R Madhavan Padma Shri Watch: प्रसिद्ध अभिनेते आर. माधवन यांना २३ जून रोजी राष्ट्रपती भवनात भारताचा अत्यंत प्रतिष्ठेचा ‘पॉवरफुल नागरी सन्मान’ म्हणजेच पद्मश्री पुरस्कार प्रदान करण्यात आला. या दिमाखदार सोहळ्यात माधवन यांच्या यशाचे कौतुक तर झालेच, पण सोबतच त्यांच्या हातातील एका खास वस्तूने सर्वांचे लक्ष वेधून घेतले.
माधवन यांनी या सोहळ्यासाठी गडद निळ्या रंगाचा बंदगळा सूट परिधान केला होता, परंतु त्यांच्या हाताच्या बाहीखालून चमकणाऱ्या एका अलौकिक घड्याळाने जगभरातील घड्याळप्रेमींना वेड लावले आहे.
माधवन यांच्या मनगटावर ‘टायटन नेबुला जलसा फ्लाईंग टूरबिलॉन’ हे अत्यंत दुर्मिळ आणि लिमिटेड-एडिशन घड्याळ होते. तुम्हाला ऐकून आश्चर्य वाटेल की, संपूर्ण जगात अशी फक्त 10 घड्याळे बनवण्यात आली आहेत आणि या एका घड्याळाची किंमत साधारण 40.5 लाख रुपये आहे. या घड्याळाची केवळ किंमतच जास्त नाही, तर याच्या निर्मितीमागे दोन पद्मश्री पुरस्कार विजेत्यांचा एक अनोखा संगम दडला आहे.
हवा महालची जिवंत कलाकृती आणि १८ कॅरेट रोझ गोल्ड; असे आहे घड्याळ:
या ४०.५ लाखांच्या घड्याळाची रचना आणि त्यावरील कलाकुसर कोणत्याही महालापेक्षा कमी नाही. त्याची प्रमुख वैशिष्ट्ये खालीलप्रमाणे आहेत:
- दोन पद्मश्री विजेत्यांचा संगम: हे घड्याळ ज्या अभिनेत्याने म्हणजेच आर. माधवन यांनी घातले आहे त्यांना नुकताच पद्मश्री मिळाला आहे, तर या घड्याळाच्या डायलवर जयपूरच्या प्रसिद्ध ‘हवा महल’चे हाताने सूक्ष्म चित्र काढणारे प्रख्यात कलाकार एस. शाकीर अली हे देखील पद्मश्री पुरस्कार विजेते आहेत.
- मौल्यवान हिरे आणि धातू: या घड्याळाचे बाह्य कवच १८ कॅरेट रोझ गोल्डपासून बनवले आहे. तसेच जयपूरच्या लाल दगडांच्या वास्तूकलेची आठवण करून देण्यासाठी यात दुर्मिळ ‘रेड अगेट’ या रत्नाचा वापर करण्यात आला आहे.
- जटिल मेकॅनिझम: टायटन कंपनीने स्वतः विकसित केलेल्या या घड्याळात 144 बारीक सुटे भाग आणि 14 मौल्यवान रत्ने वापरण्यात आली असून, हे तंत्रज्ञान एका छोट्या जागेत अत्यंत कौशल्याने बसवले आहे.
‘जलसा’ म्हणजेच विजयाचा उत्सव; माधवनने शेअर केली भावूक पोस्ट
या घड्याळाच्या डायलवर ‘जलसा’ म्हणजेच एका शाही मिरवणुकीचे चित्र रेखाटले आहे, जे हवा महालच्या समोरील राजेशाही थाट, विजय आणि वैभवाचे प्रतीक आहे. हवा महालच्या 200 वर्षांपेक्षा जास्त जुन्या वारशाला हे घड्याळ मानवंदना देते. माधवन यांच्या आयुष्यातील या सर्वात मोठ्या विजयाच्या क्षणी हे घड्याळ त्यांच्या हातावर असणे हा एक विलक्षण योगायोग मानला जात आहे.
ब्रँडच्या म्हणण्यानुसार, हे घड्याळ केवळ बाह्य उत्सवाचे नाही, तर माणसाने स्वतःच्या हिमतीवर मिळवलेल्या अंतर्गत विजयाची आठवण करून देते. दरम्यान, हा सर्वोच्च बहुमान मिळाल्यानंतर माधवन यांनी सोशल मीडियावर एक अत्यंत भावूक पोस्ट शेअर केली आहे. या ऐतिहासिक क्षणाचे साक्षीदार होण्यासाठी त्यांची पत्नी सरिता माधवन आणि मुलगा वेदांत माधवन हे देखील राष्ट्रपती भवनात उपस्थित होते.
हे देखील वाचा – Lohagad Fort Murder Case: “माझा मुलगा खूप लांब उभा होता…”; लोहगड मर्डर केसमध्ये नवा ट्विस्ट! आरोपीच्या वडिलांचा खळबळजनक दावा
