Mumbai News : मुंबईतील कफ परेड परिसरातून माणुसकीला काळिमा फासणारी एक अत्यंत घृणास्पद आणि संतापजनक घटना समोर आली आहे. एका २० वर्षीय मूकबधिर तरुणीवर तिच्याच नराधम पित्याने अत्याचार केल्याचे वैज्ञानिक पुराव्यांवरून सिद्ध झाले असून, या प्रकरणातील धक्कादायक खुलाशामुळे संपूर्ण महाराष्ट्र हादरला आहे.
कफ परेड बलात्कार प्रकरण: डीएनए चाचणीतून पित्याचेच कृत्य उघड; नराधम बापाला अटक-
सप्टेंबर २०२५ मध्ये पीडित तरुणीने आपल्या आजीकडे पोटात तीव्र वेदना होत असल्याची तक्रार केली होती. पीडिता मूकबधिर असल्याने तिने हावभावांच्या माध्यमातून आपल्या पोटात काहीतरी विचित्र हालचाल होत असल्याचे दर्शवले. परिस्थितीचे गांभीर्य ओळखून नातेवाईकांनी तिला तातडीने मुंबईतील ‘कामा अँड अल्बलेस’ रुग्णालयात दाखल केले. तेथे वैद्यकीय तपासणी केली असता, ती तरुणी पाच महिन्यांची गर्भवती असल्याचे निष्पन्न झाले आणि रुग्णालय प्रशासनाने तत्काळ पोलिसांना पाचारण केले.
उपचारादरम्यान पीडितेचा गर्भपात झाला, परंतु पोलिसांनी कायदेशीर प्रक्रियेचा भाग म्हणून गर्भाचे डीएनए नमुने फॉरेन्सिक लॅबमध्ये तपासणीसाठी पाठवले होते. या प्रकरणाचा तपास करत असताना पोलिसांनी पीडितेच्या वडिलांची प्राथमिक चौकशी केली होती. मात्र, पित्याने कोणत्याही प्रकारच्या अत्याचाराचा इन्कार केला. विशेष म्हणजे, मुलीच्या गरोदरपणाबाबत विचारले असता त्याला समाधानकारक उत्तर देता आले नाही आणि त्याने याप्रकरणी प्राथमिक माहिती अहवाल (एफआयआर) दाखल करण्यासही स्पष्ट नकार दिला होता. अखेर, तज्ज्ञांच्या समुपदेशनानंतर पीडितेने तक्रार दाखल केली, परंतु शारीरिक त्रुटींमुळे ती आरोपीचे नाव सांगण्यास असमर्थ होती.
तपासाला दिशा देण्यासाठी पोलिसांनी पीडितेने फोटोंवरून ओळखलेल्या एका १६ वर्षीय मुलाला आणि एका ३२ वर्षीय व्यक्तीला सुरुवातीला ताब्यात घेतले होते. संशयाची सुई कुटुंबातील व्यक्तींकडेही असल्याने, पोलिसांनी पीडितेचे वडील, नातेवाईक आणि शेजारी राहणाऱ्या अशा एकूण १७ जणांचे डीएनए नमुने संकलित केले. २७ जानेवारी रोजी प्राप्त झालेल्या फॉरेन्सिक अहवालात गर्भाचे डीएनए नमुने थेट पीडितेच्या वडिलांच्या डीएनएशी जुळले. या निर्णायक पुराव्याच्या आधारे पोलिसांनी ३ फेब्रुवारी रोजी नराधम पित्याला बेड्या ठोकल्या. मार्च ते सप्टेंबर २०२५ या कालावधीत घराच्या सुरक्षित वातावरणातच हा नृशंस प्रकार घडल्याचे तपासात निष्पन्न झाले आहे.
या घटनेने केवळ नात्यांमधील विश्वासार्हतेवर प्रश्नचिन्ह उपस्थित केले नसून, राज्यातील महिलांच्या सुरक्षिततेची भीषण वास्तवता पुन्हा एकदा समोर आणली आहे. नॅशनल क्राईम रेकॉर्ड ब्युरोच्या (NCRB) २०२३ च्या आकडेवारीनुसार, महिलांविरोधातील गुन्ह्यांच्या बाबतीत उत्तर प्रदेशनंतर महाराष्ट्र देशात दुसऱ्या क्रमांकावर आहे. बलात्कार, विनयभंग आणि हत्या यांसारख्या गंभीर गुन्ह्यांचे वाढते प्रमाण ही चिंतेची बाब ठरत आहे.
