भाजप आणि देवेंद्रजींसोबत खांद्याला खांदा लावून सत्तेत आणि संघटनेत काम केले आहे.
