Wolf Finally Captured : गेल्या नऊ दिवसांपासून संपूर्ण दक्षिण कोरियाचे लक्ष वेधून घेणारा ‘न्युकगू’ हा दोन वर्षांचा लांडगा अखेर सुरक्षितपणे जेरबंद करण्यात आला आहे. प्राणिसंग्रहालयातून पलायन केल्यानंतर न्युकगूने प्रशासनाला चांगलेच झुंजवले होते. अखेर शुक्रवारी मध्यरात्री स्थानिक वेळेनुसार ००:४४ वाजता एका महामार्गाजवळ शोध पथकाने त्याला पकडण्यात यश मिळवले. देजॉन शहर प्रशासनाने या वृत्ताला दुजोरा दिला असून, वैद्यकीय तपासणीनंतर न्युकगूची प्रकृती स्थिर असल्याचे आणि त्याचे शारीरिक तापमान व नाडीचे ठोके सामान्य असल्याचे डॉक्टरांनी स्पष्ट केले आहे.
प्रशासनाची मोठी मोहीम आणि हुलकावणीचा खेळ-
न्युकगूच्या शोधासाठी स्थानिक प्रशासनाने शेकडो बचाव कर्मचाऱ्यांची फौज तैनात केली होती. या शोधमोहिमेदरम्यान अनेकदा अधिकारी त्याच्या अगदी जवळ पोहोचले होते, परंतु प्रत्येक वेळी न्युकगूने अत्यंत चपळाईने जाळ्यातून निसटून हुलकावणी दिली. या आठवड्याच्या सुरुवातीला, ओ-वर्ल्ड (O-World) प्राणिसंग्रहालयापासून सुमारे दोन किलोमीटर अंतरावर असलेल्या एका डोंगरावर तो दिसल्याची माहिती अग्निशमन दलाला मिळाली होती. रात्रीच्या अंधारात गाडीच्या हेडलाईटच्या प्रकाशात रस्त्यावरून पळतानाचा त्याचा व्हिडिओ समाजमाध्यमांवर प्रचंड व्हायरल झाला होता. मात्र, शोध पथक पोहोचण्यापूर्वीच त्याने पुन्हा तिथून पलायन केले होते.
प्रतीकात्मक महत्त्व आणि लोकभावना-
न्युकगूच्या या साहसामुळे तो इंटरनेटवर एका रात्रीत प्रसिद्ध झाला. त्याच्या ‘स्वतंत्र’ प्रवृत्तीचे कौतुक करण्यासाठी त्याच्या नावाने एक ‘मीम कॉइन’ (Meme Coin) देखील सुरू करण्यात आले, ज्याला निर्मात्यांनी “पिंजऱ्यात न राहणारा लांडगा” आणि “स्वातंत्र्याचे प्रतीक” असे संबोधले. न्युकगूचा जन्म २०२४ मध्ये ओ-वर्ल्डमधील ‘कोरियन लांडगा पुनरुज्जीवन’ कार्यक्रमांतर्गत झाला होता. कोरियन द्वीपकल्पातून नामशेष होत चाललेल्या या लांडग्यांच्या प्रजातीचे संवर्धन करणे हा या कार्यक्रमाचा मुख्य उद्देश आहे. मात्र, न्युकगूचे आयुष्य पिंजऱ्यात गेल्यामुळे तो नैसर्गिक जंगलात जगू शकेल का, याबाबत प्राणिप्रेमींमध्ये चिंतेचे वातावरण होते.
अखेर भीतीचे सावट ओसरले-
न्युकगूच्या पकडण्याच्या प्रक्रियेत त्याला इजा होईल किंवा त्याला ठार मारले जाईल, अशी भीती प्राणी अधिकार संघटनांनी व्यक्त केली होती. यापूर्वी २०१८ मध्ये याच प्राणिसंग्रहालयातून पळालेल्या ‘पोरोंगी’ नावाच्या बिबट्याला पकडताना जीव गमवावा लागला होता, त्यामुळे ही धास्ती अधिक होती. साक्षात दक्षिण कोरियाचे राष्ट्राध्यक्ष ली जे म्युंग यांनी देखील समाजमाध्यमावरून न्युकगूच्या सुरक्षिततेसाठी प्रार्थना केली होती.
