Bihar NDA Government : बिहार विधानसभा निवडणुकीत राष्ट्रीय लोकशाही आघाडीने (NDA) दणदणीत विजय मिळवल्यानंतर, आता सत्ता स्थापनेची प्रक्रिया वेगाने सुरू झाली आहे. या निवडणुकीत एनडीएला 200 पेक्षा अधिक जागा मिळाल्या आहेत.
20 नोव्हेंबर रोजी पाटणाच्या गांधी मैदानात NDA चा शपथविधी सोहळा होण्याची शक्यता आहे. या भव्य कार्यक्रमाला पंतप्रधान नरेंद्र मोदी आणि इतर प्रमुख NDA नेते उपस्थित राहतील, असा अंदाज आहे.
NDA ने बिहार विधानसभेच्या एकूण 243 जागांपैकी 202 जागा जिंकून ऐतिहासिक विजय नोंदवला आहे. युतीमधील दोन प्रमुख घटक पक्ष भाजप आणि नितीश कुमार यांचा जेडी(यू) यांनी अनुक्रमे 89 आणि 85 जागा जिंकल्या आहेत.
याउलट, महागठबंधन पूर्णपणे कोसळले. राष्ट्रीय जनता दलाला केवळ 25 जागा मिळाल्या, काँग्रेसला 6 जागांवर समाधान मानावे लागले, तर डाव्या पक्षांनी एकत्रितपणे फक्त 3 जागा मिळवल्या. बसपा आणि आयआयपी यांना प्रत्येकी 1 जागा मिळाली.
नितीश कुमार 10 व्यांदा मुख्यमंत्रीपदासाठी सज्ज
निकालांनंतर आता सर्वांचे लक्ष बिहारमधील सत्ता स्थापनेकडे लागले आहे. जेडी(यू) नेते नितीश कुमार हे 10 व्यांदा मुख्यमंत्रीपदाची शपथ घेण्यासाठी सज्ज असून, ते सर्वाधिक काळ मुख्यमंत्री राहिलेल्या नेत्यांच्या यादीत सामील होणार आहेत. ते 20 नोव्हेंबरला मुख्यमंत्रीपदाची शपथ घेऊ शकतात.
रिपोर्टनुसार, भाजप आणि जेडी(यू) युती निवडणुकीत वापरलेला जागा वाटपाचा फॉर्म्युला मंत्रिमंडळाच्या वाटपासाठी देखील वापरण्याची शक्यता आहे. नितीश कुमार यांच्या जेडी(यू) ला मुख्यमंत्रीपद मिळू शकते, तर भाजप आणि चिराग पासवान यांच्या लोक जनशक्ती पक्षाला (LJP) प्रत्येकी एक उपमुख्यमंत्रिपद मिळण्याची शक्यता आहे.
मंत्रिमंडळ वाटपाचा फॉर्म्युला
तिकीट वाटपाच्या वेळी NDA भागीदाराला प्रत्येक खासदारामागे पाच ते सहा विधानसभा जागा देण्यात आल्या होत्या. याच फॉर्म्युल्यानुसार आता मंत्रिमंडळातील जागा वाटल्या जाऊ शकतात. उदाहरणार्थ, 84 आमदार असलेल्या जेडी(यू) ला 14 मंत्रीपदे मिळू शकतात. नव्या सरकारमध्ये संतुलित सत्ता वाटप सुनिश्चित करण्यासाठी जिंकलेल्या जागांच्या प्रमाणात सर्व भागीदारांना सामावून घेतले जाईल, अशी अपेक्षा आहे. या अंतर्गत सल्लामसलत केल्यानंतर, NDA ची संयुक्त विधिमंडळ पक्षाची बैठक होईल, जिथे युतीच्या विधिमंडळ पक्षनेत्याची औपचारिक निवड केली जाईल.
हे देखील वाचा – Delhi Blast : दिल्ली स्फोटात वापरण्यात आलेली कार कोणाच्या नावावर होती? NIA ने केला खुलासा
