NCP National President: महाराष्ट्राच्या राजकारणातील दिग्गज नेते अजित पवार यांच्या निधनानंतर राष्ट्रवादी काँग्रेस (NCP) पक्षात मोठ्या बदलांचे वारे वाहू लागले आहेत. पक्षाचे नेतृत्व आता कोणाकडे जाणार, यावरून राजकीय वर्तुळात गेल्या काही दिवसांपासून तर्कवितर्क लढवले जात होते. मात्र, आता या संदर्भातील चित्र स्पष्ट होताना दिसत आहे. उपमुख्यमंत्री सुनेत्रा पवार यांच्याकडेच राष्ट्रवादी काँग्रेसच्या राष्ट्रीय अध्यक्षपदाची जबाबदारी सोपवली जाण्याची दाट शक्यता सूत्रांनी वर्तवली आहे.
पुढील १५ दिवसांत होणार अधिकृत निवड
मिळालेल्या माहितीनुसार, राष्ट्रवादी काँग्रेसच्या राष्ट्रीय अध्यक्षांच्या निवडीची प्रक्रिया अंतिम टप्प्यात आहे. येत्या १५ दिवसांत पक्षाची राष्ट्रीय कार्यकारिणीची बैठक घेऊन नवीन अध्यक्षांची घोषणा केली जाईल. पक्षातील बहुतांश आमदार आणि खासदारांनी सुनेत्रा पवार यांच्या नावाला पसंती दर्शवली आहे. ही निवड झाल्यानंतरच शरद पवार यांच्या नेतृत्वाखालील राष्ट्रवादी आणि अजित पवार यांची राष्ट्रवादी यांच्या विलीनीकरणाबाबतच्या पुढील चर्चांना वेग येण्याची शक्यता आहे.
पुण्यात राजकीय हालचालींना वेग
उपमुख्यमंत्री आणि पुण्याच्या पालकमंत्री सुनेत्रा पवार सध्या पुण्यात सक्रिय असून, त्यांनी स्थानिक स्वराज्य संस्थांच्या निकालानंतर विजयी प्रतिनिधींच्या भेटीगाठी घेण्यास सुरुवात केली आहे. पुण्याच्या सर्किट हाऊसमध्ये राजकीय गाठीभेटींचे सत्र सुरू असून, यावेळी पार्थ पवार आणि जय पवार हे देखील उपस्थित होते. तसेच, पक्षाचे राजकीय सल्लागार नरेश अरोरा यांचे बंधू देखील सुनेत्रा पवारांच्या भेटीला पोहोचल्याने अध्यक्षपदाच्या निवडीबाबत खलबते सुरू असल्याची चर्चा रंगली आहे.
विलीनीकरणाचे भवितव्य काय?
अजित पवारांच्या पश्चात दोन्ही राष्ट्रवादी पुन्हा एकत्र येणार का, या प्रश्नावर दोन्ही बाजूंच्या नेत्यांकडून वेगवेगळी विधाने येत आहेत. मात्र, पक्षाच्या अंतर्गत सूत्रांनी दिलेल्या माहितीनुसार, आधी नवीन राष्ट्रीय अध्यक्षांची रीतसर निवड केली जाईल आणि त्यानंतरच विलीनीकरणासारख्या मोठ्या धोरणात्मक निर्णयावर पाऊल उचलले जाईल. सुनेत्रा पवार यांनी शपथ घेतल्यापासूनच त्यांच्याकडे पक्षाची कमान सोपवण्याचे संकेत मिळत होते.
