Sunil Tatkare On Sunetra Pawar : बारामती विधानसभा पोटनिवडणुकीतील ऐतिहासिक विजयानंतर राष्ट्रवादी काँग्रेसमध्ये आता भविष्यातील नेतृत्वावरून नवनवीन समीकरणे मांडली जात आहेत. उपमुख्यमंत्री अजित पवार यांचे धाकटे चिरंजीव जय पवार यांनी सुनेत्रा पवार यांच्या भावी राजकीय वाटचालीबाबत केलेल्या एका विधानाने राज्याच्या राजकारणात मोठी खळबळ उडाली आहे. “अजितदादांनी मुख्यमंत्री व्हावे ही सर्वच बारामतीकरांची इच्छा होती, मात्र आता सुनेत्रा वहिनी त्यासाठी अपार कष्ट घेत आहेत. २०२९ च्या विधानसभा निवडणुकीत त्या बारामतीचे प्रतिनिधित्व करतील आणि त्यांनी मुख्यमंत्रीपदाची धुरा सांभाळावी, अशी आम्हा सर्वांची इच्छा आहे,” असे विधान जय पवार यांनी केले. त्यांच्या या विधानामुळे राजकीय वर्तुळात नव्या वादाला आणि चर्चेला तोंड फुटले आहे.
राजकीय वास्तव आणि कार्यकर्त्यांच्या भावना – सुनील तटकरे
उपमुख्यमंत्री सुनेत्रा पवार यांच्या रायगड दौऱ्यादरम्यान राष्ट्रवादी काँग्रेसचे प्रदेशाध्यक्ष सुनील तटकरे यांना जय पवारांच्या या विधानाबाबत विचारले असता, त्यांनी अत्यंत सावध प्रतिक्रिया दिली. तटकरे म्हणाले की, “प्रत्येक कार्यकर्त्याला आणि कुटुंबातील सदस्याला आपल्या नेतृत्वाने सर्वोच्च पदी पोहोचावे असे वाटणे स्वाभाविक आहे. जय पवार यांनी व्यक्त केलेली भावना ही त्यांच्या मनातील इच्छा असू शकते. मात्र, राजकारण करत असताना आम्हाला वास्तवाचे भान राखावे लागते. आमचा राष्ट्रवादी काँग्रेस पक्ष सध्या एनडीएचा (NDA) घटक असून, महायुतीच्या माध्यमातूनच आम्ही भविष्यातील वाटचाल करणार आहोत.” तटकरे यांनी या विधानातून कार्यकर्त्यांच्या भावनांचा आदर करत असतानाच सत्तेच्या समीकरणांची जाणीव करून दिली आहे.
भाजपला विरोध केल्याशिवाय मुख्यमंत्रीपद अशक्य – रोहित पवार
जय पवारांच्या वक्तव्यावर शरद पवार गटाचे आमदार रोहित पवार यांनी सडकून टीका करत त्यांना राजकीय सल्ला दिला आहे. रोहित पवार म्हणाले की, “२०२९ मध्ये मुख्यमंत्री होण्याचे स्वप्न केवळ जय पवारांचेच नाही, तर आमची आणि स्वतः अजितदादांचीही तीच इच्छा होती. मात्र, त्यासाठी भाजपसोबत राहून चालणार नाही. सध्याच्या राजकीय परिस्थितीत भाजप सोडून इतर कोणत्याही पक्षाचा मुख्यमंत्री होणे कठीण आहे. जर कोणाला मुख्यमंत्री व्हायचे असेल, तर त्यांना भाजपच्या धोरणांना विरोध करावाच लागेल.” अजितदादांनी त्यांच्या कारकिर्दीच्या शेवटच्या काही महिन्यांत भाजपला जो विरोध दर्शवला होता, त्याची आठवण करून देत रोहित पवारांनी जय पवारांना टोला लगावला.
२०२९ च्या रणधुमाळीचे संकेत?
जय पवारांच्या या विधानामुळे पवार कुटुंबातील अंतर्गत राजकीय महत्त्वाकांक्षा आता उघडपणे समोर येऊ लागल्या आहेत. सुनेत्रा पवार यांनी नुकत्याच झालेल्या पोटनिवडणुकीत मिळवलेला मोठा विजय त्यांच्या पुढील राजकीय प्रवासाची पायाभरणी मानला जात आहे.
