Rajpal Yadav vs Priyadarshan: बॉलिवूडमधील प्रसिद्ध विनोदी अभिनेता राजपाल यादव सध्या त्यांच्या कायदेशीर अडचणींमुळे चर्चेत आहेत. 2012 च्या एका चेक बाऊन्स प्रकरणात तिहार जेलमधून अंतरिम जामिनावर बाहेर आल्यानंतर, त्यांनी दिग्दर्शक प्रियदर्शन यांच्या एका विधानावर तीव्र आक्षेप नोंदवला आहे.
राजपाल यादव यांच्या कायदेशीर समस्यांचे मूळ त्यांच्या ‘कमी शिक्षणामुळे’ असल्याचे प्रियदर्शन यांनी म्हटले होते, जे अभिनेत्याने पूर्णपणे फेटाळून लावले आहे.
“शिक्षण आणि संकटाचा संबंध नाही”
प्रियदर्शन यांच्या विधानाचा समाचार घेताना राजपाल यादव म्हणाले की, “अल्पशिक्षणाचा येथे काहीही संबंध नाही. हे विधान पूर्णपणे चुकीचे आहे. मी एक सुशिक्षित व्यक्ती असून वयाच्या 11 व्या वर्षापासून काम करत आहे. मोठ्या दिग्गज व्यक्तींनाही कधी ना कधी समस्यांना सामोरे जावे लागते, पण त्याचा अर्थ असा नाही की ते अशिक्षित आहेत. जर मी शिकलेला नसतो, तर या चित्रपट सृष्टीत मी 25 ते 30 वर्षे टिकलो नसतो.”
प्रियदर्शन यांनी यापूर्वी राजपाल यादव यांना ‘चांगला माणूस’ म्हटले होते, परंतु त्यांच्या शिक्षणाअभावी त्यांनी मोठी चूक केल्याचे नमूद केले होते. यावर राजपाल यांनी स्पष्ट केले की, प्रियदर्शन किंवा इतर कोणालाही या प्रकरणाची पूर्ण माहिती नसल्याने अशा प्रकारे कोणाबद्दल मत बनवणे चुकीचे आहे.
सोनू सूदच्या मदतीवर प्रतिक्रिया
दरम्यान, अभिनेता सोनू सूद याने राजपाल यादव यांना काम देण्याबाबत केलेल्या विधानावरही त्यांनी प्रतिक्रिया दिली. राजपाल यादव म्हणाले, “मला काम मागण्याची गरज आहे, हा लोकांचा गैरसमज आहे. काम मागण्यात काहीच लाज नाही, पण चित्रपट ही माझी आवड आहे आणि मी अशा पद्धतीने काम करतो की काम नेहमी माझ्याकडे चालत येते.” राजपाल यांनी स्पष्ट केले की त्यांना कोणाच्याही सहानुभूतीची गरज नाही.
कामाचा धडाका सुरूच
कायदेशीर वादात अडकलेले असूनही राजपाल यादव यांच्याकडे कामाची कमतरता नाही. ते लवकरच प्रियदर्शन यांच्या ‘भूत बंगला’ या चित्रपटात दिसणार आहेत. याशिवाय ‘वेलकम टू द जंगल’, ‘हैवान’, दोन वेब सिरीज आणि इतर दोन मोठे चित्रपट त्यांच्याकडे आहेत. तसेच त्यांनी अलीकडेच स्वतःचे युट्यूब चॅनेल सुरू करून डिजिटल जगातही पदार्पण केले आहे.
