Sunetra Pawar Banner : राज्याचे माजी उपमुख्यमंत्री अजित पवार यांच्या निधनामुळे रिक्त झालेल्या बारामती विधानसभा मतदारसंघाच्या पोटनिवडणुकीकडे संपूर्ण महाराष्ट्राचे लक्ष लागले आहे. या अत्यंत महत्त्वाच्या निवडणुकीचा अधिकृत निकाल येत्या ४ मे रोजी जाहीर होणार असला, तरी तत्पूर्वीच राजकीय वर्तुळात मोठी खळबळ उडाली आहे. महायुतीच्या उमेदवार आणि उपमुख्यमंत्री सुनेत्रा पवार यांचा विजय निश्चित असल्याचे मानून त्यांच्या समर्थकांनी निकालाआधीच विजयाचे जल्लोषी बॅनर झळकावल्याने ही निवडणूक पुन्हा एकदा चर्चेचा विषय ठरली आहे.
पिंपरी-चिंचवड शहरात सुनेत्रा पवार यांच्या समर्थकांनी आणि अतिउत्साही कार्यकर्त्यांनी ठिकठिकाणी विजयाचे फलक लावले आहेत. या बॅनरवर “सुनेत्राताई अजितदादा पवार यांची आमदारपदी प्रचंड बहुमताने विजयी झाल्याबद्दल हार्दिक अभिनंदन” असा मजकूर लिहिण्यात आला आहे. पोटनिवडणुकीची मतमोजणी होण्यापूर्वीच अशा प्रकारचे फलक लागल्यामुळे राजकीय क्षेत्रात तर्क-वितर्कांना उधाण आले आहे. बारामती हा पवारांचा बालेकिल्ला मानला जातो, त्यामुळे सुनेत्रा पवार यांचा विजय हा केवळ औपचारिकता असल्याची भावना कार्यकर्त्यांमध्ये दिसून येत आहे.
या पोटनिवडणुकीत सुनेत्रा पवार या उपमुख्यमंत्री पदाची जबाबदारी सांभाळत असतानाच निवडणूक रिंगणात उतरल्या होत्या. अजित पवारांनंतर बारामतीची धुरा कोण सांभाळणार, याकडे सर्वांचे लक्ष लागले होते. कार्यकर्त्यांच्या मते, सुनेत्रा पवार यांना मतदारसंघातील जनतेचा मोठा कौल मिळाला असून, त्यांच्या विजयाबद्दल कोणतीही शंका उरलेली नाही. याच दाट विश्वासामुळे मतमोजणीच्या काही दिवस आधीच विजयाचे ‘फ्लेक्स’ लावून कार्यकर्त्यांनी आपले शक्तिप्रदर्शन केले आहे.
दरम्यान, निवडणूक आयोगाकडून निकालाची अधिकृत घोषणा ४ मे रोजी होणार आहे. लोकशाहीच्या प्रक्रियेनुसार मतमोजणी पूर्ण झाल्याशिवाय कोणताही उमेदवार विजयी घोषित केला जात नाही. असे असतानाही कार्यकर्त्यांनी दाखवलेला हा आत्मविश्वास विरोधकांसाठी चिंतेचा विषय ठरू शकतो की ही केवळ समर्थकांची घाई आहे, हे येत्या काही दिवसांत स्पष्ट होईल.
