Zoya Akhtar Production Theft: हिंदी चित्रपटसृष्टीतील प्रसिद्ध दिग्दर्शिका झोया अख्तर आणि रीमा कागती यांच्या ‘टायगर बेबी डिजिटल एलएलपी’ या प्रोडक्शन हाऊसमधून एक धक्कादायक प्रकार समोर आला आहे. मुंबईतील वांद्रे परिसरात असलेल्या या कंपनीच्या ऑफिसमधून तब्बल 66 हार्ड डिस्क चोरीला गेल्या आहेत. या सर्व हार्ड डिस्कमध्ये अनेक आगामी चित्रपट आणि वेब सीरिजचा अत्यंत महत्त्वाचा डेटा होता.
हा प्रकार उघडकीस आल्यानंतर कंपनीच्या कार्यकारी सहाय्यक मेहजबीन शेख यांनी वांद्रे पोलीस ठाण्यात रीतसर तक्रार दाखल केली. पोलिसांनी तातडीने तपास करत या प्रकरणातील मुख्य आरोपी असलेल्या ऑफिस बॉयसह 2 जणांना बेड्या ठोकल्या आहेत.
Zoya Akhtar Production Theft: हार्ड डिस्कमध्ये होता कोट्यवधींचा डेटा
चोरीला गेलेल्या या 66 हार्ड डिस्क सामान्य नव्हत्या. त्यामध्ये कंपनीच्या अनेक मोठ्या प्रोजेक्ट्सचा डेटा सुरक्षित ठेवण्यात आला होता. यामध्ये खालील महत्त्वाच्या गोष्टींचा समावेश होता:
- रॉ फुटेज: चित्रीकरण केलेले पण अजून संपादन न झालेले मूळ व्हिडिओ.
- जाहिराती आणि बॅकअप: विविध जाहिरातींचे साहित्य आणि पोस्ट-प्रोडक्शन कामांचे बॅकअप.
- अरिलीज्ड प्रोजेक्ट्स: अद्याप प्रदर्शित न झालेल्या अनेक चित्रपट आणि वेब सीरिजचे महत्त्वाचे आर्काइव्ह्ज.
Zoya Akhtar Production Theft: ऑफिस बॉयनेच केला विश्वासघात
पोलीस तपासादरम्यान कंपनीतच काम करणाऱ्या मोहम्मद शाहिद अझीम खान या 28 वर्षीय ऑफिस बॉयवर संशय बळावला. तो सांताक्रूझमधील वाकोला भागातील रहिवासी आहे. पोलिसांनी त्याची कसून चौकशी केली असता त्याने गुन्ह्याची कबुली दिली.
शाहिदने गेल्या 5 महिन्यांत अतिशय हुशारीने आणि टप्प्याटप्प्याने ऑफिसमधून 24 हार्ड ड्राईव्ह चोरल्या होत्या. त्यानंतर त्याने या सर्व हार्ड डिस्क रितेश सुरेश शाह या 44 वर्षीय स्टेशनरी दुकानात काम करणाऱ्या व्यक्तीला विकल्या होत्या.
Zoya Akhtar Production Theft: १५ ते २० हजारांत विकायचा डेटा
आरोपी ऑफिस बॉय हा लाखो रुपयांचा डेटा असलेल्या प्रत्येक हार्ड डिस्कची विक्री अवघ्या 15,000 ते 20,000 रुपयांना करायचा. सुरुवातीच्या प्राथमिक तपासानुसार, गेल्या काही महिन्यांत या प्रोडक्शन कंपनीच्या ऑफिसमधून एकूण 100 पेक्षा जास्त हार्ड डिस्क बेपत्ता झाल्याचा अंदाज वर्तवला जात आहे.
Zoya Akhtar Production Theft: २९ मे पर्यंत पोलीस कोठडी
वांद्रे पोलिसांनी या दोन्ही आरोपींविरोधात भारतीय न्याय संहिता आणि माहिती तंत्रज्ञान कायद्याच्या संबंधित कलमांनुसार गुन्हा दाखल केला आहे. दोन्ही आरोपींना न्यायालयात हजर केले असता, न्यायालयाने त्यांना 29 मे पर्यंत पोलीस कोठडी सुनावली आहे. या चोरीमागे आणखी कोणाचा हात आहे का, याचा तपास आता पोलीस करत आहेत.
हे देखील वाचा – Karnataka Political Crisis: कर्नाटक राजकारणात मोठा भूकंप! मुख्यमंत्री सिद्धरामय्या राजीनामा देण्याची शक्यता; डीके शिवकुमार यांच्याकडे सत्ता?
